«تۇرعىن ءۇي سالاسىنا سالىنعان ينۆەستيتسيا 2015 جىلعى 740 ميلليارد تەڭگەدەن 2016 جىلى 830 ميلليارد تەڭگەگە ارتتى. ال, بيىلعى جىلدىڭ العاشقى توقسانىندا 174 ملرد تەڭگە باعىتتالدى. 2016 جىلى رەسپۋبليكانىڭ تۇرعىن ءۇي قورى 10,5 ملن شارشى مەترگە كوبەيدى. بۇل – شامامەن 90 مىڭ باسپانا. بيىلعى ەسەپتى كەزەڭدە جالپى الاڭى 3,1 ملن شارشى مەتر تۇرعىن ءۇي نەمەسە 25 مىڭ باسپانا سالىندى. بۇل كورسەتكىش وتكەن جىلدىڭ وسى كەزەڭىمەن سالىستىرعاندا 25,3 پايىزعا ارتىق. ايتا كەتۋ كەرەك, جىل اياعىنا دەيىن «نۇرلى جەر» باعدارلاماسى اياسىندا 100 مىڭ پاتەر, ونىڭ ىشىندە مەملەكەتتىك ينۆەستيتسيا ەسەبىنەن 25 مىڭ ءپاتەر سالىنادى», دەدى كوميتەت توراعاسى.
بريفينگ بارىسىندا جەكە تۇرعىن ءۇي قۇرىلىسىن قولداۋ جانە ونى دامىتۋ ماقساتىندا وبلىس ورتالىقتارىندا ۇسىنىلعان جاڭا قاناتقاقتى جوبا جايىندا جانە بەرىلەتىن الەۋمەتتىك باسپاناعا قاتىستى ماسەلەلەر دە ءسوز بولدى. «حالىقتىڭ الەۋمەتتىك ءالسىز توپتارى ءۇشىن ساتىپ الۋ قۇقىعىنسىز ارەندالىق باسپانا سالىنادى. تۇرعىن ءۇي قۇرىلىس جيناق جۇيەسىنىڭ سالىمشىلارى ءۇشىن نەسيەلىك تۇرعىن ۇيلەردى پايدالانۋعا بەرۋ كولەمى ارتاتىن بولادى. جەكە قۇرىلىس سالۋشىلاردىڭ تۇرعىن ءۇي قۇرىلىسىن جانە مەملەكەتتىڭ سۋبسيديالاۋى ارقىلى يپوتەكالىق نەسيەلەندىرۋدىڭ قولجەتىمدىلىگىن ارتتىرۋ كوزدەلۋدە», دەدى م.جايىمبەتوۆ.
جۇرگىزىلگەن رەفورمالار كاسىپكەرلەر ءۇشىن رۇقسات الۋ رەسىمدەرىنىڭ سانىن 25-تەن 8-گە دەيىن جانە قۇرىلىسقا رۇقسات الۋ مەرزىمىن 3 ايدان 1 ايعا دەيىن قىسقارتۋعا مۇمكىندىك بەرەدى ەكەن. «اتقارىلعان شارالاردىڭ ناتيجەسىندە «Doing Business» رەيتينگىندە قازاقستاننىڭ پوزيتسياسى جاقساردى. دۇنيەجۇزىلىك بانكتىڭ باعالاۋى بويىنشا, قازاقستان ەكى جىلدا 152-ورىننان 22 ورىنعا كوتەرىلدى. قۇرىلىس سالاسىنداعى ساراپتامالىق قىزمەتتىڭ ءوزىن-ءوزى رەتتەۋىنە كوشۋى اياسىندا ساراپتامانىڭ 60 پايىزى نارىقتىق ورتاعا بەرىلدى, 2020 جىلدان باستاپ جوبالارعا ساراپتاما جاساۋدىڭ 90 پايىزى جەكە نارىقتا بولادى», دەدى كوميتەت توراعاسى. ونىڭ ايتۋىنشا, تەحنولوگيالىق كارتالاردى ازىرلەۋ نەگىزىندە قۇرىلىستاعى جاڭا تەحنولوگيالارعا سمەتالىق باعالاۋ كەڭەيۋدە. قۇرىلىس سالاسىن تەحنيكالىق رەتتەۋدىڭ ەۋروپالىق جانە الەمدىك جۇيەلەرىنە كىرىگۋ شەڭبەرىندە 2017 جىلدىڭ سوڭىنا دەيىن جالپى قۇرىلىس ماسەلەلەرى بويىنشا ەسكىرگەن قۇرىلىس نورمالارى مەن ەرەجەلەرىن الىپ تاستاۋ جوسپاردا بار. 2019 جىلدىڭ سوڭىنا دەيىن ەۋروكود جۇيەسىنە تولىق اۋىسۋ كوزدەلىپ وتىر.
ءباسپاسوز ءماسليحاتىنان كەيىن جۋرناليستەردىڭ ساۋالدارىنا جاۋاپ بەرگەن مارحابات جايىمبەتوۆ بيىل الەۋمەتتىك جاعىنان از قامتىلعان ازاماتتار ءۇشىن ارەندالىق باسپانا سالۋعا 25 ميلليارد تەڭگە بولىنگەنىن ايتتى. «نۇرلى جەر» باعدارلاماسى اياسىندا بولىنگەن سوما 1,5 ميلليارد تەڭگەدەن ءاربىر وڭىرگە تاراتىلىپ بەرىلدى. بۇل – ءاربىر وبلىستا 180 پاتەر سالىنادى دەگەن ءسوز.
اسحات رايقۇل,
«ەگەمەن قازاقستان»
