«ەل ءىشى – ونەر كەنىشى» دەپ حالقىمىز ايتقانداي, بۇگىنگى ەل ىشىندە دە ەرەكشە تالانتىمەن تالايدى تامساندىرىپ جۇرگەندەر بارشىلىق. تۋعان جەر توسىندەگى تالانتتاردى ەلگە تانىتۋ, حالىققا ناسيحاتتاۋ ونەردىڭ باستى مىندەتى.
تاراز قالاسىنداعى «بالاساعۇن» ورتالىق كونتسەرت زالىندا وبلىستىق مادەنيەت, ارحيۆتەر جانە قۇجاتتاما باسقارماسىنىڭ جانە جەرگىلىكتى فيلارمونيانىڭ ۇيىمداستىرۋىمەن «جاڭارعان جامبىلىم» اتتى ءى رەسپۋبليكالىق ەسترادا انشىلەرىنىڭ كونكۋرسى ءوتتى. قازىلار القاسىنىڭ قاتىسۋىمەن وتكەن ءباسپاسوز ءماسليحاتىنان سوڭ باستالعان كونكۋرستىڭ اشىلۋ سالتاناتىندا باسقارما باسشىسى دۇيسەنالى بىقىباەۆ ءسوز سويلەپ, تالاپكەرلەرگە ءسات-ساپار تىلەدى.
جالپى, اتالعان كونكۋرسقا قاتىسۋعا ەلىمىزدىڭ ءار وڭىرىنەن 70-كە جۋىق ونەرپاز ءوتىنىش بىلدىرگەن ەكەن. الايدا سىننان وتكەن 33 تالاپكەر عانا كونكۋرسقا قاتىسۋعا مۇمكىندىك الىپتى. ەلىمىزدىڭ استانا, الماتى, اقتوبە, ورال, سەمەي, وسكەمەن, كوكشەتاۋ, قاراعاندى, بالقاش, قىزىلوردا, تۇركىستان, شىمكەنت جانە تاراز قالالارىنان, جامبىل وبلىسىنان, سونداي-اق قىرعىز رەسپۋبليكاسىنان كەلگەن ونەرپازدار اۋليەاتا تورىندە ءوز ونەرلەرىن كورسەتتى.
جەرگىلىكتى كومپوزيتورلاردىڭ اندەرىن شىرقاپ, حالىققا ناسيحاتتادى. ال ۇمىتكەرلەرگە لايىقتى باعاسىن بەرۋ ءۇشىن قازاقستان رەسپۋبليكاسىنىڭ حالىق ءارتىسى التىنبەك قورازباەۆ, قازاقستاننىڭ ەڭبەك سىڭىرگەن ءارتىسى باعدات سامەدينوۆا, قازاقستاننىڭ ەڭبەك سىڭىرگەن قايراتكەرى مەيرامبەك بەسپاەۆ جانە وزگە دە بەلگىلى ونەرپازدار كونكۋرسقا ارنايى قاتىسىپ, قازىلىق جاسادى.
كونكۋرستىڭ باس جۇلدەسىن تارازدىق مەيىرجان سامىلتىروۆ جەڭىپ السا, جۇلدەلى ءى ورىندى تارازدىق اقەركە قۇربان مەن قاراعاندىلىق گۇلنار كوشەنوۆا يەلەندى.
سونداي-اق ءىى ورىن تارازدىق بالدات بەيسەقوجا مەن جامبىلدىق قازبەك ابۋگە بۇيىردى. ال ءىىى ورىنعا تارازدىق جاننا اسانقۇلوۆا, تالدىقورعاندىق حاليد ورىنقۇل مەن وسكەمەندىك ايكەرىم بيتانوۆا قول جەتكىزدى. «جاس تالانت» اتالىمىمەن تارازدىق بەرىك جورابەكوۆ, «جارقىن داۋىس» اتالىمىمەن وڭتۇستىك قازاقستان وبلىسىنان كەلگەن نۇرسۇلتان بايگۋنوۆ, «جاڭا ەسىم» اتالىمىمەن تارازدىق دارحان قابىل جانە «كورەرمەندەر كوزايىمى» اتالىمىمەن استانالىق ايدوس ەرگەش ماراپاتتالدى. جەڭىمپازدار مەن جۇلدەگەرلەرگە قارجىلاي سىيلىقتار تابىستالسا, قالعان 21 ونەرپازعا دا العىس حاتتار مەن قارجىلاي سىياقىلار بەرىلدى.
مادەني شارا سوڭى «ريزامىن تۋعان حالقىما!» اتتى قايىرىمدىلىق كونتسەرتىنە ۇلاستى. ساحنا تورىندە التىنبەك قورازباەۆ, باعدات سامەدينوۆا, «تاراز» تريوسى جانە جەڭىمپازدار مەن جۇلدەگەرلەر ءان شىرقادى. ال كونتسەرتتەن تۇسكەن قاراجات «دۋلات بابا» قايىرىمدىلىق قورىنا اۋدارىلاتىن بولادى. سونداي-اق كونتسەرتكە كەلگەن كوپشىلىك وبلىستىق مۋزەيدىڭ ۇيىمداستىرعان «كونە تاراز شاقىرادى» كورمەسىمەن دە تانىستى.
حاميت ەسامان,
«ەگەمەن قازاقستان»
جامبىل وبلىسى
