اتىس ناتيجەسىندە پوليتسەيلەردىڭ ءبىرى قازا تاپسا, تاعى ەكەۋى جارالاندى. ال شابۋىل شاساۋشى لاڭكەستىڭ ءوزى سول جەردە جارالى پوليتسەي قولىنان قازا تاپتى. قازاقستاندا تىيىم سالىنعان "دايش" تەررورلىق ۇيىمى لاڭكەستىك ارەكەتتى ءوز مويىندارىنا الىپ وتىر. شابۋىل جاساعان ادام بۇرىن دا راديكال-يسلاميست رەتىندە ءتارتىپ ساقشىلارىنىڭ كوزىنە تۇسكەن ەكەن.
پاريج پروكۋرورى فرانسۋا مولەننىڭ ايتۋىنشا, لاڭكەستىڭ كىم ەكەنى انىقتالدى. دەگەنمەن, ونىڭ سىبايلىستارىنىڭ بار-جوعى انىقتالمايىنشا, ناقتى اتى-ءجونى جاريالانبايدى.
ءتارتىپ ساقشىلارى لاڭكەستىڭ ءپاريجدىڭ شەتىندە تۇرعان ۇيىنە ءتىنتۋ جاساپ, تەررورلىق ارەكەتتىڭ جاسالاتىنىن تاعى كىمدەردىڭ بىلگەن بولۋى مۇمكىن ەكەنىن تەكسەرۋدە.
دايش-تىڭ تاراتقان مالىمدەمەسىندە لاڭكەستىڭ بەلگيالىق ءابۋ-ءجۇسىپ ەكەنى ايتىلادى.
ال فرانتسيالىق BFMTV تەلەارناسىنىڭ اقپاراتىنشا, لاڭكەس 39 جاسار فرانتسيا تۇرعىنى. شابۋىل جاساماس بۇرىن ول Telegram جەلىسى ارقىلى ءوزىنىڭ نيەتىن جاريالاعان.
رەسمي دەرەككوزدىڭ مالىمەتىنە سۇيەنسەك, لاڭكەستىڭ تاستاپ كەتكەن كولىگىنەن ونىڭ قۇجاتتارى تابىلعان. بىراق ناقتى مالىمەت ازىرگە بەرىلمەيدى.
ارنايى قىزمەتتىڭ تاراتقان مالىمەتىنشە, لاڭكەس 2005 جىلى دا ەكى پوليتسەيگە شابۋىل جاساپ, ءۇش باپ بويىنشا ايىپتالعان.
فرانتسيا پرەزيدەنتى فرانسۋا وللاند بۇل وقيعانىڭ تەررورلىق ارەكەت ەكەنىن ايتتى.
كۋاگەرلەر لاڭكەستىڭ كالاشنيكوۆ قارۋىمەن اتقانىن كورگەن.
ءبىر پوليتسەيدى ولتىرگەننەن كەيىن لاڭكەس قاشۋعا ارەكەتتەنىپ ءجۇرىپ تاعى ەكى ءتارتىپ ساقشىسى مەن كەزدەيسوق ءوتىپ بارا جاتقان ءبىر ادامدى جارالاپ, اقىرىندا جارالانعان پوليتسيا قىزمەتكەرىنىڭ قولىنان قازا تاپتى.
BBC-ءدىڭ حابارلاۋىنشا, ەليسەي الاڭى لاڭكەستىك ارەكەتتەر ۇيىمداستىرىلۋ مۇمكىندىگى جوعارى جەرلەردىڭ ءبىرى. ويتكەنى, بۇل جەردە ءبىر مەزگىلدە جۇزدەگەن قالا تۇرعىندارى مەن تۋريستەر سەرۋەندەيدى.
ەستەرىڭىزگە سالا كەتەيىك, الداعى جەكسەنبىدە فرانتسيادا پرەزيدەنتتىك سايلاۋدىڭ ءبىرىنشى كەزەڭى وتپەك.
بۇل جولعى پرەزيدەنتتىك سايلاۋدا فرانتسيا مەملەكەت باسشىلىعىنان ۇمىتكەرلەردىڭ بارلىعىنىڭ سايلاۋالدى باعدارلامالارىندا راديكالدى يسلام قاۋپىنەن ساقتانۋعا باسىمدىلىق بەرىلگەن. فرانس پرەسس اگەنتتىگىنىڭ مالىمەتىنشە, 2015 جىلدان بەرى فرانتسيادا راديكالدى يسلام لاڭكەستەرىنىڭ قولىنان 238 ادام قازا تاپقان. ال سوڭعى ەكى جىلدا بۇل ەلدە تەررورلىق ارەكەتتەر ءتىپتى كوبەيىپ كەتكەن.
