تاقىرىپقا قاتىستى ارنايى باياندامانى ش.شاياحمەتوۆ اتىنداعى تىلدەردى دامىتۋدىڭ ۇيلەستىرۋ-ادىستەمەلىك ورتالىعىنىڭ ديرەكتورى ەربول تىلەشوۆ جاسادى. ول تىلدەردى دامىتۋ جانە قوعامدىق-ساياسي جۇمىس كوميتەتىنىڭ مەملەكەتتىك تاپسىرىسىمەن وتكەن جىلى ىسكە قوسىلعان «ءتىل الەمى» پورتالى مەن «Emle.kz», «Termincom.kz», «Atau.kz» سىندى سايتتاردىڭ بۇگىنگى قىزمەتى مەن تەحنيكالىق جەتىلدىرۋ جايى, قوعامعا تيگىزىپ جاتقان پايداسى تۋرالى ايتىپ, الەۋمەتتىڭ پىكىرىن اڭگىمەگە ارقاۋ ەتتى.
سونداي-اق, تالقىلاۋ بارىسىندا ءسوز العاندار لاتىن الىپبيىنە كوشۋ جايىن قوزعاعاندا, ماسەلەنى اسىرا ساياسيلاندىرۋدىڭ قاجەت ەمەستىگىن تۇسىنۋگە شاقىردى. سونىمەن قاتار, ءالىپبي اۋىستىرۋ ارەكەتىندە الىس-جاقىن كورشى ەلدەردىڭ تاجىريبەسى دە مۇقيات زەرتتەلىپ, زەردەلەنۋ قاجەتتىگى اتاپ كورسەتىلدى.
«بارىنە ۋاقىت تورەشى. وزبەكستان مەن تۇرىكمەنستان, ازەربايجان ەلدەرىنىڭ ءجۇرىپ وتكەن جولىن سارالاۋ ءبىز ءۇشىن وتە ماڭىزدى. ماسەلەن, لاتىنعا كوشكەن وزبەك اعايىندار 24 جىل ىشىندە نەلىكتەن 3 رەت رەفورما جۇرگىزۋگە ءماجبۇر بولدى. وسىنداي جاعدايلار ءبىزدى تەرەڭ ويلانۋعا جەتەلەيدى», – دەدى س.ابدراحمانوۆ.
بايانداماشى تانىستىرعان سايتتار وقىرماندار يگىلىگىنە اينالىپ وتىرعانىن اتاپ وتكەن دەپۋتات انار جايىلعانوۆا بايانداماشى تانىستىرعان جوبالار, اسىرەسە, شەتەلدەگى قازاقتار ءۇشىن قولايلى بولاتىنىن تىلگە تيەك ەتتى. «اسىرەسە, قازاق ءتىلىنىڭ قۇرىلىمى مەن قۇندىلىعىن تانىپ, بىلۋدە شەتەل قازاقتارى «Emle.kz» سايتىن كەڭىنەن پايدالانىپ وتىر ەكەن. مۇنداي جوبالار ەلباسىنىڭ كۇنى كەشە عانا جاريالاعان ماقالاسىن تۇششىنىپ وقۋ ءۇشىن دە وراسان زور مۇمكىندىكتەر بەرۋدە», – دەدى ول.
سونىمەن قاتار, ءالىپبي اۋىستىرۋ ماسەلەسىندە ەرتەرەكتە قولدانىستا بولعان لاتىن تاڭباسىنا نەگىزدەلىپ جاسالعان الىپبيلەرىمىز دە نازاردان تىس قالماسا دەگەن تىلەكتەر ايتىلدى. اتاپ ايتقاندا, دەپۋتات شايماردان نۇرىموۆ قولدانىستا بولماسا دا, وسى كەزگە دەيىن قۇراستىرىلعان الىپبيلەردىڭ ءبىر-ەكى تاڭباسىنان وزگەسى ماسەلەنى ەش كۇردەلەندىرمەيتىندىگىنە توقتالدى.
وتىرىس سوڭىنا قاراي قاتىسۋشىلار ۇسىنىس, پىكىرلەرىن بىلدىرە كەلىپ, مەملەكەت باسشىسى اتاپ كورسەتكەن لاتىن الىپبيىنە كوشۋدى تولىق قولدايتىنىن اتاپ ءوتتى. يگىلىگى مول مۇنداي باستاماعا قوعامدى جاپپاي جۇمىلدىرىپ, ءتۇرلى ۇلت پەن ۇلىستىڭ وكىلدەرىن ۇتىمدى ىسكە ۇيىتۋدا قازاقستان حالقى اسسامبلەياسىنىڭ باعىت-باعدارلارى ناقتىلاندى.
نۇرلىبەك دوسىباي,
«ەگەمەن قازاقستان»
