جالپى, سپورت دەگەن سيقىرلى الەم ارباعان جۇرتتىڭ قاراسى كوپ. ميللياردتار دەسەك قاتەلەسۋىمىز نەعايبىل. سونىڭ ىشىندە ميلليونداردىڭ سۇيىكتى ويىنى فۋتبولدىڭ ءجونى بولەك. الا دوبىڭىز جۇمىر جەردى اينالا ۇشىپ جۇرگەلى قاشان..؟ ءتىپتى بار عوي, دۇنيە «رەالفان» جانە «بارسافان» بولىپ قاققا بولىنگەندەي...
ءيا, فۋتبولىڭىز بۇگىندە بيزنەستىڭ قاينار كوزىنە اينالعان. وراسان زور قارجى جۇرگەن جەردى ساياساتتىڭ دا توڭىرەكتەيتىنى بەلگىلى. البەتتە, الەمدىك سپورت قاۋىمداستىعى بۇل سالاعا ساياساتتىڭ سىنالاپ كىرگەنىن جاقتىرا قويمايدى, وعان اسا ساقتىقپەن قارايدى دا. مۇنداي ۇلىق ۇستانىمدى وركەنيەت كوشىنە ىلەسكەن ءبىزدىڭ ەل دە قوس قولداپ قولدايدى, ارينە.
دەگەنمەن, ءبىزدىڭ جاعدايدا وسى فۋتبولعا قاتىستى قابىرعامىزعا شانشۋداي قادالىپ جۇرگەن ءبىر جايت بار. توق ەتەرىن ايتقاندا, اڭگىمە تىلىمىزگە كەلىپ تىرەلەدى. تاۋەلسىزدىك العانىمىزعا شيرەك عاسىردان اسسا دا, پرەمەر-ليگامىزداعى كەيبىر فۋتبول كلۋبتارىنىڭ اتاۋى ورىسشا اتالىپ ءھام جازىلىپ كەلەدى. وكىنىشتىسى سول, قازاقتىڭ ورىمدەي جاستارى بۇل كۇندە ءتىلىن بۇراپ: «يرتىش», «توبول» دەپ ءجۇر... و, توبا دەمەسكە لاج جوق.
ماسەلەن, پاۆلوداردىڭ فۋتبول كلۋبىن «ەرتىس» دەپ ايتساق, ءورىستىلدى وقىرمان يت كورگەن ەشكى كوزدەنىپ شىعا كەلەدى-اۋ دەپ ويلايمىز. ويتپەگەندە شە, ولاردىڭ ۇعىمىندا پاۆلوداردىڭ نامىسىن جالعىز عانا «يرتىش» دەگەن كوماندا قورعايدى ەمەس پە؟!
بۇل ءوزى ەلىمىزدە شىعىس قازاقستان جانە پاۆلودار وبلىستارى ارقىلى اعاتىن ەرتىس وزەنىنىڭ اتاۋىن يەمدەنگەن كوماندا عوي. ەرتىس اعىپ جاتىر, ال ءبىزدىڭ فۋتبولدىڭ باسى-قاسىندا وتىرعاندار قاسيەتتى اتاۋدىڭ ىرىڭ-جىرىڭىن شىعارىپ جاتقاندا نەعىپ وتىر دەگىڭ-اق كەلەدى. بازبىرەۋلەر «ەرتىس» ءسوزىن ءورىستىلدى وقىرمان جەتىستىرىپ ايتا المايدى دەگەندى ءۋاج ەتەرىن سەزەمىز. باياعىدا «الما-اتا»-نى ايتقاندا دا, ءتىپتى بەرتىنگە دەيىن دە بۇل اعايىننىڭ ءتىلى بۇرالاتىن. بىراق, بۇرالعان ءتىل قازىر تۇزەلىپ كەلەدى ەمەس پە؟ «كوش جۇرە تۇزەلەدى» دەگەندەي. سول سياقتى «ەرتىس» دەگەن جازۋعا ەڭ الدىمەن كوز ۇيرەنۋى كەرەك. مىسالى, كوماندا تاڭباسىنداعى «يرتىش» دەگەن ءسوز «ەرتىس» بولىپ وزگەرگەنى ءلازىم. ورىسشا ماتىندە بۇل اتاۋدىڭ «ەرتىس» بولىپ جازىلۋىن ءتىل زاڭدىلىعىنا سۇيەنىپ قاداعالاۋعا دا قاقىمىز بار. سويتە-سويتە, كوز ۇيرەنگەن سوڭ ءتىل دە قانشا قينالعانىمەن كوندىگىپ كەتەدى دەگەن ويدامىز.
«يرتىش»-تان «توبول» دەگەن دە قالىسپاي-اق كەلەدى. بۇل دا ەرتىسكە بارىپ قۇياتىن وزەننىڭ اتاۋىنان الىنعان. جالعىز عانا قارىپ قاسارىسىپ, تۋعان تىلگە قىر كورسەتىپ تۇرعانداي.
بۇلارعا قاراعاندا «اكتوبە», «اكجايىك», «كايرات» دەپ, «ق» ءارپىنىڭ ارتىق جەرىن شاۋىپ تاستاپ جازىپ جۇرگەندەرى ايت پەن تويداي ەكەن-اۋ.
ەندى دەيمىز, سىرەسىپ جاتقان بۇل ماسەلەنىڭ توڭىن ءجىبىتىپ, بىرجاقتى ەتىپ شەشۋگە مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى, قازاقستان فۋتبول فەدەراتسياسى, وبلىس اكىمدىكتەرى جۇمىلا اتسالىسپاسا بولمايىن دەپ تۇر.
«دوپ تەپكەن – توزار» دەگەننىڭ كۇنى وتكەن. فۋتبول ارقىلى مىڭداعان جاستىڭ ساناسىندا جاقسى ماعىناسىنداعى توڭكەرىس جاساۋعا بولادى. وسى ويىنمەن بايلانىسقان جاقسىلىق اتاۋلى, مىسالى سالاماتتى ءومىر سالتىنا دەگەن جاعىمدى كوزقاراس جاس ۇرپاقتىڭ ساناسىنا ىركىلىسسىز سىڭسە دەيسىڭ. ال ەندى, جوعارىدا ءبىز ايتقان كەمشىلىكتەر مەن ولقىلىقتاردى سىلىپ الىپ تاستاۋ, ياعني بۇراڭداعاندى ورنىنا قويۋ, بۇرالاڭدى تۇزەۋ قوعامنىڭ جانە دە جاۋاپتى مەكەمەلەردىڭ مۇباراك مىندەتى بولسا كەرەك!
قايرات ءابىلدينوۆ,
«ەگەمەن قازاقستان».
