بۇگىن بەيبىت شۇمەنوۆتىڭ قانداي جاراقات العانى جانە قانشالىقتى كۇردەلى ەكەنى انىقتالدى. بوكسشىنىڭ مەنەدجەرى حابارلاعانداي, بەيبىت سپاررينگ-جاتتىعۋ كەزىندە وڭ كوزىنەن اۋىر جاراقات العان.
"وكىنىشكە وراي, بەيبىت الداعى كەزدەسۋدى وتكىزە المايدى. سپاررينگ كەزىندە وڭ كوزىنەن قاتتى جاراقات الدى. قولعاپتىڭ باس بارماعى كوزىنە ءتيىپ كەتىپ, زاقىم كەلتىردى" دەدى ونىڭ پروموۋتەرى شىڭعىس شۇمەنوۆ.
جەرگىلىكتى دارىگەرلەر وتانداسىمىزدىڭ قاراشىعىنا تيگەن زارداپتى انىقتاپ, دەر كەزىندە وپەراتسيا جاساعان. الدىنا-الا بولجام بويىنشا, بەيبىت شۇمەنوۆتىڭ بۇل وپەراتسيادان كەيىن قالپىنا كەلۋى ءۇشىن شامامەن 2-3 اي ۋاقىت قاجەت بولادى. قازىر ول اۋرۋحانادا ەمەس, لاس-ۆەگاستاعى ۇيىندە ەمدەلۋدە.
بۇل بەيبىتتىڭ سوڭعى 2 جىلدا جەكپە-جەك الدىندا العان ءۇشىنشى جاراقاتى. ول بۇعان دەيىن 2015 جىلىدىڭ ماۋسىم ايىندا بي دج فلورەسكە قارسى كەزدەسۋ بەيبىتتىڭ جاراقات الۋ سەبەبىنەن 1 اي كەيىنگە شەگەرىلگەن ەدى. ال, ەكىنشى جاراقاتىن بەيبىت ءدال سول جىلدىڭ سوڭىندا, ياعني جەلتوقسان ايىندا الەمنىڭ ەكس-چەمپيونى بولعان پولشالىق كشيشتوف ۆلودارچيككە قارسى جەكپە-جەك قارساڭىندا الىپ, كەزدەسۋ وتكىزىلمەگەن ەدى. كەشە شۇمەنوۆتىڭ ءۇشىنشى جاراقاتى تۋرالى باق بەتتەرىندە حابارلاندى.
بەيبىت شۇمەنوۆتىڭ ىلعي جەكپە-جەك الدىندا جاراقات الاتىنىن ەسكەرگەن قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكو بوكسشىعا قازاقستاندىق جاس بىلعارى قولعاپ شەبەرلەرىنە پروموۋتەر بولۋدى ۇسىندى.
— سوڭعى ۋاقىتتا بەيبىتتىڭ جاراقات الۋى تىم جيىلەپ كەتتى. سوندىقتان, مەن وعان باسقا كاسىپپەن اينالىسۋدى, ونىڭ ىشىندە, پروموۋتەر بولۋدى ۇسىنامىن. مۇمكىن, وسى كاسىپتە شۇمەنوۆتىڭ جولى بولىپ قالار. ول كاسىپقوي بوكستا ءبىراز تاجىريبە جيناقتادى عوي, سوندىقتان, وعان پروموۋتەرلىك قيىنعا سوعا قويماس. ەلىمىزدە تالاناتتى جاس بوكسشىلار وتە كوپ, سولارعا پروموۋتەرلىك جاساپ, اقش-تا وزدەرىن كورسەتۋگە مۇمكىندىك جاساسا» دەيدى ۆ.دەميانەنكو.
ايتا كەتەيىك, شۇمەنوۆتىڭ جاراقاتىنا بايلانىستى 30 ءساۋىر كۇنى لاس-ۆەگاستا كۋبالىق يۋنيەر دورتيكوسكە قارسى بولاتىن جەكپە-جەك وتپەيتىن بولدى. شۇمەنوۆ-دورتيكوس جەكپە-جەگى وسىمەن ەكىنشى رەت توقتاتىتىلعانىندا ايتا كەتكەن ءجون. ەڭ العاش قوس بوكسشى اراسىنداعى كەزدەسۋ بيىل 11 اقپاندا ءوتۋ كەرەك بولاتىن. الايدا, Caribe Promotions كومپانياسى جەكپە-جەكتى ۇيىمداستىرۋ قۇقىعىنان ايىرىلىپ, كەزدەسۋدى ۇيىمداستىرا الماي قالعان ەدى. سونان سوڭ, بۇل جەكپە-جەك وتكىزۋ قۇقىعىن توم براۋننىڭ TGB Promotions يەلەنىپ, ءبىرىنشى اۋىر سالماقتاعى WBA نۇسقاسى بويىنشا الەم چەمپيونى تيتۋلىنا ارنالعان جەكپە-جەك 30 ساۋىرگە جوسپارلانعان ەدى.
ءالي بيتورە,
«ەگەمەن قازاقستان»
