ءىس-شاراعا پارلامەنت دەپۋتاتتارى, مەملەكەتتىك ورگاندار مەن قوعامدىق ۇيىمداردىڭ وكىلدەرى جانە «بولاشاق» باعدارلاماسىنىڭ تۇلەكتەرى قاتىستى. جيىن بارىسىندا مەملەكەت باسشىسىنىڭ ماقالاسىندا كورسەتىلگەن ءبىلىم بەرۋ ساپاسىن ارتتىرۋ, جاستارمەن جۇمىس, رۋحاني قۇندىلىقتاردى ساقتاۋ, قازاق ءتىلىن لاتىن الىپبيىنە كوشىرۋ جانە باسقا دا ماسەلەلەر تالقىلاندى. جيىنعا پارلامەنت ءماجىلىسىنىڭ دەپۋتاتى, «بولاشاق» قاۋىمداستىعى كەڭەسى توراعاسىنىڭ مىندەتىن اتقارۋشى باقتيار ماكەن مودەراتورلىق ەتتى.
العاشقى بولىپ ءسوز العان پارلامەنت ءماجىلىسىنىڭ دەپۋتاتى, وليمپيادا چەمپيونى سەرىك ساپيەۆ مەملەكەت باسشىسىنىڭ بارلىق باستامالارىن تولىق قولدايتىنىن ايتا كەلىپ, قاي كەزدە دە سالاماتتى ءومىر سالتىنىڭ ورنى بولەك ەكەنىنە توقتالدى. «ەڭ باستىسى, ەلباسىمىز كەزەكتى رەت سالاماتتى ءومىر سالتىنىڭ ماڭىزدىلىعىن جانە قاجەتتىلىگىن اتاپ وتىر, – دەدى ول وسى ءجونىندە. – ءححى عاسىردا دەنى ساۋ ۇلت قانا باسەكەلەستىككە قابىلەتتى بولا الادى. پرەزيدەنتىمىزدىڭ «تۋعان جەر» باعدارلاماسىن ازىرلەۋ, سونداي-اق, «قازاقستاننىڭ قاسيەتتى رۋحاني قۇندىلىقتارى», «قازاقستانداعى 100 جاڭا ەسىم», «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوبالارىن جۇزەگە اسىرۋعا قاتىستى ۇسىنىستارىنا تولىق قولداۋ بىلدىرەمىز».
ال ۇلتتىق سانانى جاڭعىرتۋ ادامدى دامىتۋدىڭ ماڭىزدى قادامى. «ەلىمىزدە تاريحي ەسكەرتكىشتەر وتە كوپ, – دەدى ول ءسوزىنىڭ سوڭىندا. – بىراق, ولار الەمدىك دەڭگەيدە كەڭىنەن ناسيحاتتالماي جاتىر. سوندىقتان قازاقستاننىڭ ءيميدجىن كوتەرىپ, حالىقارالىق ارەنادا مارتەبەسىن ارتتىرۋ ءۇشىن ەگەمەن ەلىمىزدىڭ تاريحي جانە مادەني مۇرالارىن تانىستىرۋعا ۇمتىلۋىمىز قاجەت».
ال «حالىقارالىق باعدارلامالار ورتالىعى» اق پرەزيدەنتى جانبولات مەلدەشوۆ ەلىمىزدىڭ ايماقتارىندا بولاشاقتىقتاردىڭ جاسىل ساياباعىن سالۋدى ۇسىندى. «ەلىمىزدىڭ ءار ايماعىندا اعاش وتىرعىزىپ, بولاشاقتىقتاردىڭ باعىن جابدىقتاۋدى ۇسىنامىن, – دەدى ول. – ونىڭ بارلىعى ءوزىمىزدىڭ قاراجات ەسەبىنەن جۇزەگە اسىرىلادى. بۇل ساياباقتارعا اتا-انالارىمىز, اعا-اپكەلەرىمىز كەلىپ دەمالادى. ويتكەنى, «بولاشاق» باعدارلاماسى بويىنشا شەت ەلدىڭ وقۋ ورىندارىندا ءبىلىم العان بىزدەر مەملەكەت پەن حالىقتىڭ ەسەبىنەن وقىدىق». سونداي-اق, ول پرەزيدەنتىڭ «بولاشاق» باعدارلاماسىمەن شەت ەلدەردە ءبىلىم الىپ, ەلگە ورالعان بولاشاقتىقتار بالالار مەن جاستارعا ۇلگى كورسەتۋى قاجەت ەكەنىن دە ورتاعا سالدى. «جاقسى ءبىلىم ومىردە تابىسقا جەتكىزەتىنىن ولار بىزدەر ارقىلى بىلەتىن بولادى», – دەدى ج.مەلدەشوۆ.
كونفەرەنتسيادا «قازاقستان-2050» جالپىۇلتتىق قوزعالىسى كەڭەسىنىڭ توراعاسى مۇحتار مانكەەۆ, ءبىلىم جانە عىلىم مينيسترلىگى جوعارى وقۋدان كەيىنگى ءبىلىم بەرۋ جانە حالىقارالىق ارىپتەستىك دەپارتامەنتى ديرەكتورىنىڭ ورىنباسارى اقەركە ابىلايحان, تاعى باسقا دا «بولاشاق» باعدارلاماسىنىڭ تۇلەكتەرى ءسوز الىپ, ەلباسى ماقالاسىنىڭ ماڭىزى جانە ءمانى, ەرەكشەلىكتەرى جونىندە پىكىر ءبىلدىردى.
ءاليسۇلتان قۇلانباي,
«ەگەمەن قازاقستان»
