استانا قالاسىنىڭ اكىمى اسەت يسەكەشەۆ ەلورداداعى سۋ تاسقىنى قاۋپى تولىق باقىلاۋدا ەكەندىگىن مالىمدەدى.
شاھار باسشىسى قالا اكىمدىگىندە اۋىل شارۋاشىلىعى مينيسترلىگى سۋ رەسۋرستارى كوميتەتى وكىلدەرىنىڭ, ساتباەۆ اتىنداعى قالالىق كانال باسشىلىعى مەن باسقا دا ارنايى قىزمەت وكىلدەرىنىڭ قاتىسۋىمەن ارنايى ءباسپاسوز ءماسليحاتى وتكەنىن ەسكە الىپ, شارا اياسىندا ماماندار استانا سۋ قويماسىندا قالىپتاسقان جاعدايدى تۇسىندىرگەنىن تىلگە تيەك ەتتى.
تولاسسىز جاۋعان جاڭبىرعا بايلانىستى ەسىل وزەنىنە 13-15 ءساۋىر كۇندەرى 340 ملن تەكشە مەتر كولەمدە سۋ قوسىلعان. قازگيدرومەت ورتالىعىنىڭ ماماندارى 100-160 ملن تەكشە مەتر كولەمىندە سۋ كەلەدى دەپ بولجاعان بولاتىن. الايدا, كۇننىڭ كۇرت جىلىنۋىنا بايلانىستى قاردىڭ ەرۋى دە جىلدامداعان. وسى سەبەپتى, تاسقىن سۋ قورى كۇتكەن كولەمنەن مول بولعان.
قازىر استانا سۋ قويماسىنا كەلىپ جاتقان سۋدىڭ كولەمى سەكۋندىنا 150-200 تەكشە مەتردى قۇراپ وتىر. ونىڭ بارلىعىن سۋ قويماسىندا ساقتاپ قالۋ مۇمكىندىگى بار. جالپى, استانا سۋ قويماسىنىڭ سىيىمدىلىعى 410 ملن تەكشە مەتر بولسا, ول جەردە بۇگىندە 385 ميلليون تەكشە مەتر سۋ تولتىرىلعان. ياعني, تاعى 25 ملن تەكشە مەتر سۋ سىيىمدىلىعى بار دەگەن ءسوز. بۇگىندە جاعداي باقىلاۋدا. استانا قالاسىندا سۋ تاسقىنىنا قارسى جەدەل شتاب جۇمىس ىستەۋدە جانە ولار كەشەندى جوسپارىن, ءتيىستى جۇمىستارىن جۇزەگە اسىرۋدا.
نۇرلىبەك دوسىباي,
«ەگەمەن قازاقستان»
استانا
