بۇل پاۆيلوندا تمد مەملەكەتتەرىنىڭ ونەرىنىڭ وزىق ۇلگىلەرىن توپتاستىرعان «Garage» اتتى بۇگىنگى زامان ونەرى ورتالىعىنىڭ جانە «Grand Palais» اتتى فرانتسيا ۇلتتىق مۋزەيى بىرلەستىگىنىڭ جەتىستىكتەرى پاش ەتىلمەك. ول تۋرالى ەكسپو-نىڭ جاڭا مەديا ورتالىعىندا وسى ارت-ورتالىقتىڭ اشىلۋىنا ارنالعان تۇساۋكەسەردە «استانا ەكسپو-2017» كومپانياسىنىڭ كونتەنت جانە شارالار ۇيىمداستىرۋ دەپارتامەنتىنىڭ ديرەكتورى مارات وماروۆ باياندادى.
ەكسپو ارت-ورتالىعى ەكى قاباتتى عيماراتتان تۇرادى. مۇندا شارالار نەگىزىنەن – اعارتۋ جانە مادەنيەت باعىتى بويىنشا جۇرگىزىلەدى. ورتالىقتىڭ ءبىرىنشى قاباتىندا كينوزال, شىعارماشىلىق شەبەرحانالار, كورمە قويىلىمدارى, قازاقستاننىڭ 12 جاس سۋرەتشىسىنە ارنالعان «جاڭا مەديا» اتتى زەرتحانا جۇمىس ىستەيتىن بولادى. ەكىنشى قاباتتا «Grand Palais» اتتى فرانتسيا ۇلتتىق مۋزەيى بىرلەستىگى شەبەرلەرىنىڭ ونەر تۋىندىلارى ورنالاستىرىلماق.
«ارت-ورتالىقتىڭ ەكىنشى قاباتىندا 13 مەملەكەتتەن كەلگەن 17 سۋرەتشى وزدەرىنىڭ ونەرپاز روبوتتارىن كورسەتەدى. بۇل روبوتتار كورمەگە كەلۋشىلەردىڭ كوز الدىندا ءارتۇرلى اسپاپتار مەن نەشە ءتۇرلى ونەر تۋىندىلارىن جاسايتىن بولادى. ماسەلەن, بويى 4 مەترگە جەتەتىن كۋكا اتتى روبوت تۇتاس كەسەك تاستاردان كوز جاۋىن الاتىن نەشە ءتۇرلى مۇسىندەردى جاسايدى», دەدى دەپارتامەنت ديرەكتورى مارات وماروۆ ءوز سوزىندە.
ونىڭ ايتۋى بويىنشا, ەكسپو-2017 قالاشىعىنداعى ارت –ورتالىقتىڭ جۇمىسىن ءبىر ساعاتتا 400-گە جۋىق ادام تاماشالاۋعا ءتيىس. ءسويتىپ, استانادا كورمە جالاۋى جەلبىرەيتىن 93 كۇننىڭ ىشىندە بۇل ورتالىققا 432 مىڭ ادام كەلەدى دەپ كۇتىلۋدە. ورتالىق 4 جاستان اسقان بالالاردان باستاپ ەرەسەكتەرگە دەيىنگى كورەرمەندەردىڭ سۇرانىسىن تولىق قاناعاتتاندىرۋدى جوسپارلاپ وتىر.
الەم جۇرتشىلىعى 2019 جىلى عانا تانىسۋعا ءمۇمكىندىك الاتىن روبوتتار ەكسپو-2017 كورمەسىنىڭ اياسىندا وسى ارت-ورتالىققا كەلۋشىلەرگە العاش تانىستىرىلادى.
جىلقىباي جاعىپار ۇلى,
«ەگەمەن قازاقستان»
