پارلامەنتشىلەر ايماقتاعى ورتا ءبىلىم بەرۋدىڭ جاعدايىمەن, وزەكتى ماسەلەلەرىمەن جانە دامۋ كەلەشەگىمەن تانىسىپ, ەڭبەك ۇجىمدارىمەن, جالپى ءبىلىم بەرۋ, شاعىن جابدىقتالعان جانە ارناۋلى مەكتەپتەر مەن ليتسەيلەردىڭ ۇستازدارىمەن, اتا-انالار كوميتەتتەرىنىڭ وكىلدەرىمەن جانە وقۋشىلارىمەن كەزدەستى.
قازاق تىلىندە جالپى ءبىلىم بەرەتىن №25 ورتا مەكتەپتە وبلىس ورتالىعىنىڭ ۇستازدار قاۋىمىمەن كەزدەسۋ بولدى. شارادا 12 جىلدىق ءبىلىم بەرۋ باعدارلاماسىن ەنگىزۋ, بالالاردى ءۇش تىلدە وقىتۋ, ولاردى ساپالى وقۋلىقتارمەن قامتاماسىز ەتۋ ماسەلەلەرىنە ەرەكشە نازار اۋدارىلدى. جۇزدەسۋدە ەلىمىزدەگى جانە ايماقتاعى ءبىلىم بەرۋ جۇيەسىنىڭ الدىندا تۇرعان وزەكتى ماسەلەلەر كوتەرىلدى. جەرگىلىكتى تۇرعىندار مەن ۇستازدار دەپۋتاتتاردان ءۇش اۋىسىمدا وقىتۋ ماسەلەلەرىن شەشۋگە, الىس ەلدى مەكەندەردە تۇراتىن بالالاردى مەكتەپكە تاسىپ اكەلۋدى قامتاماسىز ەتۋگە ىقپال ەتۋدى سۇرادى. شاعىن جابدىقتالعان مەكتەپتەردىڭ تاعدىرى, ۇستازداردىڭ ەڭبەكاقىسى, «ءبىلىم بەرۋ تۋرالى» زاڭدى ىسكە اسىرۋعا بايلانىستى الاڭداۋشىلىقتارىن جەتكىزدى. مۇعالىمدەردىڭ ساۋالدارىنا ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا جاۋاپ بەردى.
ساپار بارىسىندا دەپۋتاتتار اۋتيست بالالار مەن اقىل-وي دەرتىنە شالدىققان بالالارعا ارنالعان «التىن باتا» بەيىمدەۋ ورتالىعىنا دا باردى.
17 ساۋىردە سەناتورلار پاۆلودار مەملەكەتتىك پەداگوگيكالىق ينستيتۋتىنىڭ جۇمىسىمەن تانىستى. مەيماندارعا عىلىمي-تەحنيكالىق جاڭالىقتار جانە ولاردىڭ وندىرىسكە ەنگىزىلگەن نۇسقالارى كورسەتىلدى.
پروفەسسورلىق-وقىتۋشىلار قۇرامى الدىندا سويلەگەن سوزىندە سەناتور ب.ءايتىموۆا ءبىلىم بەرۋ مەن عىلىمدى ۇيلەستىرگەن جوعارى وقۋ ورىندارى پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعانداي, رۋحاني جاڭعىرۋدىڭ الدىڭعى شەبىندە بولۋى ءتيىس ەكەنىن اتاپ ءوتتى.
ب.ءايتىموۆا مەملەكەت باسشىسى العا قويعان ماقساتتارعا قول جەتكىزۋ تۋرالى ءوز ويلارىن ورتاعا سالدى. اتاپ ايتقاندا, اسىرەسە جاستاردا ۇلتتىق سانا-سەزىمنىڭ جاڭا نەگىزدەرىن قالىپتاستىرۋ, الەمنىڭ 100 وقۋلىعىن قازاق تىلىنە اۋدارۋ تۋرالى اڭگىمە قوزعالدى. سەناتور رۋحاني جاڭعىرۋداعى باسەكەگە قابىلەتتىلىك, پراگماتيزم, ۇلتتىق بىرەگەيلىكتى ساقتاۋ, ءبىلىمنىڭ سالتانات قۇرۋى, دامۋدىڭ ەۆوليۋتسيالىق جولى, سانا اشىقتىعى سەكىلدى ماقساتتارعا قول جەتكىزۋدىڭ ماڭىزىنا نازار اۋداردى. شاراعا قاتىسۋشىلار مەملەكەت باسشىسى بەلگىلەگەن مەجەلەر بارشا حالىقتان, ەڭ الدىمەن, ءبىلىم بەرۋ جۇيەسىنەن زور كۇش-جىگەردى تالاپ ەتەتىنى تۋرالى ورتاق پىكىرگە كەلدى.
ساپارعا سەناتورلار ءالي بەكتاەۆ, جابال ەرعاليەۆ, نۇرلان قىلىشباەۆ, تولەۋبەك مۇقاشەۆ, ۆلاديمير رەدكوكاشين قاتىسۋدا. 18 ساۋىردە پارلامەنتشىلەر اقسۋ مەن ەكىباستۇز قالالارىندا, اقتوعاي, قاشىر, لەبياجى, پاۆلودار, ۋسپەن, شارباقتى اۋداندارىندا ۇستازدار قاۋىمىمەن كەزدەسەدى.
وبلىسقا ساپاردىڭ قورىتىندىلارى سەناتتىڭ الەۋمەتتىك-مادەني دامۋ جانە عىلىم كوميتەتىنىڭ 19 ساۋىردە پاۆلوداردا وتەتىن كوشپەلى وتىرىسىندا قارالاتىن بولدى.
