قۇجاتتى «قازاقپارات» اگەنتتىگىنىڭ باس ديرەكتورى اسقار وماروۆ پەن تۇرىكمەنستان مەملەكەتتىك اقپارات اگەنتتىگىنىڭ ءتوراعاسى بەكدۋردى امانسارىەۆ ءراسىمدەدى. اسقار وماروۆ ءوز ءسوزىندە كەلىسىمشارتقا تۇرىكمەنستان پرەزيدەنتى گۋربانگۋلى بەردىمۇحامەدوۆتىڭ قازاقستانعا مەملەكەتتىك ساپارى اياسىندا قول قويىلىپ وتىرعانىن ايتتى.
«كەلىسىمنىڭ نەگىزگى باعىتى باۋىرلاس ەكى ەلدىڭ اراسىنداعى بايلانىستاردى نىعايتىپ, جاڭالىقتارمەن ءبولىسۋ بولماق. ءوزدەرىڭىز دە بىلەسىزدەر, قازىرگى كەزدە ورتالىق ازيا ەلدەرىنىڭ اراسىندا ينتەگراتسيالىق ۇدەرىستەر وتە قارقىندى جۇرگىزىلۋدە. تۇرىكمەنستان مەن قازاقستان اراسىندا دا بىرقاتار جوبا بار. ماسەلەن, «قازاقستان – تۇرىكمەنستان – يران» تەمىر جولى سالىنعان. مۇنان وزگە دە جوبالار ىسكە اسىرىلۋدا. سولاردىڭ بارلىعىن تۇرىكمەنستان اقپارات اگەنتتىگىندە, «قازاقپاراتتا» جاريالاپ وتىراتىن بولامىز. ياعني, ءوزارا اقپارات الماسۋ تۋرالى بۇل مەموراندۋم ەكى ەلدى ءبىر-بىرىنە جاقىنداتا ءتۇسۋ ءۇشىن جاسالدى», دەدى «قازاقپاراتتىڭ» باس ديرەكتورى.
ءوز كەزەگىندە بەكدۋردى امانسارىەۆ اگەنتتىكتەر اراسىنداعى كەلىسىمگە قول قويۋ ءراسىمىن ەكى ەل پرەزيدەنتتەرىنىڭ ماڭىزدى كەلىسسوزدەرى اياسىنداعى تاريحي ءسات دەپ باعالايتىندىعىن اتاپ ءوتتى. «ءبىزدىڭ حالىقتارىمىز تاريحى مەن مادەنيەتى ورتاق باۋىرلاس حالىقتار سانالادى. العا قويعان ماقساتىمىز ءبىر, ەكونوميكالىق بايلانىستارىمىز جوعارى», دەپ اتاپ ءوتتى ول.
شارا سوڭىندا بەكدۋردى امانسارىەۆقا شاپان جابىلىپ, قوناققا ساي قۇرمەت كورسەتىلدى. باۋىرلاس ەلدىڭ وكىلدەرى دە قۇرقول كەلمەي, قۇندى كىتاپ تارتۋ ەتتى.
راۋان قايدار,
«ەگەمەن قازاقستان»
