باسقوسۋدا ءسوز سويلەگەن اسقار مامين قوس ەل باسشىلارىنىڭ باستاماسىمەن قازاقستان-قىتاي مەملەكەتتەرىنىڭ بىرلەسكەن يندۋستريالىق-يننوۆاتسيالىق ىنتىماقتاستىق باعدارلاماسى قابىلدانعانىن ەسكە سالدى. «قۇجات اياسىندا جالپى قۇنى 27 ميلليارد اقش دوللارىن قۇرايتىن 51 جوبا قولعا الىنىپ وتىر. قىتايلىق كومپانيالار ءبىرلەسكەن جوبالارعا بەلسەندى اتسالىسۋدا. بىلتىر قازاقستان پرەزيدەنتىنىڭ قحر-عا رەسمي ساپارى بارىسىندا «نۇرلى جول» جاڭا ەكونوميكالىق ساياساتى مەن «جىبەك جولىنىڭ ەكونوميكالىق بەلدەۋى» باعدارلاماسىن ۇندەستىرۋ جوسپارىنا قول قويىلعان بولاتىن. جوسپار ۇلكەن كولىكتىك-ترانزيتتىك, ينۆەستيتسيالىق دامۋدىڭ جولدارىن اشتى. ءبىز قازىر سول جۇمىستىڭ ناتيجەلەرىن كورە باستادىق», دەدى ۆيتسە-پرەمەر. ونىڭ ايتۋىنشا, 2017 جىلدىڭ ەكى ايىندا قازاقستان-قىتاي اراسىنداعى تاۋار اينالىمى 30 پايىزعا ارتقان. بۇل – وتە ۇلكەن كورسەتكىش.
اسقار ۇزاقباي ۇلى قىتاي – قازاقستان – ەۋروپا باعىتىنداعى كونتەينەرلىك تاسىمال جىل سايىن ەكى ەسەگە ءوسىپ كەلە جاتقانىن دا تىلگە تيەك ەتتى. «جىل باسىنداعى ەكى ايدى بىلتىرعى ءسايكەس مەرزىممەن سالىستىرعاندا, ءوسىم 2,6 ەسە بولعان. بۇل «ءبىر بەلدەۋ – ءبىر جول» جانە «نۇرلى جول» باعدارلامالارىنىڭ ءىس جۇزىندە جۇزەگە اسىپ جاتقاندىعىن ءبىلدىرەدى», دەدى ول.
وتىرىس بارىسىندا قحر مەملەكەتتىك كەڭەسى پرەمەرىنىڭ ءبىرىنشى ورىنباسارى چجان گاولي قىتاي توراعاسى سي تسزينپيننىڭ استانادا وتەتىن ەكسپو-2017 كورمەسىنە كەلەتىنىن مالىمدەدى. «تاياۋداعى ەكى ايدىڭ ىشىندە ءبىزدىڭ مەملەكەت باسشىلارىمىزدىڭ كەزدەسۋى وتەدى دەپ كوزدەلگەن. سىزدەردىڭ پرەزيدەنتتەرىڭىز مامىر ايىنىڭ ورتاسىنا قاراي قىتايعا كەلىپ, «ءبىر بەلدەۋ – ءبىر جول» اتتى حالىقارالىق فورۋمنىڭ جۇمىسىنا قاتىسادى. ءتوراعا سي تسزينپين ماۋسىم ايىنىڭ باسىندا استاناعا ساپارلاپ, شىۇ سامميتىنە جانە ەكسپو-عا قاتىسادى. سوندىقتان, ولاردىڭ اراسىندا وتە ماڭىزدى كەزدەسۋلەر وتەدى», دەدى چ.گاولي.
تاراپتار وتىرىس بارىسىندا ەكىجاقتى ىنتىماقتاستىق ماسەلەلەرىنىڭ كەڭ اۋقىمىن, اتاپ ايتقاندا, ساۋدا-ەكونوميكالىق, ەنەرگەتيكالىق, يندۋستريالىق, يننوۆاتسيالىق, مادەني-گۋمانيتارلىق سالالارداعى ءوزارا ءىس-قيمىل, شەكارا ماڭى جانە ءوڭىرلىك سەرىكتەستىكتى دامىتۋ, كولىك-لوگيستيكالىق, اۋىل شارۋاشىلىعى, عىلىمي-تەحنيكالىق سالالارداعى ىنتىماقتاستىق ماسەلەلەرىن تالقىلادى. «نۇرلى جول», «جىبەك جولىنىڭ ەكونوميكالىق بەلدەۋى» سەكىلدى ءىرى كولەمدى باعدارلامالاردى ىسكە اسىرۋدىڭ بىرلەسكەن جۇمىسى, سونداي-اق, كولىك جانە لوگيستيكا سالاسىندا جاڭا ونىمدەر مەن قىزمەت ءتۇرلەرىن قۇرۋ جايتتارى پىسىقتالدى.
جيىندا «قوستاناي-استانا» تەلەكوپىرى ارقىلى «سارىارقا اۆتو پروم» جشس-ءنىڭ ءوندىرىستىك الاڭىندا «ANKAI» اتتى اۆتوبۋستار شىعاراتىن بىرلەسكەن زاۋىت ىسكە قوسىلدى. شارا سوڭىندا ىنتىماقتاستىق ءجونىندەگى قازاقستان-قىتاي كوميتەتى 8-وتىرىسىنىڭ حاتتاماسىنا قول قويىلدى.
اسحات رايقۇل,
«ەگەمەن قازاقستان»
