فەستيۆالدىڭ ماقساتى – تۇركىتىلدەس ۇلتتار اراسىنداعى باۋىرلاستىق بايلانىستار مەن دوستىقتى نىعايتۋ, تۇركىلىك مادەنيەت پەن ونەردى ۇرپاقتان ۇرپاققا جەتكىزۋ, كاسىبي تەاترلاردىڭ ونەرىن ناسيحاتتاۋ, تۇركى الەمى تەاترلارىنىڭ باسشىلارى كەڭەسىنىڭ ءماجىلىسىن وتكىزۋ, ءوزارا ءىس-تاجىريبە الماسۋ جانە تىعىز قارىم-قاتىناستا بولۋىنا ىقپال ەتۋ.
ق.ا. ياساۋي اتىنداعى حقتۋ-ءنىڭ مادەني ورتالىعىندا وتكەن فەستيۆالدىڭ اشىلۋ سالتاناتىندا وبلىس اكىمىنىڭ ورىنباسارى ۇلاسبەك سادىبەكوۆ ءسوز سويلەپ, شارانىڭ ماڭىزدىلىعىنا توقتالدى.
«قازاق دالاسىنا كەنجەلەپ كەلگەن تەاتر ونەرىنىڭ باستاۋىندا تۇرعان جۇمات ءشانيننىڭ «تەاتر – ۇلتتىڭ ايناسى, تەاتر – يدەولوگيالىق قۇرال!» - دەگەن ونەگەلى ءسوزى شىنايىلىعىن دالەلدەپ كەلەدى. «تۇركىستان – تۇركى الەمىنىڭ مادەني استاناسى» جىلىنىڭ اياسىندا تۇركى ۇلىستارىن بىرىكتىرۋدە, رۋحىمىزدى اسقاقتاتۋدا مادەنيەت پەن ونەر التىن كوپىرگە اينالۋدا. بۇگىنگى وتكىزىلىپ وتىرعان تۇركى الەمىنىڭ تەاتر فەستيۆالى وسىنىڭ ايعاعى», – دەدى وبلىس اكىمىنىڭ ورىنباسارى.
«تەاترى كوكتەمى-2017» فەستيۆالىن ج.ايماۋىتوۆ اتىنداعى پاۆلودار وبلىستىق قازاق مۋزىكا دراما تەاترى ج.ءشانيننىڭ «ارقالىق باتىر» تاريحي دراماسىمەن اشسا, ر.سەيتمەتوۆ اتىنداعى تۇركىستان سازدى-دراما تەاترى گ.حۋگاەۆتىڭ «قارا شەكپەن» ءاپساناسىن ساحنالادى.
ءۇش كۇنگە سوزىلاتىن تەاترلار بايقاۋى 21 ساۋىرگە دەيىن وبلىستىق تەاتر ساحنالارىندا قويىلىپ, جەڭىمپازدار انىقتالاتىن بولادى. حالىقارالىق شارانىڭ جابىلۋ سالتاناتى ج.شانين اتىنداعى اكادەميالىق قازاق دراما تەاترىندا وتەدى.
تۇركى ەلدەرى تەاترلارى اراسىنداعى فەستيۆالعا وڭتۇستىك قازاقستان وبلىسىنىڭ 5 تەاترى, استانا قالاسىنىڭ جاستار تەاترى, پاۆلودار وبلىسى جانە قىرعىزستان, وزبەكستان ەلدەرىنىڭ ساحنا ساڭلاقتارى, جالپى سانى 9 ۇجىمنان 300-دەن اسا ءارتىس قاتىسۋدا.
ايتا كەتەيىك, ونەر مايتالماندارىنىڭ ءوزارا جارىسىنا ونەرتانۋ عىلىمدارىنىڭ كانديداتى, تەاتر سىنشىسى, ع.مۇسىرەپوۆ اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىنىڭ كوركەمدىك جەتەكشىسى ەركىن جۋاسبەك, ادەبيەتشى, سىنشى, پروفەسسور ق.ا.ياساۋي اتىنداعى حقتۋ-ءى جانىنداعى تۇركولوگيا عىلىمي-زەرتتەۋ ينستيتۋتىنىڭ ديرەكتورى قۇلبەك ەرگوبەك, قر مادەنيەت جانە سپورت مينيسترلىگى كينەماتوگرافيا جانە تەاتر ونەرى باسقارماسىنىڭ باس ساراپشىسى, قر «مادەنيەت سالاسىنىڭ ۇزدىگى» گۇلنافيس مىرزاشەۆا, تۇركيا مەملەكەتىنەن ادانا قالالىق تەاترىنىڭ كوركەمدىك جەتەكشىسى, «التىن كوزا» كينوفەستيۆالىنىڭ باس ديرەكتورى يسمايل ديكيليتاش, قر مادەنيەت قايراتكەرى, پەداگوگيكا عىلىمدارىنىڭ كانديداتى, م.اۋەزوۆ اتىنداعى ۋنيۆەرسيتەتىنىڭ پروفەسسورى ناسىپقانىم كامالوۆالار قازىلىق ەتىپ جاتىر.
