– بۇل ماقالادا, ەلىمىزدىڭ رۋحاني جاڭعىرۋ جولىنداعى بولاشاق باعىتى ايقىندالىپ وتىر. ءبىز – بىرلىك پەن بەرەكەنى, تۇراقتىلىق پەن كەلىسىمدى نىعايتا وتىرا, «ماڭگىلىك ەل» يدەياسىن شىنايى جۇزەگە اسىرۋعا بەت الدىق. وسى جولدا, ەلباسى تۇتاس قوعامنىڭ, ەلىمىزدىڭ ءاربىر ازاماتىنىڭ ساناسىن جاڭعىرتۋ ۋاقىتى كەلگەنىن جەتكىزدى. ال كەز كەلگەن ورتادا باسەكەگە قابىلەتتى بولۋ – تابىستى ادامنىڭ فورمۋلاسى. ول بۇگىنگى زاماننىڭ تالابى, – دەپ اتاپ ءوتتى جيىن بارىسىندا وبلىس اكىمى بولات باقاۋوۆ.
ماقالانى تالقىلاۋ جيىنىندا ءسوز سويلەگەن پروفەسسور ايمان زەينۋللينا: «جاڭعىرۋ سيپاتىندا ۇلتتىق قۇندىلىقتارىمىزدىڭ قوعامعا جات, ەسكىرگەنىن ىعىستىرىپ, ۇلت بولمىسىنا قاجەتتىسىن ناسيحاتتاعانىمىز دۇرىس بولادى. ەكىنشى نازار اۋداراتىن نارسە – ۇلتىمىزدىڭ ءبىلىمدىلىگى مەن بىلىكتىلىك مازمۇنى. اسا ءبىلىمدار ۇلت قانا ءتول قۇندىلىعىن ساقتاپ, الەمدىك كەڭىستىكتە ۇلتتىق پاراساتىن كورسەتە الادى. سونىڭ ءبىرەگەيى – ۇلتتىق ءتىل قۇدىرەتى. ءتىل – ۇلتتىق تىرەگىمىز, رۋحاني كۇش قۋاتىمىز, ۇلت ايبىنى, ۇلتجاندىلىق سەزىمىن شىڭدايتىن قۇرال ەكەنى بارشامىزعا بەلگىلى», دەدى.
ال فيلولوگيا عىلىمدارىنىڭ كانديداتى, يننوۆاتسيالىق ەۆرازيا ۋنيۆەرسيتەتىنىڭ پرورەكتورى ۆلاديمير شنايدەر: «وسىدان 25 جىل بۇرىن لاتىن الىپبيىنە كوشۋدى ء ابدۋالي قايداري ايتىپ ەدى. سوندىقتان, ەلباسى ماقالاسىندا بۇل تاقىرىپتىڭ قايتا كوتەرىلۋىن, لاتىن ءالىپبيىنە كوشۋدى قۋانىشپەن قابىلدادىم. بار ماقسات, بۇگىنگى ءتىلدى وسى كۇيىندە ساقتاپ قالۋ, قازاق جازۋىن بوتەن ءتىلدىڭ جازۋ مانەرىنەن ايرىقشا, قازاقي ءداستۇرلى ەتۋ. ەگەر ءبىز كيريلل الىپبيىندە قالا بەرەتىن بولساق, قازاق ءتىلىنىڭ ءوزىن ءوزى ساقتاۋ يممۋنيتەتى جويىلا بەرەدى. شەت ەلدە تۇراتىن 5 ميلليونداي وتانداستارىمىزدىڭ 80 پايىزى لاتىنشا وقىپ كەتە الاتىندىعىن ەسكەرسەك, لاتىن ءالىپبيى بولاشاقتا دۇنيە ءجۇزى قازاقتارىن جاقىنداستىرۋعا سەپتىگىن تيگىزەتىندىگى ءسوزسىز. لاتىن ءالفاۆيتى وتە تانىمال. كوپتەگەن ۇلت وكىلدەرى شەت ەل ءتىلدەرىن ەركىن وقيدى. ەگەر ءبىز دە لاتىن الىپبيىنە كوشسەك, قازاق ءتىلىن ەمىن ەركىن وقۋعا مۇمكىندىكتەر تۋار ەدى», دەدى.
جيىندا سونىمەن قاتار, «ۇلتتىق بىرەگەيلىكتى ساقتاۋ», «ءبىلىمنىڭ سالتانات قۇرۋى», «سانانىڭ اشىقتىعى» تاراۋلارىندا الداعى ءۇلكەن مىندەتتەرگە, اتاپ ايتقاندا, قازاق ءتىلىن لاتىن ءالىپبيىنە كوشىرۋ, «تۋعان جەر», «قازاقستانداعى 100 جاڭا ەسىم», تاعى باسقا نەگىزگى تاقىرىپ تالقىلاۋ ارقاۋىنا اينالدى. جيىنعا قاتىسۋشىلار, ەلباسىنىڭ رۋحاني جاڭعىرۋ جونىندەگى باعالى ۇسىنىستارىن قازاقستاندىقتاردىڭ, اسىرەسە, جاس وسكىن ساناسىنا جەتكىزۋ جولدارىن ورتاعا سالدى.
فاريدا بىقاي,
«ەگەمەن قازاقستان»
پاۆلودار وبلىسى
