– مەملەكەت باسشىسى بيىل ءۇش بىردەي جاڭا باستاما كوتەرىپ, دامۋ جولىمىزدى جان-جاقتى ايقىنداپ, باعدارلاپ بەردى. ءبىرىنشىسى – ەلىمىزدى تەحنولوگيالىق دامۋدىڭ جاڭا دەڭگەيىنە كوتەرەتىن اۋقىمدى جاڭعىرۋ بولسا, ەكىنشىسى – كونستيتۋتسيالىق رەفورما ارقىلى ساياسي جاڭعىرۋ. ەلباسى ەندىگى كەزەكتە رۋحاني جاڭعىرۋعا جول اشۋ كەرەكتىگىن كورسەتىپ وتىر, – دەگەن ءوڭىر باسشىسى كوپشىلىكتىڭ كوڭىلىنەن شىققان ماقالا جايىندا جان-جاقتى ايتىپ ءوتتى.
ەلباسىمىز «بولاشاققا باعدار: رۋحاني جاڭعىرۋ» اتتى ماقالاسىندا وسى جەتىستىكتەرىمىزدى دامىتۋدىڭ رۋحاني باعدارلاماسىن ۇسىندى. بۇل باعدارلاما ۇلتىمىز ءۇشىن ماڭىزى تەرەڭ, اۋقىمى زور, ونەگەسى مول, حالقىمىزعا رۋحاني ازىق بولاتىن ايتۋلى دۇنيە. بۇل ماقالادا وتكەن تاريحي كەزەڭدەرگە سىندارلى باعا بەرىلىپ, وي ەلەگىنەن ءوتكىزىلىپ, ەلىمىزدىڭ رۋحاني دامۋ باعىتى ايقىندالعان.
بۇدان سوڭ بايانداما جاساۋ ءۇشىن مىنبەرگە وبلىس اكىمىنىڭ ورىنباسارى جاقسىلىق ومار كوتەرىلىپ, ماقالادا كوتەرىلگەن ماسەلەلەر بويىنشا ءبىرىنشى كەزەكتە اتقارىلۋى ءتيىس جۇمىستار جايلى جان-جاقتى ايتىپ ءوتتى.
– ەلباسى ۇسىنعان جاڭعىرتۋلار قازاقستاندىقتاردى سانعاسىرلىق تاريح پەن مادەنيەتتەگى, ۇلتتىق سانا-سەزىم مەن ءبىلىم سالاسىنداعى رۋحاني رەفورماعا باستايدى. ءوزىمىزدەگى ەسكى قاعيداتتاردان ارىلىپ, بۇگىنگى كۇننىڭ ارناسىمەن العا قاراي ۇمتىلۋىمىز قاجەت. وسى ورايدا, بابالاردان ميراس بولىپ قالعان رۋحاني قۇندىلىقتاردى كوزدىڭ قاراشىعىنداي ساقتاي ءجۇرىپ, ۇلتتىق رۋحتى دا جاڭعىرتۋ كەرەكتىگى كۇمان كەلتىرمەيدى, – دەگەن جاقسىلىق مۇقاش ۇلى ەلباسى ماقالاسىندا ايتىلعان ماسەلەلەرگە توقتالدى.
بايانداماشىنىڭ ايتۋىنشا, وسى ماقسات-مىندەتتەر مەجەسىندە كوپتەگەن ىستەر مەن جۇمىستار اتقارۋ كەرەك. ويتكەنى, قازىرگىدەي جاھاندىق باسەكەلەستىك بىزدەن تىنىمسىز ەڭبەكتى, تابىستى باستامالاردى تالاپ ەتەدى. بۇل جولدا ءبىلىمنىڭ تۇنىعىمەن سۋسىنداپ, سوڭعى ۇلگىدەگى تەحنولوگيالاردىڭ ءتىلىن مەڭگەرگەن جاس ۇرپاقتى ۇلتتىق سالت-ءداستۇر, ادەت-عۇرىپ بويىنشا تاربيەلەۋ قازاقستاندىق برەندتى العا شىعارادى. ونىڭ ۇستىنە قينالعانعا قول ۇشىن سوزعان جاناشىرلىق, جەتىمنىڭ ماڭدايىنان سيپاعان مەيىرىمدىلىك, اش ادامعا قولىنداعىسىن ءبولىپ بەرگەن قايىرىمدىلىق سىندى قازاقى قاسيەتتەردى وسكەلەڭ ۇرپاقتىڭ بويىنا ءسىڭىرۋ بەيبىتشىلىككە, تىنىشتىققا قۇشتار ۇلتىمىزدىڭ بەت-بەينەسىنىڭ ساقتالۋىنا سەپتىگىن تيگىزەدى.
الەمگە تارالعان قازاق حالقىنىڭ ءبىر-بىرىمەن ەمىن-ەركىن تىلدەسۋىنە, دۇنيە ءجۇزىنىڭ عىلىمىنا, بىلىمىنە ەشبىر كەدەرگىسىز جول اشىلاتىنىن ايتقان جاقسىلىق ومار ەلباسى ماقالاسىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى مەن «تۋعان جەر» باعدارلاماسىن ەنگىزۋ ارقىلى قازاقستاندىق ءپاتريوتيزمنىڭ جارقىن ۇلگىسىن كورسەتۋدى مىندەتتەگەنىن جەتكىزدى. سول ارقىلى جەتىسۋ جەرىنەن تۇلەپ ۇشقان ءاربىر ازامات وبلىستىڭ وركەندەۋىنە لايىقتى ۇلەس قوسۋى كەرەك.
بۇدان سوڭ كۇن تارتىبىندەگى تاقىرىپتى تالقىلاۋ ءۇشىن ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ «ءماڭگىلىك ەل» عىلىمي ءبىلىم بەرۋ ورتالىعىنىڭ باس عىلىمي قىزمەتكەرى, فيلوسوفيا عىلىمدارىنىڭ دوكتورى امانجول قاسابەك, «الماتى وبلىستىق سلاۆيان قوزعالىسى» قوعامدىق بىرلەستىگىنىڭ ءتوراعاسى ناتاليا بەليك, وبلىستىق «جەتىسۋ» گازەتىنىڭ باس رەداكتورى, قازاقستان رەسپۋبليكاسىنىڭ مادەنيەت قايراتكەرى, قازاقستان جازۋشىلار جانە جۋرناليستەر وداعىنىڭ مۇشەسى امىرە ءارىن, وبلىستىق «وگني الاتاۋ» گازەتىنىڭ باس رەداكتورى, قازاقستان رەسپۋبليكاسى پرەزيدەنتى سىيلىعىنىڭ لاۋرەاتى اتساليم يديگوۆ, وبلىستىق وڭىرلىك كوممۋنيكاتسيالار قىزمەتىنىڭ جۋرناليست-مودەراتورى گالينا ميتكوۆسكيح كەزەكپەن مىنبەرگە كوتەرىلىپ, ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا كوتەرىلگەن ماسەلەلەردىڭ وزەكتىلىگى, ماڭىزدىلىعى جايلى جان-جاقتى ايتىپ ءوتتى.
– جەتىسۋ وڭىرىندە بىرلىك پەن تاتۋلىقتى, رۋحاني كەلىسىمدى, ەكونوميكالىق دامۋ ۇردىستەرىن ساقتاۋ ءۇشىن ناقتى جۇمىستار اتقارىلۋى ءتيىس. وبلىستىق اقساقالدار, ارداگەر انالار ۇيىمى جۇرگىزىپ وتىرعان جۇمىستاردى ودان ءارى جالعاستىرۋ قاجەت. جاس ۇرپاققا ءتاربيە بەرۋ, ولاردىڭ بويىنا ۇلتتىق قۇندىلىقتاردى ءسىڭىرۋ ماقساتىندا كەشەندى جۇمىستار جوسپارى جاسالىپ, ىسكە اسىرىلۋى كەرەك. «جانىڭدا ءجۇر جاقسى ادام», «قازاقستانداعى 100 جاڭا ەسىم» سياقتى جوبالاردى اۋدان, قالالاردا ىسكە اسىرۋدى, ءوز جەتىستىكتەرىڭىزدى دارىپتەۋدى تاپسىرامىن. بۇل جونىندە مامىر ايىنىڭ 1-ىنە دەيىن ناقتى ۇسىنىستار بەرىلىپ, جۇمىستار باستالۋى ءتيىس. ءار اۋدان مەن قالادا تاريحي, مادەني ەسكەرتكىشتەردىڭ ءتىزىمى جاڭارتىلىپ, جاستارعا تاربيەلىك ءمانى بار شارالار وتكىزىلۋى ءتيىستى, – دەگەن وبلىس اكىمى اماندىق باتالوۆ اكتيۆ جينالىسىن قورىتىندىلادى.
ءمادي الجانباي
