اكتيۆ جيىنى وبلىس اكىمىنىڭ مىندەتىن اتقارۋشى قۋانىش ىسقاقوۆتىڭ توراعالىعىمەن ءوتتى. «ەل پرەزيدەنتىنىڭ بۇل ماقالاسى – ماڭگىلىك ەلىمىزدىڭ ماقسات-مۇراتىن جۇزەگە اسىرۋدىڭ ءتۇپ نەگىزدەرىن, رۋحاني جاڭعىرۋىمىزدىڭ نەگىزگى باعىتتارىن ايقىنداپ بەرگەن ۇلت جادىنىڭ تۇعىرناماسى دەۋگە بولادى», دەگەن قۋانىش دوسمايىل ۇلى ەلباسى ماقالاسىندا ايتىلاتىن نەگىزگى ماسەلەلەرگە ەگجەي-تەگجەيلى توقتالدى.
− مەملەكەت باسشىسى ايتقانداي, ءبىز ۇلتتىق كودىمىزدى ساقتاپ, زامانا سىنىنا توتەپ بەرە الاتىن وزىق داستۇرلەرىمىزدى تابىستى جاڭعىرتا وتىرىپ, وركەنيەت كوشىنە ىلەسۋىمىز كەرەك. بۇل رەتتە, سىر ءوڭىرى تاريحىن تەرەڭنەن تارتقان, قايماعى بۇزىلماعان ۇلتتىق مادەنيەتىمىز بەن ءداستۇرىمىزدى بۇگىنگە جەتكىزىپ, جاڭعىرتىپ, جاس ۇرپاققا ناسيحاتتاپ وتىرعان بىردەن-ءبىر ولكە دەۋگە نەگىز بار. ەلباسى ءوز ماقالاسىندا «ۇلتتىق سالت-داستۇرلەرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر سوزبەن ايتقاندا, ۇلتتىق رۋحىمىز ماڭگى قالۋعا ءتيىس» – دەدى. وسى رەتتە, سىر ەلىنىڭ ونەرى ءوز جەرىمىزدە عانا دامىپ قويماي, تۇركياعا, لوندونعا, اقش-تىڭ نيۋ-يورك, ۆاشينگتون قالالارىنا, ازەربايجان رەسپۋبليكاسىنا تانىلۋدا. وسى كۇندەرى وبلىسىمىزدىڭ تەاترى باكۋ, شەكي قالالارىندا گاسترولدىك ساپاردا ءجۇر,– دەدى قۋانىش ىسقاقوۆ. سونان سوڭ ۇلتتىق يدەولوگيانىڭ ۇستىنى بولارلىق قۇجاتتان تۋىندايتىن ماسەلەلەر بويىنشا باسقارمالارعا ناقتى تاپسىرمالار جۇكتەدى.
جيىن بارىسىندا ءسوز العان ارىندى اقىن ءشاھيزادا ابدىكارىموۆ ەلباسى ماقالاسىنداعى ۇلتتى ماڭگىلىك ەتۋ جولىنداعى اسپەكتىلەردى كەڭىنەن تولعاپ, تەرەڭىنەن قاۋزادى. قورقىت اتا اتىنداعى قمۋ-دىڭ قازاقستان حالقى اسسامبلەياسى كافەدراسىنىڭ مەڭگەرۋشىسى نۇرلىبەك مىڭجاسوۆ سانانىڭ جاڭعىرۋى جايىندا تولىمدى بايانداما جاسادى. قىزىلوردا وبلىسى ءبىلىم باسقارماسى باسشىسىنىڭ ورىنباسارى باعدات بەرداۋلەتوۆ ايماقتاعى ءبىلىم سالاسىندا اتقارىلىپ جاتقان شارۋالارعا توقتالدى. قورقىت اتا اتىنداعى قمۋ-دىڭ قازاق ءتىلى مەن ادەبيەتى جانە جۋرناليستيكا كافەدراسىنىڭ پروفەسسورى امان اباسيلوۆ لاتىن قارپىنە كوشۋدىڭ ارتىقشىلىقتارى مەن ۇتىمدى تۇستارى حاقىندا ءسوز قوزعادى. ال «قوعامدىق كەلىسىم» ورتالىعىنىڭ باسشىسى ءۋاليحان يبراەۆ ماقالادا ايتىلعان ءمىندەتتەردىڭ ەل ومىرىنە ەلەۋلى وزگەرىستەر اكەلەتىنىن ايتتى. بايانداماشىلاردىڭ بارلىعى ەلباسى ماقالاسىنىڭ ماڭىزى مەن قازاقستاننىڭ عىلىم-ءبىلىم, تاريح, ادەبيەت, الەۋمەتتىك جانە تاعى دا باسقا سالالاردىڭ دامۋىنا وڭ ىقپالى تۋرالى اڭگىمە ءوربىتتى.
سونداي-اق, وتىرىس بارىسىندا ماقالادا كورسەتىلگەن «ۇلتتىق سانا», «تۋعان جەر» باعدارلاماسى, «قازاق تىلىندەگى 100 جاڭا وقۋلىق», «مادەني-گەوگرافيالىق بەلدەۋ», «100 جاڭا ەسىم» جانە وزگە دە ماسەلەلەر كەڭ كولەمدە تالقىلانىپ, قاتىسۋشىلار تاراپىنان قولداۋعا يە بولدى.
ەرجان بايتىلەس,
«ەگەمەن قازاقستان»
قىزىلوردا
