– «تۋعان جەر» باعدارلاماسىن ىسكە اسىرۋدا الماتىلىقتاردىڭ الار ورنى ەرەكشە بولادى دەپ سەنەمىن, – دەپ ءسوز باستاعان قالا اكىمى باۋىرجان بايبەك ودان ءارى بىلاي دەدى: «ءبىزدىڭ قالا مەن ونىڭ جاۋاپكەرشىلىكتى, الەۋمەتتىڭ ماسەلەلەرىنەن قاشپايتىن تۇرعىندارى ءۇشىن ماقالادا كورسەتىلگەن يدەيالار مەن ۇلگىلەر وتە جاقىن. ماسەلەن, وتكەن جىلدارى كاسىپكەرلەردىڭ قولداۋىمەن قالا اۋلالارىندا 100-دەن استام سپورت الاڭقايى اشىلىپ, 10 شاقتى ۇلكەن بالاباقشا سالىندى. مەملەكەت-جەكەمەنشىك ارىپتەستىك قاعيداسىمەن 600 وقۋشىعا ارنالعان, جاڭا تالاپتارعا ساي جايلى مەكتەپ تۇرعىزىلدى. تاعى بىرەۋىنىڭ قۇرىلىسى اياقتالماق. قايىرىمدىلىق كومەك, مەتسەناتتىق قولداۋ قانشاما! وسىنىڭ ءبارى تۇپتەپ كەلگەندە ەلگە دەگەن پەرزەنتتىك ءسۇيىسپەنشىلىك سەزىممەن تىعىز بايلانىستى».
تاۋەلسىزدىك العان جىلدارى الماتىدا نەبارى 18 عانا, ونىڭ وزىندە قازاقشا-ورىسشا ءتاربيەلەيتىن مەملەكەتتىك بالاباقشا بولاتىن بولسا, بۇگىن ونىڭ سانى 157-گە جەتتى. ال مەكتەپ سانى 7-دەن 65-كە دەيىن ۇلعايىپ, ونداعى بالا سانى 11 مىڭنان 104 مىڭعا دەيىن, ياعني 10 ەسەگە وسكەن. بۇگىندە ءۇش تۇعىرلى ءتىل ساياساتىن دامىتۋدى كوزدەگەن جاستاردىڭ بىلىكتى ءىس-قيمىلدارى جان سۇيسىنتەدى. ەلباسى ماقالاسىندا كوپشىلىك تالقىلاۋىنا ءتۇسكەن ماسەلەلەردىڭ ءبىرى – 2025 جىلعا قاراي باسپا ءىسىن, ءىس قاعازدارى مەن وقۋلىقتاردى لاتىن الىپبيىندە باسىپ شىعارۋ بولاتىن. ال لاتىن قارپى كۇندەلىكتى ءومىرىمىزگە دەندەپ كىرسە, اقپاراتتىق تەحنولوگيا ءتىلىن ءتۇسىنىپ, الەمنىڭ وزىق ەلدەرىمەن تەرەزەمىزدىڭ تەڭەسە تۇسۋىنە مۇمكىندىك ارتادى.
ەل تاۋەلسىزدىگىنىڭ 25 جىلدىعى مەن الماتى قالاسىنىڭ 1000 جىلدىعى شەڭبەرىندە قازىرگى زامانعى مۋلتيمەديالىق «الاتاۋ» ءداستۇرلى ونەر تەاترى مەن «مۋلتيمەديالىق ءداستۇرلى ونەر ورتالىعى» مۋلتيمەديالىق جۇيەلەر ارقىلى قازاق, ورىس جانە اعىلشىن تىلدەرىندە ەل ءمادەنيەتىنىڭ ەرەكشەلىكتەرى جونىندە ماعلۇمات الۋعا مۇمكىندىك بەرەدى.
قازاقستاننىڭ حالىق ءارتىسى ءاسانالى ءاشىموۆ: «ەلباسىمىز سومداعان جاسامپاز ۇلت فورمۋلاسى – عايىپتان تۇسكەن, بولماسا ويدان شىعارىلعان قاعيدا ەمەس. بۇل – جالپى الەمدىك, بارشامىزعا قاتىسى بار تاريحي شىندىق», دەسە, قازاقستان جازۋشىلار وداعىنىڭ توراعاسى نۇرلان ورازالين: «بىزدەر ادەبيەت پەن ونەر يەلەرى ەلباسىنىڭ رۋحاني جاڭعىرۋ ۇستانىمىن قولدايمىز. بۇل ءبىزدى, حالىقتى قاناتتاندىرادى, بۇل ەلباسىمىز ۇسىنىپ وتىرعان ۇلى كوش», دەدى. ال قازاقستاننىڭ ەڭبەك سىڭىرگەن قايراتكەرى ءشامشا بەركىمباەۆا «ماقالادا كورسەتىلگەن پرەزيدەنت ۇسىنعان لاتىن الىپبيىنە كوشۋ, ءبىلىم سالاسىن ارتتىرۋ جانە باسقا دا جوبالاردىڭ بارلىعىن ءىسكە اسىرۋدا ۇستازدار قاۋىمى ءاردايىم الدىڭعى شەپتە جۇرەتىنىنە كۇماندانباڭىزدار», دەپ وي تۇيىندەدى.
بولاشاقتىڭ كىلتى – كوزدەگەن ماقساتقا كول جەتكىزۋ مەن زامان تالابىنا ساي كونە مەن بۇگىنگىنى قيسىندى ۇشتاستىرۋ, ءوزىمىزدىڭ رۋحاني كودىمىزعا سۇيەنە وتىرىپ, رۋحاني جاڭعىرۋدا ەكەنىنە شىنايى كوز جەتكىزگەن كوپشىلىك القالى جيىندا ورتاق ءبىر مامىلەگە, ءبىر شەشىمگە توقتاپ, ءباتۋالى ۇيعارىم جاسادى.
تالعات ءسۇيىنباي,
«ەگەمەن قازاقستان»
الماتى
