مامانداردىڭ مالىمەتىنشە, كورمە كەشەنىنەن وڭتۇستىك باعىتقا قاراي جەكە كولىك يەلەرىنە ارنالعان ەكى پارك سالىنۋدا. سىيىمدىلىعى – 9500 ورىن. قوناقتاردىڭ كورمەدە بولۋ ۋاقىتى ورتاشا ەسەپپەن 7 ساعاتتى قۇراسا, كەپتەلىس كەزىندە كولىكتەردىڭ دەنى سوندا قويىلادى دەپ بولجانۋدا. ال ءمۇمكىندىگى شەكتەۋلى جاندار ءۇشىن كىرەبەرىستەردىڭ ءدال جانىنان تۇراق ورىندارى بەلگىلەنەدى. ولاردىڭ سانى جالپى ورىننىڭ 0,5-1 پايىزىن قۇراماق.
VIP-مەيماندارعا ارنالعان كىرەبەرىستە جانە ۇيىمداستىرۋشىلار كەڭسەسى جانىندا شامامەن 16800 شارشى مەتر جەر استى تۇراعى بولادى. ايتا كەتەيىك, كونگرەسس-ورتالىقتا VIP-قابىلداۋلار, ءباسپاسوز ءماسليحاتتارى وتكىزىلەدى ءارى ۇيىمداستىرۋشىلاردىڭ كەڭسەسى ورنالاسقان. تۇراق 480 ورىنعا لايىقتالعاندىقتان, VIP-مەيماندارعا, باق وكىلدەرىنە جانە كومپانيا قىزمەتكەرلەرى ءۇشىن جەتكىلىكتى بولماق. كورمە وتەتىن ءۇش اي ىشىندە شامامەن 61000 VIP-مەيماندى قابىلداۋ ءۇشىن 500 كولىككە ارنالعان تۇراق قاجەت. بۇل بارلىق كۇتىلەتىن كەلۋشىلەردىڭ 1,2 پايىزىن قۇراماق.
قاربالاس كۇندەرى جۇرگىزۋشىلەر كولىكتەرىن جاقىن ماڭداعى اۋداندارعا قويۋى ابدەن مۇمكىن. بۇل جاعدايدا ەكسپو-2017 اۋماعى اينالاسىنداعى تۇرعىلىقتى ورامدار 2000 كولىككە دەيىن قابىلداي الادى. كورمە وتەتىن ۋاقىت ارالىعىندا بارلىق قاتىسۋشىلاردىڭ كەمىندە 1 پايىزى ىرگەلەس كولىك قويۋ ورىندارىن پايدالانۋعا ءمۇمكىندىكتەرى بار. ەڭ اۋقىمدى جوبا – كەڭسە قىزمەتكەرلەرىنە ارنالعان تۇراقتار. ولاردىڭ سانى – ۇشەۋ. ۇيىمداستىرۋشىلار قاتارىنداعى 5675 قىزمەتكەر ەكى اۋىسىمدا ەڭبەك ەتەدى. ورىنداردىڭ تەڭ جارتىسى اۋىسىم وزگەرگەن كەزدە بوس بولۋى قاجەت. سوندىقتان, تۇراققا ۇسىنىلاتىن ورىندار شامامەن كەڭسە قىزمەتكەرلەرىنىڭ 42 پايىزىن قامتاماسىز ەتەدى. ال ەكسپو-قالاشىقتا تۇراتىن ازاماتتار, ياعني كورمەگە قاتىسۋشىلار جاياۋ قاتىنايدى دەپ بولجانۋدا. باسقا قىزمەتكەرلەر قوعامدىق كولىكتىڭ مۇمكىندىگىن پايدالانعانى دۇرىس. قۇقىق قورعاۋ ورگاندارىنىڭ 200 قىزمەتكەرى پاترۋل كولىكتەرىن ناقتى قاجەتتىلىكتەرگە قاراي تۇراققا قوياتىن بولادى.
اسحات رايقۇل,
«ەگەمەن قازاقستان»
