م.اشىمباەۆ ءوزىنىڭ سوزىندە كورسەتىلەتىن مەملەكەتتىك قىزمەتتەردى ۇسىنۋ مەن ەكونوميكالىق جانە الەۋمەتتىك باعدارلامالاردى ساپالى ىسكە اسىرۋ ءۇشىن مەملەكەت باسشىسى ن.نازارباەۆ ۇسىنعان بەس ينستيتۋتتىق رەفورمانىڭ كاسىبي مەملەكەتتىك اپپاراتتى قالىپتاستىرۋ باعىتىنىڭ ماڭىزدىلىعىنا ەرەكشە توقتالدى.
«بۇگىنگى تاڭدا ەلباسى جاريالاعان بەس ينستيتۋتتىق رەفورمانىڭ ىشىندەگى ماڭىزدى باعىتتىڭ ءبىرى مەملەكەتتىك قىزمەتتى دامىتۋعا قاتىستى بولاتىن. ءاسىرەسە, كاسىبي مەملەكەتتىك اپپاراتتى قالىپتاستىرۋ مەن دامىتۋعا باسىمدىق بەرىلگەن. سوڭعى ەكى جىل ىشىندە سالانى جەتىلدىرۋگە ارنالعان زاڭدارعا وزگەرىستەر مەن تولىقتىرۋلار ەنگىزىلگەنى بەلگىلى. ال ەندى ءبىزدىڭ وسى باسقوسۋىمىزدىڭ باستى ماقساتى – سالاعا قاتىستى زاڭ تالاپتارىنىڭ ورىندالۋ بارىسىن ەگجەي-تەگجەيلى تالقىلاۋ. نەگىزىنەن, بۇل جەردە قانداي ماسەلە بار, نەندەي شارۋالار جۇزەگە اسىرىلۋدا دەگەن سەكىلدى ساۋالدارعا جاۋاپ ىزدەپ, تار شەڭبەردە عانا قالىپ قويماي, تاقىرىپتى تەرەڭىرەك زەرتتەپ, تارازىلاعىمىز كەلەدى. سەبەبى, مەملەكەتتىك قۇرىلىمدارداعى اشىقتىقتى قامتاماسىز ەتۋ ارقىلى ءبىز كاسىبي مەملەكەتتىك اپپارات قۇراتىن بولامىز. مىنە, قوعامعا وسى ماسەلەلەردى شىنايى, اشىق ۇعىندىرۋىمىز قاجەت», دەدى م.اشىمباەۆ.
سودان كەيىن مەملەكەتتىك قىزمەت ىستەرى جانە جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى ايگۇل شايىموۆا «100 ناقتى قادام» ۇلت جوسپارىندا ايقىندالعان كاسىبي مەملەكەتتىك اپپاراتتى قالىپتاستىرۋ جونىندەگى تاپسىرمانى ىسكە اسىرۋ بارىسى تۋرالى ەگجەي-تەگجەيلى باياندادى. ونىڭ كەلتىرگەن دەرەكتەرىنە سۇيەنسەك, بۇگىندە جاڭا قابىلدانعان «مەملەكەتتىك قىزمەت تۋرالى» زاڭنىڭ ارقاسىندا 15 تارماقتىڭ 11-ءى ءساتتى ىسكە اسىرىلعان.
نەگىزگى باياندامادان سوڭ پىكىر الماسۋ كەزىندە پارلامەنتشىلەر مەملەكەتتىك قىزمەتكە كىرۋ مەن ودان ءوتۋ, مەملەكەتتىك اپپاراتتىڭ كاسىبيلىگى مەن ادەپ كودەكسى نورمالارىنىڭ ورىندالۋ دەڭگەيىن ارتتىرۋ بويىنشا ناقتى ۇسىنىستارىن ايتتى. سونىمەن قاتار, حالىق قالاۋلىلارى مەملەكەتتىك قىزمەتشىلەردىڭ ەڭبەگىنە اقى تولەۋ بويىنشا ءتاسىلدەردى وزگەرتۋگە, «ا» كورپۋسىنا كىرەتىن لاۋازىمدار تىزبەسىن وڭتايلاندىرۋعا, پرەزيدەنت جانىنداعى مەملەكەتتىك قىزمەت اكادەمياسىن ودان ءارى دامىتۋعا قاتىستى بىرقاتار ماسەلەلەردى قىزۋ تالقىلادى.
ءوز كەزەكتەرىندە ءسوز العان ءماجىلىس دەپۋتاتى ق.سۇلتانوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جانىنداعى قوعامدىق كەڭەس مۇشەسى ە.وڭعارباەۆ, باس پروكۋراتۋرانىڭ كادر جۇمىسى دەپارتامەنتى باستىعىنىڭ ورىنباسارى گ.شۇشىكوۆا مەملەكەتتىك قىزمەت پەن قۇقىق قورعاۋ ورگاندارىنا جۇمىسقا تۇرۋ جانە ولاردان ءوتۋ كەزىندەگى بىرقاتار تۇيتكىلدى ماسەلەلەرگە توقتالىپ, ولاردى شەشۋ جولدارىنا نازار اۋداردى.
نۇرلىبەك دوسىباي,
«ەگەمەن قازاقستان»
