كەزدەسۋ بارىسىندا مەملەكەت باسشىسىنا ۇلتتىق بانكتىڭ 2016 جىلعى قىزمەتىنىڭ قورىتىندىلارى جونىندە ەسەپ بەرىلىپ, الداعى كەزەڭگە ارنالعان جوسپارلار تانىستىرىلدى.
سونداي-اق, كەڭەسكە قازاقستان پرەزيدەنتىنىڭ الەۋمەتتىك-ەكونوميكالىق ماسەلەلەر جونىندەگى كومەكشىسى ءا.سمايىلوۆ, ۇلتتىق بانك توراعاسى د.اقىشەۆ, ۇلتتىق ەكونوميكا ءمينيسترى ت.ءسۇلەيمەنوۆ, قارجى ءمينيسترى ب.سۇلتانوۆ جانە ۇلتتىق بانك ءتوراعاسىنىڭ ورىنباسارلارى قاتىستى.
نۇرسۇلتان نازارباەۆ الەمدىك ەكونوميكالىق داعدارىس جاعدايىندا ۇلتتىق بانك پەن ەلىمىزدىڭ قارجى جۇيەسى تۇراقتى جۇمىس ىستەپ جاتقانىن اتاپ ءوتتى.
– «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدا ۇكىمەت پەن ۇلتتىق بانكتىڭ الدىنا الەمنىڭ دامىعان 30 ەلىنىڭ قاتارىنا قوسىلۋ جونىندە مىندەت قويىلدى. ول ءۇشىن وڭتۇستىك كورەيا سياقتى الەمنىڭ بىرقاتار ەلدەرىنىڭ تابىستى تاجىريبەسىنە سۇيەنۋ قاجەت. بىراق ينفلياتسيانى كەزەڭ-كەزەڭىمەن تومەندەتۋ 3-4 پايىز دەڭگەيىندە بولۋعا ءتيىس, – دەدى قازاقستان پرەزيدەنتى.
ەلباسى قارجى سەكتورىنداعى تۇراقتىلىققا قاۋىپ ءتوندىرىپ وتىرعان, ۇنەمى كەزدەسەتىن قاتەرلەرگە نازار اۋدارىپ, ۇلتتىق ەكونوميكانى دامىتۋدىڭ قازىرگى قارقىنى جەتكىلىكسىز ەكەنىن ايتتى.
– بۇل ماسەلەنى شەشۋ ءۇشىن ماكروەكونوميكالىق تۇراقتىلىققا, بانك سەكتورىن ساۋىقتىرۋعا جانە قور نارىعىن دامىتۋعا باعىتتالعان شارالار قابىلداۋ قاجەت. قويىلعان مىندەتتەردى ىسكە اسىرۋدا ۇلتتىق بانك باستى ءرول اتقارادى, – دەدى مەملەكەت باسشىسى.
د.اقىشەۆتىڭ مالىمەتىنە ءسايكەس, 2016 جىلدىڭ قورىتىندىسى بويىنشا ينفلياتسيا 13,6 پايىزدان 8,5 پايىزعا تومەندەگەن. بيىلعى ناۋرىزدا بۇل كورسەتكىش 7,7 پايىز بولدى.
– 2017 جىلدىڭ سوڭىندا ينفلياتسيا دەڭگەيى 7 پايىزعا جەتىپ, 2018 جىلى ودان ءارى تومەندەيدى دەپ جوسپارلانۋدا. ينفلياتسيا قارقىنى باسەڭدەپ كەلەدى. ايىرباس باعامىنىڭ ازداعان اۋىتقۋلارى ورىن الىپ وتىر. بۇل رەتتە ول تولىعىمەن نەگىزگى فاكتورلارعا تاۋەلدى. ۇلتتىق بانك تاراپىنان بىلتىرعى قىركۇيەكتەن باستاپ ينتەرۆەنتسيا جۇرگىزىلمەگەنىن اتاپ وتكەن ءجون, – دەدى ۇلتتىق بانك ءتوراعاسى.
نۇرسۇلتان نازارباەۆقا 14 ملرد اقش دوللارى كولەمىندە رەكوردتىق مولشەردەگى شەتەل ينۆەستيتسياسى كەلگەنى جانە ەلىمىزدىڭ سىرتقى قارىزى ازايعانى تۋرالى مالىمدەلدى.
د.اقىشەۆ قازاقستان پرەزيدەنتىنە ۇلتتىق بانك پەن ۇلتتىق قور رەزەرۆتەرىنىڭ احۋالى, مونەتارلىق ساياساتتىڭ ىسكە اسىرىلۋ بارىسى, ۆاليۋتا نارىعىنىڭ جاعدايى, بانك سەكتورى مەن قور نارىعىنىڭ دامۋى, ءبىرىڭعاي جيناقتاۋشى زەينەتاقى قورىنىڭ قىزمەتى, بانك كورسەتەتىن قىزمەتتەردىڭ تسيفرلاندىرىلۋى, سونداي-اق وسى سالاداعى جاڭا سىن-قاتەرلەر تۋرالى باياندادى.
– ەلىمىزدىڭ بانك سەكتورىن ساۋىقتىرۋ جونىندە شارالار قابىلداۋدى تەزدەتۋ كەرەك. قاجەت بولعان جاعدايدا, اكتسيونەرلەر ءوز بانكتەرىن ناقتى اقشا ارقىلى قايتا كاپيتالداندىرۋعا ءتيىس. سونداي-اق, ولار ءالسىز بانكتەردى بىرىكتىرۋگە بەيىمدەلۋى ءتيىس, – دەدى ەلباسى.
مەملەكەت باسشىسى يپوتەكالىق قارىز پروبلەمالارىن قايتا قارجىلاندىرۋ باعدارلاماسىنىڭ ىسكە اسىرىلۋ ماسەلەلەرىنە ەرەكشە توقتالىپ, ازاماتتاردىڭ قارجىلىق جاۋاپكەرشىلىگىن ارتتىرۋدىڭ ماڭىزدىلىعىن اتاپ ءوتتى.
كەزدەسۋ سوڭىندا نۇرسۇلتان نازارباەۆ د.اقىشەۆ ۇسىنعان ەسەپتى ماقۇلداپ, بىرقاتار ناقتى تاپسىرما بەردى.
– ۇكىمەت پەن ۇلتتىق بانككە بۇعان دەيىن جۇكتەلگەن مىندەتتەردى شەشۋ جونىندە كەلىسىلگەن ءىس-قيمىلدار ازىرلەۋ تاپسىرىلادى. وتاندىق جانە حالىقارالىق دەڭگەيدەگى بىلتىرعى تاجىريبەنى ەسكەرىپ, ايىرباس باعامى وزگەرۋىنىڭ ءتۇرلى جاعدايىنداعى ءىس-قيمىلدىڭ ناقتى الگوريتمى پىسىقتالسىن. ەكونوميكانى ۇزاق مەرزىمگە نەسيەلەۋ كولەمىن ارتتىرۋ ماقساتىمەن شۇعىل دەپوزيتتەردى كوبەيتۋ شارالارى ازىرلەنسىن. قور نارىعىن دامىتۋ جونىندەگى جۇمىستاردى جانداندىرىپ, ۆاليۋتالىق جانە يپوتەكالىق قارىز الۋشىلاردىڭ پروبلەمالارىن شەشۋ جونىندە ۇسىنىستار ەنگىزىلسىن, – دەدى قازاقستان پرەزيدەنتى.
سۋرەتتەر پرەزيدەنتتىڭ ءباسپاسوز قىزمەتىنەن الىندى
