چەمپيوندار ليگاسىنىڭ شيرەك فينالىنداعى قارسىلاستار انىقتالعاندا "بارسەلوناعا" "يۋۆەنتۋستىڭ" وڭاي بولمايتىنى بەلگىلى ەدى. قازىرگى تۋريندىكتەر ەكى جىل بۇرىنعى كوماندا ەمەس. بۇل "يۋۆەنتۋس" فرانتسيانىڭ "پاري سەن جەرمەنى" ەمەس. مۇندا يتاليانىڭ مىقتى قورعاۋشىلارى جينالعان. وتكەن جازدا كوماندانىڭ باس باپكەرى ماسسيميليانو اللەگري وزىنە قاجەت فۋتبولشىلاردى قاتارىنا قوسقان.
بۇل ويىندا ءبىز بىرەر اي بۇرىن فرانتسيالىقتاردى تاس تالقان ەتكەن "بارسەلونانى" ەمەس كەرىسىنشە پاريجدە ويسىراي ۇتىلعان كوماندانى كوردىك. بۇل جولى ءبىز قارسىلاسىنان ايلاسىن اسىرا بىلگەن مەسسي, نەيمار, سۋارەس ۇشتىگىن بۇرىنعى دەڭگەيىندە كورە المادىق. ورتالىق جارتىلاي قورعانىستا سەرحيو بۋسكەتستىڭ جوقتىعى (سارى قاعازىنىڭ كوپتىگىنەن قاتىسا المادى) مەن نەگىزگى قۇرامدا قورعاۋشى جەرەمي ماتەنىڭ شىققانىنان-اق يسپانيالىقتاردىڭ جاعدايى قيىن ەكەنى تۇسىنىكتى ەدى.
"يۋۆەنتۋس" ء"ا", دەگەننەن-اق قارسىلاستارىن قىسىمعا الۋمەن باستادى. ءاربىر تۋريندىك وزىنە جاۋاپتى ويىنشىنى نازاردان تىس قالدىرمادى. سول قاپتالدان دانيەل الۆەس وتانداسى نەيماردىڭ ادىمىن اشتىرماسا, وڭ قاپتالدان ليونەل مەسسيدى الەكس ساندرو وزىنەن ۇزاتا قويمادى. ال ورتالىق قورعاۋشىلاردى بۇزىپ وتەتىن لۋيس سۋارەس دجوردجو كەليني مەن لەوناردو ءبونۋچچيدىڭ اراسىنان كورىنبەي دە قالدى. كاتالوندىقتار ادەتتەگىدەي دوپقا كوبىرەك يەلىك ەتۋمەن عانا بولدى.
ماتچتاعى العاشقى گول 7-مينۋتتا سوعىلدى. وڭ قاپتالدان ايىپ الاڭىنا ەنگەن حۋان كۋادرادونىڭ پاسىنان كەيىن پاۋلو ديبالا مەرگەندىگىمەن تانىلىپ, ەسەپ اشتى. كەزدەسۋدىڭ 22-مينۋتىندا سول قاپتالدان ماريو ماندجۋكيچتىڭ بەرگەن دوبىن پاۋلو ديبالا توقتاتپاستان قاقپاعا بىردەن باعىتتاپ, دۋبل يەسى اتاندى. ارگەنتينالىق شابۋىلشىنىڭ بۇل گولى 2014 جىلى الەم چەمپيوناتىندا برازيليانى ويسىراتا جەڭگەن گەرمانيانىڭ گولدارىنا ۇقساعانداي.
العاشقى تايمدا 3-4-3 سىزباسى ءساتسىز بولعاندىقتان لۋيس ەنريكە كەلەسى 45 مينۋتتا بۇرىنعى 4-3-3 نۇسقاسىنا كوشتى. ەكىنشى تايمنىڭ باسىندا جەرەمي ماتەنىڭ ورنىنا اندرە گومەشتى شىعارىپ, ورتالىق جارتىلاي قورعانىستا جۇرگەن ماسكەرانونى قورعانىسقا قويدى. ال سەرحي روبەرتو وڭ قاپتالدىڭ قورعانىسىنا جاۋاپتى بولدى.
ءبىرىنشى تايمداعىداي ەمەس كەلەسى 45 مينۋتتى قوناقتار جاڭا قارقىنمەن باستادى. بىراق ءبىرىنشى بولىپ گول جىبەرىپ الدى. ويىننىڭ 55-مينۋتىندا ءپيانيچتىڭ بۇرىشتامادان اۋەلەتە بەرگەن دوبىنا كەليني ءبىرىنشى بولىپ جەتىپ, ءۇشىنشى دوپتى سوقتى. بۇل ماتچتاعى سوڭعى گول بولدى. ەسەپ 3:0. شيرەك فينالداعى العاشقى ويىندا "يۋۆەنتۋس" يسپانيا چەمپيونىن وسىلايشا جەڭدى.
