وسى ورايدا قاراعاندى قالاسىندا بيىلعى جىلدىڭ 7 ساۋىرىنەن باستاپ, 7 مامىر – وتان قورعاۋشىلار مەرەكەسىنە دەيىن «ەرلىك» اتتى ايلىق اكتسيا وتپەك.
اتالمىش اكتسيا وبلىس ورتالىعىنداعى جەڭىس ساياباعىندا 1995 جىلى 7 ساۋىردە تاجىك-اۋعان شەكاراسىندا ەرلىكپەن قازا تاپقان 17 جاۋىنگەرگە ارنالعان «ەرلىك كۇنى» ميتينگىسىنەن باستاۋ الادى.
بۇگىنگى كۇنى قازاقستان رەسپۋبليكاسى ۇلتتىق ۇلانى «ورتالىق» وڭىرلىك قولباسشىلىعىنىڭ قولباسشىسى, گەنەرال-مايور ەركىن بوتاقانوۆ «ارداگەرلەر وداعى» رەسپۋبليكالىق قوعامدىق بىرلەستىگىنىڭ قاراعاندى فيليالىمەن يىقتاسا, ەرلىكپەن قازا تاپقان باتىرلارعا ارنالعان وبەليسك ورناتۋ جونىندە قاراعاندى قالاسىنىڭ اكىمشىلىگىنە ۇسىنىسپەن شىعىپ وتىر.
تاريحتان بىلەتىنىمىزدەي, حالىقارالىق كەلىسىمگە سايكەس, ىشكى اسكەردىڭ, ياعني قازىرگى ۇلتتىق ۇلاننىڭ اسكەري قىزمەتشىلەرى 1993 جىلدىڭ ماۋسىمىنان 1999 جىلدىڭ تامىزىنا دەيىن تاجىك-اۋعان شەكاراسىن كۇزەتۋگە قاتىستى. وسى جىلدارى كەزەكتى اۋىسىم ءتۇرى بويىنشا 20 قۇراما روتا قۇرىلىپ, 2 مىڭنان استام سارباز بەن ساردار جاۋىنگەرلىك تاپسىرمانى ورىندادى. 1995 جىلدىڭ 7 ساۋىرىندە پامير تاۋىنداعى پشيحاۆر شاتقالىندا بولعان قارۋلى قاقتىعىس كەزىندە ىشكى اسكەردىڭ 17 جاۋىنگەرى ەرلىكپەن قازا تاۋىپ, 33-ءى جارالانعان ەدى.
بۇل سۇراپىل شايقاستا قاراعاندىلىق قاھارمان, جاڭاارقا اۋدانى, تۇگىسكەن اۋىلىنىڭ تۋماسى ەركەبۇلان ماقاجانوۆ تا ەرلىكپەن قازا تاپقان بولاتىن. ەركەبۇلان ماقاجانوۆتىڭ وشپەس ەرلىگىن ەسكەرە وتىرىپ, تۋعان اۋىلىندا كوشە اتاۋى بەرىلىپ, وقىعان مەكتەبى مەن تۇرعان ۇيىنە مەموريالدىق تاقتا ورناتىلدى.
قازاقستان رەسپۋبليكاسى جوعارعى كەڭەسىنىڭ 1993 جىلعى 15 ساۋىردەگى «تاۋەلسىز مەملەكەتتەر دوستاستىعىنىڭ تاجىك-اۋعان ۋچاسكەسىندەگى شەكاراسىن قورعاۋدى كۇشەيتۋ تۋرالى» قاۋلىسىنا سايكەس, جاۋىنگەرلىك مىندەتتەرىن ورىنداۋ كەزىندە وشپەس ەرلىكتىڭ ۇلگىسىن كورسەتكەن ۇلتتىق ۇلاننىڭ اسكەري قىزمەتشىلەرى تۋرالى ايتۋ بۇگىنگى جاس ۇرپاق ءۇشىن دە, ەرتەڭگى وتان قورعاۋشىلار ءۇشىن دە اسا قاجەت ءىس. ەسىل ەرلەرگە ورناتىلماق بەلگى دە ون جەتى وعلاندى ەسكە سالىپ, بوزداقتارعا تاعزىم ياكي قۇرمەت بولماق. ارينە, ەشكىم دە, ەشقاشان دا ۇمىتىلماق ەمەس. بۇعان دەيىن دە قازاقستان رەسپۋبليكاسى ۇلتتىق ۇلان باس قولباسشىسى جانە استانا اكىمدىگى بىرلەسە وتىرىپ, «وتان-انا» مونۋمەنتى جانىنان ەرلىكپەن قازا تاپقان 17 جاۋىنگەرگە اللەيا اشقان بولاتىن, ال 2014 جىلى وبەليسك ورناتىلدى. سونىمەن قوسا, قاراعاندى قالاسىندا ورنالاسقان قازاقستان رەسپۋبليكاسى ۇلتتىق ۇلانى «ورتالىق» وڭىرلىك قولباسشىلىعىنىڭ اۋلاسىندا جوعارىدا اتالعان 17 ساربازدىڭ ەسىمدەرى التىن ارىپپەن جازىلعان «جاۋىنگەرلىك داڭق» مەموريالى ورناتىلدى.
جالپى, 1992-2001 جىلدارى تاجىك-اۋعان شەكاراسى ۋچاسكەسىندەگى تمد ەلدەرىنىڭ شەكاراسىن كۇزەتۋدەگى جاۋىنگەرلىك ارەكەتكە 9 مىڭداي اسكەري قىزمەتشى قاتىسىپتى. شەكارادا قارۋلانعان توپتارمەن قاقتىعىس, زاستاۆالارعا ءارتۇرلى شابۋىلار, تەررورلىق ارەكەت جانە ديۆەرسيالاردىڭ ناتيجەسىندە بارلىعى 43 كازاقستاندىق سارباز قايتىس بولسا, 100-دەن استامى جارالاندى.
كەنشىلەر استاناسىندا وتپەك جوسپارلى ءىc-شاراعا شاھار باشىلىعى, ءماسليحات دەپۋتاتتارى, ۇقك شەكارا قىزمەتى, قورعانىس مينيسترلىگىنىڭ «استانا» جانە قازاقستان ۇلتتىق ۇلانى «ورتالىق» وڭىرلىك قولباسشىلىقتارىنىڭ وكىلدەرى مەن بولىمدەرىنىڭ جەكە قۇرامدارى, سونىمەن قوسا, تاجىك-اۋعان, اۋعان سوعىسىنىڭ ارداگەرلەرى, پاتريوتتىق كلۋب وقۋشىلارى, وبلىستاعى جوو ستۋدەنتتەرى, مەكتەپ وقۋشىلارى قاتىسپاق.
ميراس اسان,
«ەگەمەن قازاقستان»
قاراعاندى
