كapital.kz: رەسەيلىك بانكتەر قازاقستاندىق تۇتىنۋشىلارىنان ايىرىلۋدا
ءبىر جىلدا رەسەيلىك بانكتەردىڭ قازاقستانداعى ءتورت ەنشىلەس ۇيىمى كرەديتتەرىنىڭ جيىنتىق كولەمى 161 ملرد تەڭگەگە ازايدى. قازاقستان ەكىنشى دەڭگەيلى بانكتەرىنىڭ قارىز پورتفەلى 2017 جىلعى اقپاننىڭ اياعىندا 15,14 ترلن تەڭگەگە دەيىن 3,1%-عا قىسقاردى. ءبىر جىلدا رەسەيلىك بانكتەردىڭ قازاقستانداعى ءتورت ەنشىلەس ۇيىمى كرەديتتەرىنىڭ كولەمى 11,3%-عا, 1,43 ترلن تەڭگەدەن 1,27 ترلن تەڭگەگە ازايدى.
ەلدەگى بانكتەردىڭ جالپى قارىز پورتفەلىنىڭ جالپى كولەمنەن ولاردىڭ ۇلەسى ءبىر جىلدا 9,1%-دان 8,4%-عا دەيىن قىسقاردى. سونىڭ ىشىندە سبەربانك نەسيەلەرىنىڭ كولەمى 135,7 ملرد (12,6%) جوعالتىپ, 940,3 ملرد تەڭگەنى قۇرادى. 2016 جىلعى مامىردىڭ اياعىندا تريلليونەرلەر تىزىمىنەن شىعىپ, شىلدەنىڭ سوڭىندا بۇل تىزىمگە قايتا كىردى, ال كەلەسى ايدا تىزىمنەن ءبىرجولاتا شىعىپ قالدى.
قازاقستانداعى ەكىنشى ءىرى رەسەيلىك الفا-بانك قارىز پورتفەلى 2017 جىلعى اقپاننىڭ سوڭىندا 33,2 ملرد تەڭگەگە (20,9%) ازايىپ, 125,7 ملرد تەڭگەنى قۇراپ وتىر.
2016 جىلدىڭ العاشقى ەكى ايىمەن سالىستىرعاندا 2017 جىلعى قاڭتار-اقپاندا ءوسىم كورسەتكەن جالعىز رەسەيلىك بانك – حوۋم كرەديت بانك. ونىڭ قارىز پورتفەلى ءبىر جىلدا 21,3 ملرد (21,1%) تەڭگەگە ءوسىپ, 122,1 ملرد تەڭگەنى قۇرايدى.
Forbes.kz: نەمىس ينۆەستورلار قازاقستاننان التىن ىزدەيدى
Aurum Deutschland AG كومپانياسىنىڭ ۇلەسكەر كومپانياسى «Aurum Deutschland» جشس جامبىل وبلىسى قورداي اۋدانىندا تاۋ-كەن-مەتاللۋرگيا كەشەنى جوباسىن باستادى. كەن ورنىنان اتالعان كومپانيا 100 توننا التىن وندىرمەك.
2016 جىلى باستالعان گەولوگيالىق بارلاۋ جۇمىستارىن «لاتون-گەوسەرۆيس» جشس باستاعان. بارلاۋ جۇمىستارى 2021 جىلعا دەيىن جالعاسپاق. ال بيىل جوبا بويىنشا الدىن الا تەحنيكالىق-ەكونوميكالىق نەگىزدەمەسى اياقتالادى. 2019 جىلى تاۋ-كەن-مەتاللۋرگيا كومبيناتىنىڭ قۇرىلىسى قولعا الىنباق.
وسى جۇمىستار اياقتالعاننان كەيىن گاگارينسكوە, شوقپار, قاراتاس, ىرعايتى, تاسپولى, مايبۇلاك, شىعىس كەن ورىندارىنان التىن وندىرىلە باستايدى.
جوبا تولىعىمەن ىسكە قوسىلعاننان كەيىن جىلىنا 5 توننا التىن, 120 توننا كۇمىس شىعارىلادى. وسىنىڭ ارقاسىندا Aurum Deutschland كومپانياسى قازاقستاندا التىن مەن كۇمىس ءوندىرىسى بويىنشا كولەمى جاعىنان ءۇشىنشى ءىرى كومپانيا بولماق.
Vlast.kz: الماتى ساۋلەتشىلەرى ەسكى ورتالىقتا ءزاۋلىم ءۇي سالۋعا الاڭداۋلى
Urban Forum Almaty جوباسىنىڭ قاتىسۋشىلارى جۇرتشىلىققا اشىق حات جازدى. حاتتا ولار الماتى قالاسىنداعى تولە بي كوشەسىنەن تومەنىرەك پانفيلوۆ كوشەسىنىڭ بويىنا كوپقاباتتى تۇرعىن ءۇي قۇرىلىسى قولعا الىنعانىنا الاڭداۋشىلىق بىلدىرگەن.
ولاردىڭ پىكىرىنشە, جاڭا قۇرىلىس قالانىڭ تاريحي ساۋلەتىن بۇزىپ تۇر.
«بيىك عيمارات ماڭايداعى الاسا ۇيلەرگە كۇن تۇسىرمەيدى, پانفيلوۆ كوشەسى بويىنداعى كولىك كەپتەلىسىن تۋدىرىپ, قوزعالىستى بوگەيدى. سونىمەن قاتار, بۇل ماڭايعا مۇنداي بيىك ۇيلەردىڭ سالىنۋى قالا ورتالىعىندا قالىپتاسقان تاريحي عيماراتتاردىڭ كورىنىسىن بۇزادى» دەلىنگەن اشىق حاتتا.
الماتىنىڭ ەسكى ورتالىعىندا 30-جىلدارى سالىنعان تاريحي عيماراتتار بار.
قالا ساۋلەتشىلەرى شاھار باسشىلىعىنا بيىك عيماراتتاردى قالانىڭ باسقا جەرلەرىنە سالۋدى ۇسىنادى.
ايتا كەتەيىك, الماتى قالاسىنداعى پانفيلوۆ – تولە بي – بوگەنباي باتىر – فۋرمانوۆ كوشەلەرى اراسىندا Exclusive Construction كومپانياسى Panfilov اتتى جاڭا تۇرعىن ءۇي قۇرىلىسىن قولعا العان بولاتىن. 19 050 شارشى مەتر ايماقتى الاتىن نىسان 2018 جىلى سالىنىپ ءبىتۋى ءتيىس.
Lsm: مۇناي وڭدەۋ زاۋىتتارى جەكەشەلەندىرىلەدى
«سامۇرىق-قازىنا» ۇلتتىق ءال-اۋقات قورى» اق اتىراۋ مۇناي وڭدەۋ زاۋىتىن جەكەشەلەندىرۋ ادىستەرىن ءالى ناقتىلاعان جوق, دەپ حابارلايدى قوردىڭ ءباسپاسوز قىزمەتى.
زاۋىتتى جەكەشەلەندىرۋ جۇمىستارى ءاۋ باستا 2016-2020 جىلدار ارالىعىنا جوسپارلانعان. ازىرگە ناقتى قاي كەزدە ساتىلاتىنى بەلگىسىز.
«اتىراۋداعى مۇناي وڭدەۋ زاۋىتىن جەكەشەلەندىرۋ تۋرالى ناقتى شەشىم شىعىسىمەن, «قازمۇنايگاز» ۇلتتىق كومپانياسى الەۋەتتى ينۆەستورلار ىزدەي باستايدى. زاۋىتتىڭ باعاسى ينۆەستورلاردىڭ سۇرانىسىنا قاراي بەلگىلەنەدى.
ايتا كەتەيىك, قازىرگى تاڭدا اتىراۋ مۇناي وڭدەۋ زاۋىتى «قازمۇنايگاز» ۇلتتىق كومپانياسى» اق-تىڭ سەرىكتەس كاسىپورنى سانالادى.
بۇگىندە ءاموز جاڭعىرتۋ جۇمىستارى قارىزعا الىنعان قاراجات ەسەبىنەن جۇرگىزىلۋدە. ال ونى قايتاراتىن قارجى مۇناي وڭدەۋ تاريفتەرى ەسەبىنەن تولەنەدى. قوسىمشا قارىز الۋ جوسپاردا جوق.
قازاقستان ەنەرگەتيكا ءمينيسترى قانات بوزىمباەۆتىڭ پىكىرىنشە, ەلدەگى ءۇش مۇناي وڭدەۋ زاۋىتتارى دا جەكەشەلەندىرىلۋى ابدەن مۇمكىن.
دايىنداعان باۋىرجان مۇقانوۆ,
"ەگەمەن قازاقستان"
