«جۇمىسپەن قامتۋدىڭ جول كارتاسى-2020» باعدارلاماسىن جۇزەگە اسىرۋ ماقساتىندا تاراز مەملەكەتتىك پەداگوگيكالىق ينستيتۋتىنىڭ ءتۇلەكتەرى ءۇشىن بوس جۇمىس ورىندارىنا ارنالعان جارمەڭكە ءوتتى. اتالعان شاراعا 900-گە جۋىق ستۋدەنت پەن 80-نەن استام جۇمىس بەرۋشى قاتىستى.
جىل سايىن ۇيىمداستىرىلاتىن ءداستۇرلى جارمەڭكە جاستارعا بۇگىندە قاي سالا ماماندارىنا سۇرانىس كوپ نەمەسە تاپشى ەكەندىگىن جانە ەڭبەك ءوتىلىنسىز-اق جۇمىسقا ورنالاسۋعا بولاتىندىعىن انىقتاۋعا كومەكتەسەدى. سونىمەن قاتار, «ديپلوممەن – اۋىلعا!» جوباسىن جۇزەگە اسىرۋعا دا مول ءمۇمكىندىك بەرەدى. ءوز ءسوزىندە ينستيتۋت رەكتورى داريا قوجامجاروۆا اتالعان شارانىڭ ءمانى مەن ماڭىزىنا كەڭىنەن توقتالىپ, جۇمىسقا ورنالاسۋعا نيەتتى جاستارعا مەملەكەتتىك باعدارلامانىڭ تيىمدىلىگىن ءتۇسىندىردى.
– ەلباسى قازاقستان حالقىنا ارناعان جولداۋىندا بارلىق قازاقستاندىقتاردى مەملەكەت يگىلىگى جولىنداعى ەڭبەككە شاقىردى. ەڭبەك شەشۋشى ۇلتتىق فاكتور ەكەنىن ۇعىندىرىپ, جالپىعا ورتاق ەڭبەك قوعامى يدەياسىن ۇسىندى. ءالبەتتە, مەملەكەت باسشىسىنىڭ ستراتەگيالىق تاپسىرمالارىن ورىنداۋدا ەل جاستارىنىڭ ءرولى زور. سونداي-اق, بۇل ءىس-شارا جاستار اراسىنداعى جۇمىسسىزدىق ماسەلەسىن شەشەتىن ماڭىزدى مەحانيزم بولىپ تابىلادى, – دەدى داريا پەرنەشقىزى.
جارمەڭكەگە مەكتەپكە دەيىنگى جانە ورتا ءبىلىم بەرۋ ۇيىمدارى قاتىسىپ, ءوز مەكەمەلەرىندەگى بوس جۇمىس ورىندارىن ۇسىندى. ستۋدەنتتەر بۇل مۇمكىندىكتى پايدالانىپ, ءتيىستى مەكەمەلەرگە ءتۇيىندەمەلەرىن جولدادى. بۇل جاستار اراسىنداعى جۇمىسسىزدىق ءماسەلەسىن جويۋعا سەپتەسەتىن بولادى.
حاميت ەسامان,
«ەگەمەن قازاقستان»
جامبىل وبلىسى
