تابيعاتتىڭ وسىنداي ءولىارا شاعىندا جىل قۇستارىنىڭ قىزىلجار وڭىرىنە ۇشىپ كەلۋى جۇرتشىلىق ءۇشىن تاڭعالارلىق قۇبىلىس بولدى. ەرتە جەتكەن قۇستاردىڭ لەگىن قۇس تورەسى – اققۋلار باستاپ كەلىپ, وبلىس ورتالىعى ىرگەسىندەگى كولگە قوندى. بۇل توعانعا №2 پەتروپاۆل جىلۋ-ەلەكتر ستانساسىنان اققان جىلى سۋ ۇزدىكسىز قۇيىلاتىندىقتان, قاتپايدى. قاز-ۇيرەكتەر مەن تىرنالاردىڭ جىلى كانال جاقتى پانالاۋ سەبەبى سوندىقتان.
– تابيعاتتىڭ جىلىنار مەزگىلى «تاققا» مىنەتىن شاق. بىراق سينوپتيكتەر جورامالداعان «ەرتە كوكتەم» ءالى كەشەۋىلدەپ جاتىر. ايتپەسە, قۇستار ۇيا سالىپ, بالاپان ءوربىتەتىن مەكەنىنە ۋاقىتىندا كەلۋدەن قاتەلەسكەن جوق. قازىر تابيعاتتىڭ «مىنەزىن» ءتۇسىنۋ قيىن بولىپ بارادى. ونى ادامدار ءتۇگىل قۇستار دا ايىرا الماي جاتادى. تاماق تاۋىپ جەۋ جاعى عانا قيىندىق كەلتىرمەسە, توڭا قويماسى انىق, دەيدى جەرگىلىكتى ورنيتولوگتار.
كۇننىڭ سالقىندىعى اسەر ەتتى مە, الدە ۇزاق ساپار قالجىراتتى ما, قۇستار كوبىنە جىلى توعان مەن كانال ماڭايىندا عانا ۇشىپ-قونىپ ءجۇر. ادامداردان اۋلاق بولۋعا تىرىسادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
