ونىڭ قانداي تۋىندىسىن الساڭ دا, قازاق ەلىنىڭ بايتاق دالاسى مەن قالاسى, تىرشىلىك يەلەرى جاراسىم تاۋىپ تۇرادى. وتكەن اپتادا ەلوردا تورىندەگى وقۋشىلار سارايىنىڭ «استانا ارت لاين» گالەرەياسىندا ونەر يەسىنىڭ «شابىت» اتتى كورمەسى ۇيىمداستىرىلعان ەدى. وعان شىنىبايدىڭ 56 تۋىندىسى قويىلعان.
بۇل تۋىندىلاردىڭ نەگىزگى جەلىسىن تابيعات تىلسىمدارى قۇرايدى ەكەن. اسىرەسە, ءتورت مەزگىلدى ءتۇگەندەگەن شىعارمالار, الماتىنىڭ تابيعاتى, الاتاۋ باۋرايىنداعى بوتانىڭ كوزىندەي ەسىك كولى ەرەكشە كورىنىس تاپقان.
قازاقستان سۋرەتشىلەر جانە ەۋرازيا ديزاينەرلەر وداقتارىنىڭ مۇشەسى, قازاق ۇلتتىق ونەر ۋنيۆەرسيتەتىنىڭ وقىتۋشىسى شىنىباي ءپىرىمباەۆتىڭ كىندىك قانى تامعان جەرى ارال وڭىرىندەگى قاراتەرەڭ اۋىلى دەسەك, سول تۋعان توپىراعىنا ارناعان تۋىندىسى سۋرەتشىنىڭ وزەگىن ورتەڭگە ونگەن گۇلدەي جارىپ شىققانى ايداي انىق. وي مەن بوياۋدى ۇشتاستىرا وتىرىپ, قىلقالامدى اق قاعازدىڭ بەتىنە اپارعاندا ادەمى شىعارمالار دۇنيەگە كەلىپتى. جالپى, جوعارى دەڭگەيدەگى كاسىبي قىلقالام شەبەرى شىنىباي شىنايى شابىت يەسى, سونداي-اق, كلاسسيكالىق اكادەميالىق دەڭگەيگە جەتكەن سۋرەتشى دەۋگە بولادى. شەبەردىڭ سۇيىكتى موتيۆى – تۋعان جەر تابيعاتىنىڭ سۇلۋلىعىن كورسەتۋ باستى ماقساتى ەكەنىن جوعارىدا ايتتىق. سول تۋىندىلارىنىڭ باستى ەرەكشەلىگى – ءتۇستەرگە وتە باي, بوياۋى قانىق شىعىپ, قاراپ تۇرعاندا ايىزىڭدى قاندىرادى.
ماسكەۋدەگى سۋريكوۆ اتىنداعى كوركەمسۋرەت اكادەمياسىن بىتىرگەن سۋرەتشىنىڭ بۇل كورمەسىندەگى تۋىندىلاردان قازاق جۇرتىنىڭ بۇكىل تىنىس-تىرشىلىگى مەن مۇندالاپ تۇرعانداي. كورمەنىڭ اشىلۋ سالتاناتىندا قازاقتىڭ زيالى قاۋىم وكىلدەرى شىنىبايدىڭ شىمىر تالانتىنا ءتانتى بولۋلارىمەن قاتار, سۋرەتتەرىنىڭ تەرەڭ مازمۇنىن تالداپ, ءدان ريزالىقتارىن ءبىلدىرىپ جاتتى. كورمە سوڭىندا مادەنيەت سالاسىنىڭ ۇزدىگى ەۋرازيا ديزاينەرلەر وداعىنىڭ مەدالىمەن ماراپاتتالعانىن ەرمەك اسىلحان جەتكىزدى.
بەكەن قايرات ۇلى,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
