وراسان قاراجاتتى قاجەت ەتسە دە, بۇل كۇندە الماتىنىڭ قارا بازارلارى بىرتىندەپ كەلمەسكە كەتۋدە. ورتالىقتاعى بۇرىنعى ساۋدا ورىندارى دا جاڭارتىلۋدا. قىسقاسى, بۇل ىستە ىلگەرىلەۋ بار.
ماسەلەن, قالا اكىمى باۋىرجان بايبەك جۇمىس بابىندا قالانىڭ جاڭارعان ساۋدا بازارلارىنىڭ جۇمىستارىن تەكسەردى. جۇرتتىڭ ءبارى بىلەتىن «كوك بازار» ساۋدا ورتالىعىندا جانە زاماناۋي تالاپ-كەلبەتكە يە «Mizam» اتتى العاشقى كوتەرمە-تاراتۋ ورتالىعىندا بولدى. ساتۋشىعا دا, ساۋدالاسۋشىعا دا بارىنشا ىڭعايلى ەتىپ سالىنعان «Mizam» بازارى الەمگە تانىمال فرانتسۋزدىڭ اتاقتى «رانجيس» بازارىنىڭ جوباسىنا نەگىزدەلگەن.
«بۇل جوبا مەملەكەت-جەكەمەنشىك سەرىكتەستىگىنىڭ شىنايى ۇلگىسى. وسى جوبانى قالا قۇرىلىسى كەڭەسىندە قورعاعان كەزدە ءبىز بازار ەڭ ارزان بولادى دەپ ۋادە بەرگەن ەدىك, وسى ساياساتتى ۇستانامىز», دەدى «Mizam» ورتالىعىنىڭ باس ديرەكتورى دوسمۇحان كەرىمباەۆ
«Mizamنىڭ» نەگىزگى تۇجىرىمدامالارىنىڭ ءبىرى – جەتكىزۋشىلەرمەن اراداعى دەلدالسىز, تىكەلەي جۇمىس ءىستەۋ, ناتيجەسىندە تاۋار باعاسى تومەن. جوبا مەملەكەت-جەكەمەنشىك سەرىكتەستىگى نەگىزىندە جۇزەگە استى, قۇرىلىس تولىق جەكە ينۆەستيتسيا ەسەبىنەن سالىندى. جوبا قۇنى 3,1 ملرد تەڭگە جانە مۇندا 2 مىڭعا جۋىق جۇمىس ورنى قۇرىلعان.
الماتى اكىمى ساۋدا بازارلارىن جاڭارتۋ باعدارلاماسى اياسىندا بيىلعى جىلدىڭ اقپان ايىندا ىسكە قوسىلعان «كوك بازار» ساۋدا ورتالىعىن دا ارالاپ شىقتى. پاۆيلون الاڭى 20 مىڭ شارشى مەتر, ونىڭ 10 مىڭ شارشى مەترىنە ساۋدا الاڭى ورنالاسقان. بازاردىڭ ەكىنشى بولىگىندە 400 ورىندى ەكى قاباتتى پاركينگ بار. جوبانىڭ قۇنى 2,5 ملرد تەڭگەنى قۇرايدى. جاڭارعان بازاردا 500-دەن استام جاڭا جۇمىس ورنى پايدا بولدى.
وسىلايشا الماتىدا ساۋدا ورىندارىن قاۋىپسىزدىك پەن سانيتارلىق نورمانىڭ بارلىق تالاپتارىنا ساي كەلەتىندەي ەتىپ جاڭا فورماتقا كوشىرۋ جۇمىستارى كەڭ قارقىن الۋدا.
ايناش ەسالي,
«ەگەمەن قازاقستان»
الماتى
