اقىلبەك كامالدينوۆ اۋعانستاندىق ارىپتەستەرىنە قازاقستانداعى ساياسي جانە الەۋمەتتىك-ەكونوميكالىق جاڭعىرۋلار تۋرالى, ەلباسىنىڭ جولداۋى ءجونىندە بايانداپ بەردى. ول ەلىمىزدە وتكىزىلەتىن حالىقارالىق شارالارعا, اتاپ ايتقاندا, شانحاي ىنتىماقتاستىق ۇيىمىنىڭ ءسامميتى, يسلام ىنتىماقتاستىعى ۇيىمى, ەكسپو-2017 سىندى شارالارعا اۋعانستاننىڭ قاتىسۋى ماڭىزدى ەكەنىن ايتتى. ىستانبۇل پروتسەسى, اۋعانستان بويىنشا ايماقتىق ەكونوميكالىق ىنتىماقتاستىق, بۇۇ-نىڭ ورتالىق ازيا ەكونوميكاسىنا ارنالعان باعدارلاماسى سىندى اۋعانستانعا قاتىسى بار كوپتەگەن حالىقارالىق جانە ايماقتىق باعدارلامالارعا ەلىمىزدىڭ بەلسەنە قاتىسىپ جاتقانىنا دا توقتالدى.
ءوز كەزەگىندە, حەكمات حاليل كارزاي قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىنا وراي قۇتتىقتاۋىن جەتكىزدى. ول وسى سايلاۋدا اۋعانستاننىڭ ەش ويلانباستان قازاقستان ءۇشىن داۋىس بەرگەنىن, الداعى ۋاقىتتا ەلىمىزدىڭ قاۋىپسىزدىك كەڭەسىندەگى باستامالارى مەن جۇمىسىن قولداۋعا ءازىر ەكەنىن ايتتى.
– ءبىز قازاقستاننىڭ اۋعانستانعا كورسەتكەن كومەكتەرى ءۇشىن العىس بىلدىرەمىز. اۋعان ەلى قيىندىققا ۇشىراعاندا سىزدەر دەمەۋ بولىپ, قالىپتاسقان پروبلەمالاردى شەشۋگە كومەك بەردىڭىزدەر. سىزدەر اۋعان جاستارىنا كوپتەگەن ستيپەنديا تاعايىنداپ, قازاقستاننىڭ بەتكە ۇستار وقۋ ورىندارىندا ءبىلىم الۋىنا جاعداي جاسادىڭىزدار. اۋعان جاستارى ءتۇرلى عىلىم سالالارى بويىنشا ساپالى ءبىلىم الۋدا, ولار كۇنى ەرتەڭ ءوز ەلىن العا ءسۇيرەيدى دەپ سەنەمىن, – دەدى حەكمات حاليل كارزاي.
ايتا كەتەيىك, 2009 جىلى قازاقستان مەملەكەتتىك ءبىلىم بەرۋ باعدارلاماسىنىڭ اياسىندا اۋعانستاندىق مىڭ ستۋدەنتكە ءبىزدىڭ ەلىمىزدە جوعارى جانە ورتا-تەحنيكالىق ءبىلىم الۋعا جاعداي جاسالعان بولاتىن. سونداي-اق, سول ەلدە الەۋمەتتىك ماڭىزى بار ينفراقۇرىلىمداردى قالپىنا كەلتىرۋ ءۇشىن گۋمانيتارلىق كومەك كورسەتكەن ەدى.
حەكمات حاليل كارزاي قازاقستاننىڭ 2 ميلليون دوللار ينۆەستيتسياسى ءۇشىن العىس ءبىلدىرىپ, بۇل قارجى ءبىراز ماسەلەنى شەشۋگە كومەكتەسكەنىن ايتتى. ونىڭ ايتۋىنشا, اۋعانستاننىڭ ۇلتتىق بىرلىك ۇكىمەتى ەلدەگى احۋالدى تۇراقتاندىرۋ ءۇشىن بارلىق كۇش-جىگەرىن جۇمساۋدا.
كونسۋلتاتسيا كەزىندە تاراپتار اۋعانستان يسلام رەسپۋبليكاسىنىڭ پرەزيدەنتى موحامماد اشراف گانيدىڭ 2015 جىلى قازاقستانعا جاساعان رەسمي ساپارى اياسىندا قول جەتكىزىلگەن كەلىسىمدەردىڭ جۇزەگە اسىرىلۋ بارىسىن تالقىلادى. حالىقارالىق كۇن تارتىبىندە تۇرعان وزگە دە وزەكتى ماسەلەلەر بويىنشا ءوزارا پىكىر الماستى.
ارنۇر اسقار,
«ەگەمەن قازاقستان»
