سەمەي قالاسىنا ارنايى جۇمىس ساپارىمەن كەلگەن ىشكى ىستەر مينيسترلىگىنىڭ توتەنشە جاعداي بويىنشا كوميتەتى توراعاسىنىڭ ورىنباسارى مارات كۋلديكوۆ پەن شىعىس قازاقستان وبلىسى بويىنشا تج دەپارتامەنتىنىڭ باسشىسى نۇرلان مادياروۆ تاسقىن سۋعا بايلانىستى جاعدايلاردى باقىلاپ كوردى.
ساپار بارىسىندا مارات كۋلديكوۆ №2 «ءورت ءسوندىرۋ جانە اۆاريالىق-قۇتقارۋ» وتريادىنىڭ تىڭعىلىقتى دايىندىعىن تەكسەردى. جانە سەمەي قالاسىنداعى شىعىس وڭىرلىك اەروموبيلدىك قۇتقارۋ توبىنىڭ 7-ءشى ءبولىمىنىڭ دە شۇعىل جاعدايلار ورىن العان كەزدەگى دايارلىقتارى دا نازاردان تىس قالمادى. ەرتىستەگى سۋ اعىنى, سەڭدەر قوزعالىسى باقىلاۋعا الىنعان. ءبۇگىندە سەمەي قالاسى بويىنشا 81 991 تەكشەمەتر اعىن سۋ سورىپ الىنعان.
ەرىگەن قار سۋى قالانىڭ بىرنەشە كوشەلەرىن, اتاپ ايتقاندا, تۋريستىك, 108 جانە 112, رۋبتسوۆسكايا, 57 ا, وگورودنىي 60 مەكەنجايلارىندا ورنالاسقان جەر ۇيلەردى الىپ كەتكەن. بۇل جەرلەردە سۋدى سورىپ الۋ جۇمىستارى ءجۇردى. جانە سەمەيدىڭ شىعىس كەنتىندەگى جومارتباەۆ 56 مەكەنجايىندا سۋ جيناقتاپ, سورۋ جۇمىستارى ءجۇرىپ جاتىر.
ەرتىستە قالىڭ مۇزدىڭ قاباتى سوگىلدى. بىراق, ازىرشە وزەننىڭ سۋى كوتەرىلگەن جوق. سەڭنىڭ توقتاپ قالۋى زاتون اۋماعىنىڭ 1-شاعىن اۋدانىندا بايقالادى. قازىرگى مىندەت – وسى سەڭدەردى وزەن اعىسىمەن جىلجىتىپ جىبەرۋ. سول ءۇشىن سۋ دەڭگەيىنىڭ مونيتورينگى كۇن سايىن زەرتتەلۋدە. سەمەي قالالىق تج باسقارماسىنىڭ ماماندارى ايتقانداي, بۇگىندە سۋ دەڭگەيى 202 سم قۇراپ وتىر. جاعداي ازىرشە ءبىرقالىپتى.
راۋشان نۇعمانبەكوۆا
سەمەي
