اتالمىش جوبا 1990 جىلدان باستاپ بالالار شىعارماشىلىعى ارقىلى مادەنيەتتەر اراسىنداعى كەلىسىمدى ورناتۋ جانە قورعاۋ ماقساتىندا جۇمىس ىستەپ, ءبىلىم جانە مادەنيەت سالاسىنداعى يۋنەسكو باعدارلامالارىن دامىتىپ كەلەدى.
ايتا كەتسەك, «Mitsubishi Asian Children’s Enikki Festa» جوباسىن جىل سايىن «Mitsubishi» كورپوراتسياسىنىڭ قوعاممەن بايلانىس جونىندەگى كوميتەتىنىڭ قولداۋىمەن جاپونيا ۇلتتىق يۋنەسكو اسسوتسياتسيالارى فەدەراتسياسى جانە ازيا-تىنىق مۇحيتى ايماعىنىڭ يۋنەسكو كلۋبتارى مەن اسسوتسياتسيالارىنىڭ فەدەراتسياسى ۇيىمداستىرىپ وتىرادى.
«Mitsubishi Asian Children’s Enikki Festa 2017-2018» جوباسىنىڭ جاڭا توپتاماسىن باستاۋ قارساڭىندا ءوتىپ جاتقان بۇل كورمەدە بانگلادەش, بۋتان, برۋنەي-دارۋسسالام, ۆەتنام, ءۇندىستان, يندونەزيا, كامبودجا, قىتاي, كورەيا, لاوس, مالايزيا, مالديۆ, موڭعوليا, ميانما, نەپال, پاكىستان, سينگاپۋر, قىتايلىق تايپەي, تايلاند, تيمور-لەستە, فيليپپين, شري-لانكا جانە جاپونيا ەلدەرىنىڭ 2015-2016 جىلعى جوبا جەڭىمپازدارىنىڭ كارتينالارى ۇسىنىلدى. سونداي-اق, فينالعا شىققان قازاقستاندىق سەگىز جەڭىمپازدىڭ اسەرلى جۇمىستارى دا كورمەگە كەلۋشىلەر ىقىلاسىنا بولەندى.
ءىس-شاراعا الماتىداعى يۋنەسكو كلاستەرلىك بيۋروسىنىڭ ديرەكتورى اندرەي شەۆەلەۆ, قازاقستاننىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ ءجانە مەملەكەتتىك ورتالىق مۋزەيى وكىلدەرى قاتىسىپ, بايقاۋعا اتسالىسقان جەتكىنشەكتەرگە شىعارماشىلىق شىڭدالۋ مەن جەتىستىكتەر تىلەستى, ەلىمىزدىڭ جارقىن بولاشاعىنا دەگەن ءۇمىتتەرىن ءبىلدىردى.
اتالمىش جوبانىڭ الماتىلىق ءۇش جەڭىمپازىنا ەستەلىك سىيلىقتار بەرىلسە, يۋنەسكو كلۋبتارىنىڭ جاڭا مۇشەلەرىنە رەسمي تۇردە كلۋب مۇشەلىگىنىڭ پاسپورتى مەن توسبەلگىسى تابىس ەتىلدى. كورمە كورەرمەندەر نازارىنا 14 ساۋىرگە دەيىن ۇسىنىلماق.
ميرا بايبەك,
«ەگەمەن قازاقستان»
الماتى
