وندا قازاقستان رەسپۋبليكاسىنىڭ سىبايلاس جەمقورلىققا قارسى ستراتەگياسىن ىسكە اسىرۋ جونىندەگى 2015-2017 جىلدارعا ارنالعان ءىس-شارالار جوسپارىنىڭ جانە «سىبايلاس جەمقورلىققا قارسى ءىس-قيمىل تۋرالى» زاڭنىڭ ورىندالۋ بارىسى قارالدى.
وتىرىستى اشقان گۇلشارا ابدىقالىقوۆا مەملەكەت باسشىسىنىڭ تاپسىرماسىمەن سىبايلاس جەمقورلىققا قارسى ستراتەگياعا جانە «سىبايلاس جەمقورلىققا قارسى ءىس-قيمىل تۋرالى» زاڭعا جەمقورلىق ارەكەتتەردىڭ الدىن الۋ ءىسى نەگىز بولعانىن اتاپ ءوتتى. ال بۇل رەتتەگى جۇمىستىڭ نەگىزگى باعىتتارى: مەملەكەتتىك قىزمەت سالاسىندا, كۆازيمەملەكەتتىك جانە جەكە- مەنشىك سەكتوردا, سوت جانە قۇقىق قورعاۋ ورگاندارىندا جەمقورلىققا قارسى تۇرۋ, قوعامدىق باقىلاۋ ينستيتۋتىن ەنگىزۋ, سىبايلاس جەمقورلىققا قارسى مادەنيەت دەڭگەيىن قالىپتاستىرۋ جانە حالىقارالىق ىنتىماقتاستىقتى دامىتۋ.
جيىن اياسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ا.شپەكباەۆتىڭ بايانداماسى تىڭدالدى. جالپى, بۇگىندە سىبايلاس جەمقورلىققا قارسى ستراتەگيانى ىسكە اسىرۋ جونىندەگى ءىس-شارالار جوسپارى 95% ورىندالسا, وسى جىلى ول تولىعىمەن اياقتالادى.
«سىبايلاس جەمقورلىققا قارسى ءىس-قيمىل», «قوعامدىق كەڭەستەر تۋرالى», «اقپاراتقا قول جەتكىزۋ تۋرالى» جاڭا زاڭداردىڭ قابىلدانۋى مەملەكەتتىك ينستيتۋتتار قىزمەتىنىڭ جاريالىلىعىن جانە ولاردىڭ قوعام باقىلاۋىندا بولۋىن قامتاماسىز ەتۋگە ءمۇمكىندىك بەرەدى. بۇعان قوسا, جەمقورلىققا قارسى مونيتورينگ, سىبايلاس جەمقورلىق قاتەرلەرىنە جۇيەلى تالداۋ جاساۋ, سىبايلاس جەمقورلىققا قارسى شەكتەۋلەر, مادەنيەت جانە اعارتۋ سياقتى قۇقىقتىق قۇرالداردىڭ جيىنتىعى تاجىريبەگە كەڭىنەن ەنگىزىلدى.
2016 جىلى وكىلەتتى ورگان 156 مەملەكەتتىك ورگاننىڭ قىزمەتىندەگى سىبايلاس جەمقورلىق قاتەرىنە تالداۋ جاسادى, جەمقورلىق قۇقىق بۇزۋشىلىقتار جاساۋعا اسەر ەتكەن جاعداياتتاردى جويۋ ءجونiندە 2 مىڭنان اسا ۇسىنىس جاسالدى. «مەملەكەتتىك ورگاننان مەملەكەتتىك ورگانعا», «اكىمدىكتەن اكىمدىككە» جوبالارى اياسىندا مينيسترلىكتەردە جانە جەرگىلىكتى اتقارۋشى ورگانداردا ءتۇسىندىرۋ جۇمىستارىن جۇرگىزۋ ماقساتىمەن قىزمەتشىلەرمەن كەزدەسۋلەر ءوتتى. باق-تا 80-نەن استام ايدار اشىلدى.
بۇعان قوسا, جەمقورلىق ءۇشىن بەلگىلەنەتىن جازاعا قاتىستى بۇلتارتپاۋ قاعيداتى ساقتالىپ وتىر. 2016 جىلى رەسپۋبليكالىق دەڭگەيدەگى – 18, وبلىستىق دەڭگەيدەگى – 59, قالالىق جانە اۋداندىق دەڭگەيدەگى 134 باسشى قىلمىستىق جاۋاپكەرشىلىككە تارتىلدى. انىقتالعان 13,6 ملرد تەڭگە كولەمىندەگى زالالدىڭ 5,3 ملرد تەڭگە قارجىلىق وتەمى نەمەسە 39%-ى وتەلدى.
مەملەكەتتىك حاتشى وتىرىس قورىتىندىسى بويىنشا سىبايلاس جەمقورلىققا قارسى ستراتەگيانى ىسكە اسىرۋ جونىندە كەزەكتى جوسپار ازىرلەۋدى تاپسىردى.
ءلايلا ەدىلقىزى,
«ەگەمەن قازاقستان»
