جىگەرى مەن ءجۇزىنىڭ جىلىلىعىن جوعالتپاعان اجەمىز جۋىردا تاعى دا جارق ەتىپ كەلدى. جەتىسۋ وڭىرىندە ءىلياس جانسۇگىروۆ اتىنداعى مادەنيەت سارايىندا ارداگەرلەر ۇيىمىنىڭ 30 جىلدىق مەرەيتويىنا وراي وتكەن «قارتتاردىڭ دا ونەرگە بار تالاسى» اتتى ۇلكەن كونتسەرتتە اتا-اپالاردىڭ ەڭ ۇلكەنى دە وسى ءۇمىتجان بوتباەۆا بولعان.
سۇيكىمدى ءبىر ءبيشى اجەمىز الماتى وبلىسى, جامبىل اۋدانىنىڭ تۇرعىنى. بۇل كىسى ءۇشىن بي – ءومىرىنىڭ ءمانى, دەنساۋلىعىنىڭ تىرەگى ەكەندىگىن ايتادى. سەنسەڭىزدەر, ەسىن بىلگەلى بەرى بيلەپ كەلەدى. وتە كىشكەنتاي كۇنىندە اكە-شەشەسى جەتەكتەپ تۇرىپ, توي-تومالاققا بارعاندا بيلەتەدى. جۇرت ونىڭ تاماشا بيىنە تاڭ-تاماشا قالىپ, ريزاشىلىقپەن قوشەمەت كورسەتەدى ەكەن.
– سودان كەيىن مەكتەپتە دە ءبيشى بولدىم. ءبىر كۇنى ءبىزدىڭ مەكتەپكە ايگىلى ءبيشى شارا جيەنقۇلوۆانىڭ ءوزى كەلدى. مەنىڭ بيلەگەنىمدى كورىپ, بالەت ونەرىنە وقۋعا شاقىردى, – دەيدى ونەرلى اجەي.
جازمىش بولار, بىراق ءۇمىتجان اپامىزعا ۇلكەن ساحناعا شىعۋ جاس كەزىندە بۇيىرماپتى. قالاعا بارىپ بي ونەرىن كاسىپقوي تۇرعىدا مەڭگەرۋگە اناسى قارسى بولادى. بويجەتىپ تە ۇلگەرمەگەن قىز قالاعا بارىپ, ءومىرى نەندەي بولادى دەپ ويلايدى عوي. ەسەسىنە ونى اتا-اناسى 20 جاسىندا كۇيەۋگە بەرەدى. بوتباەۆا ءبىراز ۋاقىتقا دەيىن ونەردەن قول ءۇزىپ قالسا دا, كەيىن قايتا بيلەپ جۇرەدى. سودان بەرى دە 30 جىل وتە شىققان ەكەن.
– مەن بارلىق كەزدە بيلەپ كەلە جاتىرمىن. تەك قان ويناتار مۋزىكا بولسىن! مۋزىكانىڭ العاشقى اككوردتارىن ەستىگەن ساتتەن باستاپ-اق, مەنىڭ دەنەم ءوزى قيمىلداي باستايدى. كوبىنەسە, ءوز تانىستارىم مەن جاقىندارىمنىڭ تويىندا بيلەيمىن. بىراق, بوگدە ادامداردىڭ الدىندا بيلەي بەرمەيمىن. ەگەر بيلەمەي قالسام, كەلەسى كۇنى-اق اۋىرىپ قالامىن. دەنساۋلىعىم بيگە تاۋەلدى. ءومىرىمدى بيمەن ورگەن مەن جاستارعا ايتارىم: «مەن سياقتى بيلەسەڭدەر, 100 جاسايسىڭدار», – دەيدى 86 جاستاعى دالا ءبيشىسى.
ايناش ەسالي,
«ەگەمەن قازاقستان»
الماتى
