...وليمپ شىڭىنىڭ ۇشار باسىندا, اقتىق ايقاس الاڭىندا ەكى-اق باتىر قالدى. ءبىرى – 1999 جىلعى الەم چەمپيونى, امەريكالىق ريكاردو حۋارەس, ەكىنشىسى – قازاق ءباھادۇرى, بۇعان دەيىن جالپاق دۇنيەگە اتى بەيمالىم بەكزات ساتتارحانوۆ. ەكەۋى تۇيدەي قۇرداس.
ريكاردو حۋارەس سيدنەي رينگىندە 1996 جىلعى وليمپيادا چەمپيونى, تايلاندىق ساملۋك كامسينگتى, ەۋروپا چەمپيونى, رەسەيلىك كاميل ءجامالۋتدينوۆتى تىزە بۇكتىردى.
ريكاردوعا وليمپيادا «التىنى» اۋاداي قاجەت. سيدنەيدە باس بايگە السا, امەريكا قۇراما شتاتتارىندا كاسىپقوي رينگ كوكجالدارى قۇشاقتارىن ايقارا اشىپ, قارسى الادى. ياعني, سيدنەيدىڭ التىن جۇلدەسى ءوز ەلىندە بىرنەشە ميلليون دوللارلىق كەلىسىمگە جول اشادى. الەمدەگى ەڭ ازۋلى مەملەكەتتىڭ باس باتىرى اتانۋىمەن قاتار, ءبىر-اق ساتتە اۋقاتتى سپورتشىلاردىڭ قاتارىنا قوسىلادى.
– ريكاردو حۋارەسپەن قويان-قولتىق ايقاسقا بارما, – دەدى باس باپكەر تۇرسىنعالي ەدىلوۆ. – اقش-تىڭ بوكس مەكتەبى بۇل جاعىنان وتە كۇشتى. وكپە, باۋىرىڭدى ات تەپكەندەي قىلادى. ۇزاقتان اڭدىسىپ ۇرىسساڭ – تاعى قيىن. ريكاردو ەبىن تاۋىپ, توپەپ ۇرۋى مۇمكىن. ەڭ ىڭعايلىسى – وزىڭە قولايلى ورتا قاشىقتىق. قوس قاپتالعا بۇلت-بۇلت ەتىپ, الدىن وراپ ايقاسساڭ, حۋارەسكە قيىن سوعادى.
– ءبىرىنشى, ەكىنشى راۋندتاردا ورتا قاشىقتىقتان ۇپاي جيناپ ال, – دەدى ەرماحان ىبىرايىموۆ اعاسى. – ريكاردو العاشقى ەكى راۋندتا كوسىلە قويمايدى. ال ءۇشىنشى, ءتورتىنشى راۋندتا رينگتە داۋىل تۋعىزادى. ءشۇۋ دەگەندە ەسەپتى ۇلعايتىپ الساڭ, حۋارەستىڭ ەسى-دەرتى سەنى قۋىپ جەتۋ بولىپ, قاتەلەسۋى مۇمكىن.
اعالارىن مۇقيات تىڭدادى. ريكاردونىڭ ايقاسى باسىلعان بەينەتاسپانى نەشە مارتە پىسىقتاپ كوردى. ءسويتتى دە, اللا تاعالادان مەدەت تىلەدى. جاراتقان يەگە ۇزاق جالبارىنىپ, ءوزىن سابىرعا شاقىردى. كوڭىلى ءبىرتۇرلى ورنىقتى. ءىشى ءبىر جاقسىلىقتى سەزەتىن ءتارىزدى. ...تۋرا تۇركىستاننان اتتانار الدىنداعى ءتۇسى تاعى دا ويىنا ورالدى. كۇمىستەي اپپاق ساقالى بەلۋارىنا تۇسكەن قاريا التىن مەدالدى مۇنىڭ موينىنا ءىلىپ جاتىر ەكەن. الماتى اۋەجايىندا باۋىرى ماقساتقا وسى ءتۇسىن ايتىپ بەردى. «قۇداي قالاسا, ولجالى قايتاتىن شىعارمىن», دەگەن.
ەندى, مىنە, بولات ءجۇمادىلوۆ, ەرماحان ىبىرايىموۆ, مۇحتارحان دىلدابەكوۆ تورتەۋى سيدنەي وليمپياداسىنىڭ فينالدىق باسەكەسىنە كەلە جاتىر. ءتورت بىردەي قازاق بوكسشىسىنىڭ وليمپيادا فينالىنا تابان تىرەۋى – تاريحتا بۇرىن-سوڭدى بولماعان جاعداي.
اۆتوبۋستان سوڭعى ۇزىنشا ورىندىعىندا كولدەنەڭ جاتقان بەكزات قالاي ۇيىقتاپ كەتكەنىن بىلمەي دە قالدى.
بەكزاتتان بۇرىن فينالدىق سىندا بولات ءجۇمادىلوۆ باعىن سىنادى. قازاق بوكسشىلارىنان شىققان تۇڭعىش الەم چەمپيونى. كەيىنگى ءتورت-بەس جىلدا 51 كيلو سالماق دارەجەسى بويىنشا جۇمىر جەردە الدىنا جان سالماعان ساڭلاق. تايلاندىق ۆيدجان پونليدپەن ايقاسقان بولاتتىڭ بابى ەمەس, باعى كەم بولدى. ءجۇمادىلوۆتىڭ جەڭىلگەنىنە ءىشىمىز كۇيىپ, كوزدەن ىستىق جاس پارلادى.
قىرسىققاندا, ەكى جاعىما ەكى بىردەي تاي ءجۋرناليسى وتىرا قالىپتى. مەن باسىمدى تومەن سالىپ, كوز جاسىمدى سۇرتە باستاعانىم سول ەدى, ەكەۋى ەكى جاعىمنان اتىپ تۇرىپ, تۋرا ماڭداي تۇسىمدا قول الىسسا بولماي ما. ءبىر-ءبىرىنىڭ قولىن ۇزاق قىستى. كوز جاسىمدى كورسەتكىم كەلمەي, تۇمسىعىمدى ۇستەلگە تىرەپ وتىرا بەردىم. ۇندەرى جارقىن-جارقىن شىعادى. ءىشىم وتتاي جاندى. ءبىر ءسات ديكتور بەكزات ساتتارحانوۆ پەن ريكاردو حۋارەستى ورتاعا شاقىردى.
...ريكاردو قۇلجانىڭ اسىعىنداي شىمىر. قوڭىرقاي ءجۇزى ايبىندى. ايدىنى اسقان الىپ ەلدىڭ ۇلانى ەكەنى انادايدان كوزگە ۇرادى. ءوز كۇشىنە, بابىنا بەك سەنىمدى. كوزىنەن وت ۇشقىنداپ, جەر تارپىپ تۇر.
بەكزات تا تاس-ءتۇيىن.
ەكەۋى وڭدى-سولدى اڭدىسىپ, ساتىر-سۇتىر ۇرىسقا كىرىستى. تۇلا بويى تارامىس, سۇڭعاق كەلگەن بەكزات سانامالاپ ۇرىپ ءجۇر. ىشتەن, تۇمسىقتان ءدال سوعىپ, الەم چەمپيونىن تىقسىرا ءتۇستى. ريكاردو ساساتىن ەمەس. بولاتتاي بەرىك. جانكەشتى. بەكزاتتى بەتپە-بەت, اشىق ايقاسقا شاقىرادى. بەكزات سارت-سۇرت ۇرىپ, وڭعا ورعيدى, كوزەپ ۇرىپ, سولعا ورعيدى. ءبىر ءسات ريكاردونى شىقشىتتان وڭدىرماي سوقتى دا, شەگىنە بەرە قايتا ءشۇيىلدى.
ريكاردو تىزگىننىڭ قولدان سۋسىپ بارا جاتقانىن ءتۇسىنىپ, بەلسەنە تۇسكەن. جوق. مىنا قازاق تىم سەزىمتال ەكەن. بۇل جۇدىرىعىن ىڭعايلاعانشا, ەكى-ءۇش مارتە سىلتەپ ۇلگەرەدى. ويلانۋعا مۇرشا بەرەتىن ەمەس. ويسىز بوكس – ورعا جىعادى. مىنا قازاقتىڭ ويى دا, جۇدىرىعى دا وقتاي ۇشقىر. ريكاردو اڭدىسقان ايقاستا ۇتىلارىن سەزىپ, بەكزاتتى بۇرىشقا قاماۋعا ارەكەتتەندى. جوق. ساتتارحانوۆ بولات قۇرساۋدى سەتىنەتە سوگىپ, سىتىلىپ كەتە بەردى. بۇل قازاق شەگىنە باسىپ جۇدىرىق سىلتەۋگە, دىڭكەلەتە قۋىپ ءجۇرىپ قايقايتا ساباۋعا اسا شەبەر ەكەن.
ريكاردو ارىستانشا اتىلىپ, سوققى جاۋدىرعان. ەڭبەگى ەش كەتتى. جۇدىرىعى بەكزاتتىڭ قولعابىنىڭ سىرتىنان قايتتى. ال ساتتارحانوۆتىڭ وڭ جۇدىرىعى حۋارەستىڭ شىقشىتىنا جاناي ءتيدى. كوزىنە قان تولعان ريكاردو جۇدىرىعىن تاعى بىلەدى. توپەي ۇرىپ, تاپتاپ وتپەك بولعان. ساتتارحانوۆتىڭ وڭ قولى يەك استىنان سارت ەتە قالدى.
ايتىپ-ايتپاي نە كەرەك, ەكىنشى راۋند بىتكەندە ساتتارحانوۆ وق بويى وزىق تۇردى – 15:4.
الەم چەمپيونى ءۇشىنشى راۋندتا ەسىن جيعانداي بولدى. ەسەبىن تاۋىپ, بەكزاتتى قارا قابىرعانىڭ استىنان الدەنەشە رەت قاۋساتا ۇردى. بەكزاتتىڭ ەرماحاننان سۇراپ كيگەن قىزىل مايكىسى قاق ايىرىلار دەگەنبىز. ەكى-ءۇش سوققىسى شىقشىتقا, يەككە ءتيدى. ساتتارحانوۆ قايىسقان جوق. رينگتەن قول سوزىمدا وتىرعان بىزدەر حۋارەستىڭ سۇراپىل قيمىلىنا شىداماي, ورنىمىزدان تۇرىپ كەتتىك. ساتتارحانوۆ ساتىر-سۇتىر جاۋعان جويقىن جۇدىرىقتىڭ استىنان اسقان ەپتىلىكپەن سىتىلىپ شىقتى. جاي كەتكەن جوق, حۋارەستى تۋرا تۇمسىقتان وڭدىرماي ءتۇيىپ كەتتى.
راۋندتىڭ سوڭىنا قاراي ريكاردو تۇسالعان اتتاي كۇي كەشتى. بەكزاتتىڭ تاسقامال قورعانىسىن امەريكا باتىرى بۇزىپ وتە العان جوق. ماڭدايى تاسقا ءتيىپ, امالسىزدان ساتتارحانوۆتىڭ ىڭعايىنا كونگەن.
حۋارەس ءتورتىنشى راۋندتىڭ العاشقى سەكۋندتارىندا تىزگىندى قولعا العانداي ەدى. جۇدىرىقتىڭ استىندا قالعان بەكزات حاس باتىرلارشا ايقاستى. قۇر قورعانباي, قارىمتا سوققىنى ءۇستى-ۇستىنە جۇمسادى. حۋارەستىڭ ساعى سىنباسا دا, امالى تاۋسىلىپ ەدى.
باسەكەنىڭ سوڭىنا قاراي ەكەۋى دە شالدىعا باستادى. جان الىپ, جان بەرىسكەن جەكپە-جەكتىڭ سايابىر تاپقانى كوڭىلىمىزدى ساباسىنا ءتۇسىردى. بىزگە كەرەگى وسى.
الاش جۇرتى جيىرما جىل سارىلا كۇتكەن التىن مەدال جىلجىعان سەكۋند تىلىمەن بىرگە جاقىنداي ءتۇستى. ال ازۋىن ايعا بىلەگەن اقش-تىڭ 300 ميلليون جانكۇيەرى سيدنەي رينگىندەگى جالعىز «التىننان» – ريكاردونىڭ جەڭىسىنەن كۇدەر ۇزە باستاعان. سوڭعى 15-20 سەكۋندتى, بالكىم, جۇمىر جەردەگى ون ءۇش ميلليون قازاق ءبىر ادامداي سىبىرلاپ, كۇبىرلەپ بىرگە ساناعان شىعارمىز. بەكزات ساتتارحانوۆ – وليمپيادا چەمپيونى!
كوز شاراسىنا ىستىق جاس تۇندى. جانارىم جاساۋراپ تۇرىپ, كورشى تاي جۋرناليستەرىن ءپونليدتىڭ جەڭىسىمەن قۇتتىقتادىم. سوسىن ءوزىمنىڭ قازاق ەكەنىمدى ايتتىم. بەكزات پەن بولاتتى باۋىرىم, دەدىم. ەكەۋىنىڭ اۋىزى اشىلىپ قالدى. سودان بەكزاتقا قاراي قۇستاي ۇشتىم...
* * *
سيدنەيدىڭ شارشى الاڭى شاتتىقتان تەربەلىپ تۇر. جەر تۇبىنەن بارعان ات توبەلىندەي قازاق جانكۇيەرلەرى كوك بايراقتى ارمانسىز جەلپيدى. جۇمىر جەردىڭ نازارى بىزگە, تەك بىزگە عانا اۋعان. جالپاق دۇنيەنى دارگەيىنە كەلتىرگەن ءمۇيىزى قاراعايداي ەلدەردىڭ ءوزى بىزگە قىزىعا ءارى قىزعانا قارايتىنداي. سان مىڭ جاناردان «مۇنداي جاۋىنگەر حالىق اياق استىنان قايدان پايدا بولدى؟», دەگەن تاڭدانىس ۇشقىنىن اڭعارعاندايمىز. مىڭ سان ادام دۋىلداتا قول سوققان سايىن جالىمىز كۇدىرەيە تۇسەدى. «قازاق دەگەن ءبىز بولامىز!», دەيمىز كوك بايراقتى كەرە ءتۇسىپ. «ازيانىڭ ۇلى دالاسىن ەركىن جايلاعان قاھارمان بابالاردىڭ ۇرپاعىمىز!», دەگەن ماقتانىش سەزىمى كوكىرەكتى كەرنەپ, تۇلا بويدى دۋىلداتىپ اكەتىپ بارادى. تورتكۇل دۇنيە قازاقتىڭ جەڭىسىنە قول سوعىپ تۇر.
انە, التىن اسىقتاي بەكزات باتىر تۇعىر تورىنە تابان تىرەدى. كوز شاراسىنا ىستىق جاس ءۇيىرىلدى. تۇلا بويىم الا بوتەن شىم-شىم ەتتى. ... ايقاس اياقتالعان بەتتە سوڭىمنان قۋعان پوليتسەيگە ىرىق بەرمەي, كەرمەنىڭ ارعى بەتىندەگى بەكزاتتى ەڭكەيتىپ, ماڭدايىنان ءسۇيىپ ەدىم. التىن تاتىعان تەرى تاڭدايىمدا تۇر. باتىردى تاعى دا باۋىرىما باسسام دەيمىن.
سوناۋ بوزبالا شاقتان اسىعا, ۇزدىگە كۇتكەن جەڭىس. جەتكەنىمىز راس پا, الدە ءتۇسىم بە؟! كوزدى اشىپ-جۇمىپ, رينگكە قارايمىن. مۇقىم دۇنيەنىڭ كوز قۇرتى – بەكزات باۋىرىمىز!
اۋماعى ات شاپتىرىم سپورت سارايىنىڭ تورىنە ىلىنگەن ەلەكتروندى تابلوداعى «Kazakhstan» دەگەن جازۋ كۇن شۇعىلاسىنداي نۇرلانا جارقىرايدى.
...الگىندە عانا امەريكانىڭ ارۋاعىن اسىرامىن دەپ, رينگ ءتوسىن مايدان قىلعان الەم چەمپيونى ريكاردو حۋارەس كۇمىس بەلەستى ولقىسىنىپ, كوز جاسىن تىيا الماي تۇر. جىلاما, ريكاردو! جىلاما! سەنىڭ ەلىڭ التىن مەدالعا كەندە ەمەس. ءزارۋ دە ەمەس. بۇل التىن سەنەن گورى بىزگە قىمبات. ءبىز تۇتاس ۇلت بولىپ وسى التىن مەدالدى تابانى كۇرەكتەي 20 جىل كۇتتىك. تۇسىنەسىڭ بە, ريكاردو؟! شەشۋشى سىندا وزىڭنەن ايلاسىن اسىرىپ, يىعىن وزدىرعان بەكزات ساتتارحانوۆ – قازاق بوكسشىلارىنان شىققان تۇڭعىش وليمپيادا چەمپيونى! سەن ارمان قىلعان وليمپيادا التىنىن دۇنيەدەگى بار قازاق بەكزاتتاي اسىلىن قايراپ سالىپ, قولىڭنان ج ۇلىپ الدى دەسەك, سەنەسىڭ بە, سەنبەيسىڭ بە؟! ءدال بۇگىن قۇدىرەتتى كۇشتى جاراتۋشى يەمىز ءبىزدى, الاش جۇرتىن قولدادى. بەكزات بولسا, الاشتىڭ ارمانىنان تۋعان ۇل. ونداي ۇلدان ۇتىلدىم دەپ, قامىقپا. جىلاما. ءيا, رينگتە جەل اۋدارعان قاڭباقتاي الاس ۇردىڭ, ريكاردو. بىراق بويىندا ءبۇتىن ءبىر حالىقتىڭ داۋىلى بار بەكزات سەنى شىداتپادى. ءبىزدىڭ بەكزات سەنىڭ ومىرىڭدە وشپەستەي ءىز قالدىرعانىن امالسىز مويىندايسىڭ. قازاق مۇندايدا «جازمىشتان وزمىش جوق» دەيدى...
كوڭىل شىركىن وسىلاي شاتتانادى. جالىنداي شالقىپ, تولقىنداي تۋلايدى. ءبىر ءسات... قارسى الدىمداعى تەلەديدار كوكبايراقتى جەلبەگەي جابىلعان بەكزاتتىڭ ءجۇزىن اپ-انىق كورسەتتى. سامايىنداعى مونشاق-مونشاق تەر جاقۇتتاي مولدىرەيدى. بەكزات قوس بىلەگىن كوككە بىلەدى. تورتكۇل دۇنيە قازاق ۇلىنا ءسۇيسىنىپ دۋ ەتە قالدى. ۇلى دۇرمەكپەن جارىسا قول سوعىپ جاتىرمىز.
ءسۇت ءپىسىرىم ۋاقىتتان كەيىن شارشى الاڭعا ەرماحان ىبىرايىموۆ شىقتى. تۋمىسىنان وڭقاي ەرماحان سولاقاي تۇرىپ ۇرىسقاندا, ايىزىڭ قانادى. 1999 جىلعى الەم چەمپيونى, رۋمىن جىگىتى سيميون قازاق باتىرىمەن ارىستانشا ايقاستى. بىراق ءشاۋلى قىرانداي ابدەن بابىنا كەلگەن ىبىرايىموۆ دەس بەرگەن جوق. ءسويتىپ, اينالاسى جارتى ساعاتتا 20 جىل جەتكىزبەگەن وليمپيادا «التىنىنىڭ» ەكەۋىن بىردەي قانجىعاعا بايلادىق. قارشىعاداي عانا بولات ءجۇمادىلوۆ قاتارىنان ەكىنشى وليمپيادانىڭ كۇمىس مەدالىن ومىراۋىنا تاقسا, نار تۇلعالى مۇحتارحان دىلدابەكوۆ تە سيدنەي وليمپيداسىنىڭ كۇمىس تۇعىرىنا تابان تىرەدى.
«اق تۇيەنىڭ قارنى جارىلدى», دەگەن وسى شىعار. قازاقتىڭ سپورت تاريحى بار-جوعى ءبىر-ەكى ساعاتتىڭ ىشىندە التىنمەن اپتالىپ, كۇمىسپەن كۇپتەلىپ, قوس ءبۇيىرى تولىپ, جايناپ شىعا كەلدى.
ارقاسىندا «قازاقستان» دەگەن جازۋى بار كوك بايراق تۇستەس سپورتتىق كوستيۋمدى شاتتانا كيىپ, ءباسپاسوز ورتالىعىنا قاراي قۇستاي ۇشقان ءسات كۇنى كەشەگىدەي كوز الدىمدا. ەكىنىڭ ءبىرى قولىمدى قىسادى. ەكىنىڭ ءبىرى «Kazakhstan! Boxing! و-kei!» دەپ باس بارماعىن كورسەتەدى. سارىارقانىڭ سايىن دالاسىندا تۇلپار تاقىمداعانداي ءبىر عالامات سەزىم. اللا تاعالانىڭ قازاق قىلىپ جاراتقانىنا دا مىڭ دا ءبىر شۇكىرشىلىك ايتىپ, الاشتىڭ ۇلى بولعانىما ماقتانىش سەزىممەن الشاڭ باسىپ كەلەمىن. سيدنەي كوشەسىندەگى سەڭدەي سوعىلىسقان حالىقتىڭ تايلى-تۇياعىنا دەيىن قازاقتى بىلەتىنىنە, ءبىر ادامداي مويىندايتىنىنا ءدال قازىر ءباس تىگۋگە ءازىرمىن. ەرسىلى-قارسىلى اعىلعان حالىق بەكزات, ەرماحان, بولات, مۇحتارحانداردىڭ ءار جەكپە-جەگىن جىر قىلىپ ايتىپ بارا جاتقانداي كورىنەدى ماعان. نە كەرەك, باۋىرلارىمنىڭ ۇلت تاريحىن ورگە سۇيرەگەن ەرلىگى, التىننىڭ بۋى كوڭىل شىركىندى وسىلاي شارىقتاتتى.
ەندى ءبىر ءسات تۋعان جەرگە دەگەن ساعىنىشتان كوكىرەگىم سىزداپ قويا بەردى. ەل دۇركىرەتىپ توي جاساپ جاتقان شىعار. مۇرنىما جۋسان ءيسى كەلگەندەي. كوك مايسالى, سەلەۋلى دالا كەڭ قۇشاعىن ايقارا اشىپ, تەز جەت دەيتىندەي. قۇلاق تۇبىنەن شۇرقىراي-كىسىنەسكەن جىلقى ءۇنى ەستىلگەندەي بولدى.
...ەلگە باتىرلاردان ءتورت-بەس ساعاتتاي كەيىن جەتتىك. قازاق ارقا-جارقا. حالىق شىن قۋانىشتى, ناعىز جەڭىستى ابدەن ساعىنعان ەكەن. ەلدىڭ اۋزىندا – باتىر بوكسشىلاردىڭ تەڭدەسسىز ەرلىگى. ءوزىمىز كوزبەن كورگەن جەكپە-جەكتەردى مىڭ قۇبىلتىپ, تۇرلەندىرىپ ايتا جونەلگەندە اۋزىڭ اشىلىپ قالادى. كەي تۇسىن ەرتەگىشە سۋرەتتەيدى. عاجاپ! حالىقتىڭ جىر بەسىگىندە باياعىنىڭ باتىرلار جىرىنداي بولىپ بوكسشىلار جىرى تەربەلىپ جاتقانداي اسەرگە بولەندىك.
بوكسشىلاردى قارسى الۋعا الماتى اۋەجايىنا تاڭعى تورتتە ءتورت مىڭداي جانكۇيەر جينالعانىن ۇشاقتان تۇسكەن بەتتە كەدەنشى جىگىتتەردەن ەستىدىك. ەلدىڭ رۋحى ويانعانى, ءار جۇرەكتە نامىس وتى الاۋلاي جانعانى توبەمىزدى كوككە جەتكىزگەندەي بولدى. قالىڭ جانكۇيەر پوليتسەيلەر توسقاۋىلىن بۇزىپ-جارىپ, ۇشاققا قاراي لاپ قويىپتى. ۇشاق تابالدىرىعىنان ەرماحانى مەن بەكزاتىن, بولاتى مەن مۇحتارحانىن تىك كوتەرىپ اكەتكەن حالىقتىڭ ماحابباتىنا تاۋ-تاۋ التىنىڭ ولشەمى بولا المايدى. قازاقتى شاتتىققا بولەپ, قانىن قىزدىرعان, جانىن نۇرلاندىرعان وسى ءتورت وعلاننىڭ عاجاپ جەڭىسى ەدى.
ارادا بىرنەشە كۇن وتكەندە «ەگەمەن قازاقستان» گازەتى بەكزات پەن ەرماحاننىڭ قاتار تۇسكەن سۋرەتىمەن 2001 جىلدىڭ كۇنتىزبەسىن شىعاردى. و, قۇدىرەت! كوكورىم بەكزاتتىڭ مۇڭ شارپىعان جانارى الدەبىر سىر بۇككەندەي...
* * *
مىڭجىلدىقتىڭ توعىسىندا, جەر شارىنداعى 200 مەملەكەتتىڭ ەڭ تاڭداۋلى ورەندەرىنىڭ اسىل ارمانى بولعان, بار-جوعى 12 التىن مەدالدىڭ ەكەۋىن الاش باتىرلارى ولجالاعان تاريحي جەڭىستەن بەرى دە ون التى جىلدان استام ۋاقىت ارتتا قالىپتى. سودان بەرى ءتورت جازعى وليمپيا ويىندارىندا قازاق بوكسشىلارى بەكزات سالعان داڭعىل جولدان تايعان ەمەس. بۇل تەك ۇلتىمىزدىڭ شات-شادىمان قۋانىشىمەن, ءلۇپ-ءلۇپ ەتكەن جۇرەگىمەن عانا باعالاناتىن قايتالانباس, عاجاپ ساتتەر.
قىدىربەك رىسبەك
