الماتىدا وتكەن العاشقى كەشتە قازاقتىڭ كورنەكتى اقىندارى مەن انشىلەرى اتالعان جوباعا قاتىسىپ, كورەرمەن كوزايىمىنا اينالعان ەدى. ەندى بۇل جوبا ەلىمىزدىڭ بىرقاتار وبلىستارىندا دا جۇزەگە اسىرىلىپ, ەل ىشىندەگى تالانتتاردى تانىتۋعا سەپتىگىن تيگىزىپ كەلەدى.
ەجەلگى شىعىس پوەزياسىنان باستاپ كۇنى بۇگىنگە دەيىن جىرلانىپ كەلە جاتقان كونە تاراز – تاعدىرلى جىرلاردىڭ ارقاۋى. فيردوۋسي, حافيز عازالدارىنان وسى عاسىردا قايتا تۇلەپ, قاسيەتتى قارا ولەڭگە ات بايلاعان جاستار تاراز توپىراعىندا دا از ەمەس. بۇگىندە ولەڭ ورنەكتەگەن ولكەدە ءومىر ءسۇرىپ جۇرگەن جاستاردى قولداۋ ماقساتىندا وبلىس اكىمدىگى مادەنيەت, ارحيۆتەر جانە قۇجاتتاما باسقارماسىنىڭ وبلىستىق حالىق شىعارماشىلىعى ورتالىعى مەن «حۇسنيحات» ادەبيەتتى قولداۋ قوعامدىق قورىنىڭ بىرلەسە ۇيىمداستىرۋىمەن ۇلىستىڭ ۇلى كۇنى قارساڭىندا جەرگىلىكتى جاس اقىندار مەن انشىلەردىڭ «ءبىر ولەڭ, ءبىر اۋەن» كەشى ءوتتى.
الماتىدان ارنايى كەلگەن بەلگىلى اقىن, حالىقارالىق «الاش» ادەبي سىيلىعىنىڭ يەگەرى مارالتاي رايىمبەك ۇلى مەن قور پرەزيدەنتى, اقىن عالىم قاليبەك ۇلى جاستارعا قولداۋ كورسەتىپ, ادەبي-سازدى كەشكە قاتىستى. ال باسقارما باسشىسى دۇيسەنالى بىقىباەۆ الداعى ۋاقىتتا جاستاردىڭ شىعارماشىلىعىن دامىتۋ ماقساتىندا بۇدان دا اۋقىمدى جوبالاردىڭ قولعا الىناتىندىعىن كەش بارىسىندا ايتىپ ءوتتى. مۇنداي كەشتەر جاستاردىڭ تانىلۋىنا, شىعارماشىلىق تۇرعىدان شىڭدالۋىنا ۇلكەن اسەر ەتەتىنى ءسوزسىز. سونداي-اق, «ءبىر ولەڭ, ءبىر اۋەن» دەپ كەشتىڭ اتى ايتىپ تۇرعانىنداي, جوباعا قاتىسقان ءاربىر اقىن ءوزىنىڭ ولەڭىن وقىپ, ودان كەيىن سول اقىننىڭ سوزىنە جازىلعان اندەر شىرقالادى. بۇل كۇنى پەريزات وسپانوۆا, نۇرجان ءالىش, دانيار الىمقۇل, ارايلى جاقسىلىق جانە وزگە دە جەرگىلىكتى جاس اقىندار ءوز ولەڭدەرىن وقىسا, اقىن ولەڭدەرىنە جازىلعان اندەردى عاني ماتەباەۆ, قايسار كوكىشوۆ, تولعاناي اتابايلار ناقىشىنا كەلتىرە ورىنداپ, كەش كورىگىن قىزدىردى.
حاميت ەسامان,
«ەگەمەن قازاقستان»
جامبىل وبلىسى
