بىزدە جىل قورىتىندىسى ادەتتە جاڭا جىل قارساڭىندا جاسالىپ, ۇزدىكتەر ماراپاتتالىپ جاتادى. وكىنىشكە قاراي, قازاقتىڭ جاڭا جىلى سانالاتىن ءاز-ناۋرىزدا مۇنداي شارالار سيرەك ۇيىمداستىرىلادى. الايدا, سوڭعى جىلدارى ماڭىزدى شارالاردى ۇلىق مەرەكە قارساڭىندا وتكىزۋدى داستۇرگە اينالدىرىپ كەلە جاتقان اۋداندار دا بار. ماسەلەن, جارما اۋدانىندا بيىل ناۋرىز مەيرامىن تويلاۋ بارىسىندا ءبىلىم, دەنساۋلىق ساقتاۋ, مادەنيەت, سپورت, اۋىل شارۋاشىلىعى, قارجى, قۇقىق قورعاۋ ورگاندارى, مەملەكەتتىك قىزمەت سالاسىنىڭ ۇزدىكتەرى جىل قورىتىندىسى بويىنشا «جىل ۇزدىگى» توسبەلگىلەرىنە يە بولىپ, قۇرمەتكە بولەندى. اۋدان اكىمى نۇرلان سىدىقوۆ جۇرتشىلىقتى ۇلىق مەرەكەمەن قۇتتىقتاپ, ماراپاتتاردى تابىس ەتتى. بۇل كۇنى ورتالىق الاڭدا 15 كيىز ءۇي تىگىلىپ, ونىڭ ءىشى ەكسپو-2017 كورمەسىنە وراي قازاق حالقىنىڭ تۇرمىس-سالتىن بەينەلەيتىن جادىگەرلەرمەن بەزەندىرىلدى.
مادەنيەت ءۇيىنىڭ ونەرپازدارى جۇرتشىلىق نازارىنا مەرەكەلىك قويىلىمدار مەن تەاترلاندىرىلعان كورىنىستەر ۇسىندى. قازاق حالقىنىڭ ەجەلدەن جالعاسىپ كەلە جاتقان ويىن-ساۋىق ءتۇرى «التىباقان» باسىنداعى جاستاردىڭ ءان-دۋمانى مەرەكەنىڭ اجارىن اشىپ, ءسانىن كەلتىرە ءتۇستى. الاڭعا جينالعاندار ارقان تارتۋ, قول كۇرەسى جانە گىر تاسىن كوتەرۋدەن سايىسىپ, مەرەكەنىڭ كورىگىن قىزدىردى.
ازامات قاسىم,
«ەگەمەن قازاقستان»
شىعىس قازاقستان وبلىسى
