ق.توقاەۆتىڭ پىكىرىنشە, پرەزيدەنتتەر ن.نازارباەۆ پەن ش.ميرزيەەۆتىڭ اقورداداعى كەلىسسوزدەرىنىڭ ناتيجەسى ساپاردىڭ تاريحي ماڭىزىن دالەلدەدى.
«قازاقستان مەن وزبەكستان قاتىناستارىنىڭ پارلامەنتارالىق ولشەمى تاماشا سەرپىن الاتىن بولدى. ەكى ەلدىڭ پارلامەنتتەرى ساپار بارىسىندا قول جەتكەن ۋاعدالاستىقتاردى ءتيىمدى ىسكە اسىرۋ, ونىڭ ىشىندە ۋاقىتىلى ءارى ءتيىستى زاڭنامالىق قولداۋدى قامتاماسىز ەتۋ ءۇشىن بار كۇشىن سالاتىن بولادى. ودان باسقا, ەكى ەلدىڭ سەناتتارى اراسىنداعى ىنتىماقتاستىق قازاقستان مەن وزبەكستان ايماقتارى اراسىنداعى بايلانىستاردى نىعايتۋعا ىقپال ەتەتىن بولادى», – دەدى اڭگىمە بارىسىندا ق.توقاەۆ.
كەزدەسۋ اياسىندا قازاقستان رەسپۋبليكاسى پارلامەنتىنىڭ سەناتى مەن وزبەكستان رەسپۋبليكاسى ولي ءماجليسى سەناتى اراسىنداعى ىنتىماقتاستىق تۋرالى مەموراندۋمعا قول قويىلدى. پارلامەنتارالىق ۇنقاتىسۋدى تەرەڭدەتۋگە باعىتتالعان بۇل قۇجات پارلامەنتتەردەگى جوعارعى پالاتالاردىڭ تاراپىنان ەكى ەلدىڭ ساياسي, ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق بايلانىستارىن قولداۋدى كوزدەيدى.
ەكى مەملەكەتتىڭ سەناتتارى ءوز قۇزىرەتتەرى اياسىندا ەكىجاقتى ىنتىماقتاستىقتىڭ كەلىسىم-قۇقىقتىق بازاسىن كەڭەيتۋگە ىقپال ەتەدى.
قۇجاتتا «تاراپتار جاھاندىق سىن-قاتەرلەرمەن جانە قاۋىپتەرمەن ءتيىمدى كۇرەس جۇرگىزۋدى قامتاماسىز ەتەتىن قۇقىقتىق كەڭىستىك قۇرۋ سالاسىندا ءوزارا ءىس-قيمىل جاسايدى», – دەپ اتاپ وتىلگەن.
مەموراندۋم ساپارلار الماسۋ, پارلامەنتتىك شارالارعا قاتىسۋ, حالىقارالىق پارلامەنتتىك ۇيىمداردا ءوزارا قولداۋ كورسەتۋ مەن ۇستانىمداردى كەلىسۋ سيپاتىندا جۇزەگە اسادى.
