«ءبىزدىڭ بىرنەشە ۇرپاق كەڭەس وداعىنىڭ ىقپالىمەن ءومىر ءسۇردى. ول كەزدە بارلىعى جوسپارلى بولدى. ادام دۇنيەگە كەلەدى. بالاباقشاعا بارادى. كومسومول بولادى. وقيدى. ديپلوم العان سوڭ جۇمىسقا ورنالاسادى. ءۇي الادى. ءومىر بويى ءبىر جۇمىس ورنىندا ىستەيتىن. ال قازىر جاعداي وزگەردى. ەكونوميكا دا وزگەرىپ وتىرادى. ياعني, كاسىپورىندار تۇتىنۋشىنىڭ قاجەتتىلىكتەرى مەن سۇرانىستارىنا قاراي جۇمىس ىستەيدى», دەدى جۋرناليستەرمەن اڭگىمە كەزىندە ەلباسى.
نۇرسۇلتان نازارباەۆ قازاقستاننىڭ 80 ەلگە تاۋار ەكسپورتتايتىنىن, ونىڭ كوپ بولىگى شيكىزات ەكەنىن ايتتى.
«قازىر جەڭىل ونەركاسىپ پەن ازىق-ت ۇلىك تاۋارلارى دا ەكسپورتتالا باستادى. بىراق جۇمىس ىستەۋ كەرەك. وسى رەتتە ءبىلىم مەن عىلىم ماسەلەسى تۋىندايدى. ءبىزدىڭ ءونىم باسەكەگە ساي بولۋى ءۇشىن جاڭا تەحنولوگيالاردى ۇيرەنىپ, الەمدىك جاعدايدى زەرتتەۋ كەرەك. ۇنەمى ىزدەنۋ قاجەت», دەدى ول.
پرەزيدەنت قازاقستاندا كاسىپكەرلىكتى قولداۋعا بارلىق جاعداي جاسالعانىنا توقتالىپ, ەلىمىزدە بيزنەس پەن مەملەكەت ءبىر-بىرىنە كومەكتەسۋ ارقىلى جاقسى تابىس تابا الاتىنىن ايتتى. وسى رەتتە ول قۇدايمەن كەزدەسكەن كاسىپكەر تۋرالى ءافسانانى مىسالعا كەلتىردى:
«مول بايلىققا جەتكەن, ادامدارعا كوپ كومەكتەسكەن كاسىپكەر ومىردەن ءوتىپتى. و دۇنيەگە بارعاندا قۇداي وعان سىي جاساماق بولادى. «مەن ساعان ءبىرىنشى توزاقتى, ەكىنشى, جۇماقتى كورسەتەيىن. سوسىن بىرەۋىن تاڭدايسىڭ» دەيدى. ول توزاقتى كورۋگە بارادى. وندا داستارحان جايىلىپ, ءۇستى سان ءتۇرلى ءدامدى تاعامدارعا تولىپ تۇر ەكەن. بىراق ونداعىلار شۋلاپ, ەشكىم ەشكىمدى تىڭدامايدى ەكەن. بايقاسا, كۇناسى ءۇشىن قۇداي ولاردىڭ قولى بۇگىلمەيتىندەي ەتىپ قويىپتى. ءسويتىپ, ولار تاماقتانا المايدى ەكەن دە ءبىر-بىرىمەن ۇرسىسادى ەكەن. سوسىن بيزنەسمەن جۇماققا بارىپ كورىپتى. جۇماقتا دا داستارحان جايىلىپ تۇر ەكەن. بىراق ونداعى ادامدار تويىپ الىپ, زەرىگىپ وتىر ەكەن. مۇنى كورگەن كاسىپكەر «مەنى توزاققا جىبەرىڭىز» دەپتى. نەگە جۇماقتى تاڭداماعانىن سۇراعاندا ول «مەن توزاقتاعىلاردى تىك قولدارىمەن ءبىر-ءبىرىن تاماقتاندىرۋدى ۇيرەتەمىن» دەپ جاۋاپ بەرىپتى. ول ۇلى بيزنەسمەن بولعان. بىرەۋگە بىردەڭە بەرۋ ارقىلى الا الاسىڭ», — دەدى مەملەكەت باسشىسى.
