بولىمشەنىڭ زووتەحنيگى, سودان كەيىن مەڭگەرۋشىسى قىزمەتىن اتقاردى. مىنە, وسى كەزدە ناعىز ماماندىق الىپپەسىنەن ءوتىپ, باسقارۋ جۇيەسىندەگى ءبىرىنشى قادامىن جاسادى. ءومىر مەكتەبىنىڭ باستاۋىش باسپالداعىن مىقتاپ قالادى. تورعاي وبلىسىنىڭ ەكى اۋدانىنىڭ (جاقسى, قيما) كومسومول ۇيىمدارىن باسقاردى. جاستاردىڭ اراسىندا جۇمىس ىستەپ, ۇيىمداستىرۋشىلىق قابىلەتىن ءارى قاراي دامىتتى. سودان كەڭارال كەڭشارىنىڭ پارتيا ۇيىمىن باسقارۋعا جولداما الدى. كوپ ۇزاماي قاراتورعاي كەڭشارىنىڭ ديرەكتورى بولىپ تاعايىندالدى. بۇل شارۋاشىلىق شالعايدا ورنالاسقان امانگەلدى اۋدانىنىڭ قۇرامىندا جاڭادان قۇرىلعان ەدى. ءۇش وزەننىڭ توعىسقان جەرىندە ورنالاسقان حالقى از, سوندىقتان جەتكىلىكتى جۇمىس كۇشى جوق, اۋدان ورتالىعىنا باراتىن جول سالىنباعان, سۋ تاسىعاندا ارالدا قالىپ ورتالىقپەن قاتىناس توقتاپ قالاتىن قيىندىقتارى باستان اسىپ جاتقان شارۋاشىلىقتى ا.سادىربەكوۆ بەلسەنە باسقارىپ كەتتى. سول زاماندا كەڭشار ديرەكتورى تەك شارۋاشىلىققا عانا جاۋاپتى ەمەس ەدى, اۋىلدىڭ تىنىسى مەن تۇرمىسى, وسىندا تۇراتىن حالىقتىڭ جاعدايى ونىڭ جۇمىسىمەن تىعىز بايلانىستى بولاتىن. تىڭ جەردە جاڭادان قۇرىلعان شارۋاشىلىق بولعاندىقتان, ا.سادىربەكوۆ جۇمىسىن قۇرىلىستان باستادى. تۇرعىن ءۇي, مەكتەپ, بالاباقشا, ەمحانا, ت.ب. الەۋمەتتىك نىساندار قىسقا ۋاقىتتا سالىنىپ, ىسكە قوسىلدى. جول قۇرىلىسى ءجۇرىپ, قاجەتتى كوپىرلەر سالىنىپ, كەڭشار ديرەكتورى جەرگىلىكتى حالىقتىڭ العىسىنا بولەندى. ۋاقىتپەن ساناسپاي, كۇندىز-ءتۇنى جاساعان ەڭبەگىنىڭ ارقاسىندا مالدىڭ باسى ءوسىپ, ەگىن شارۋاشىلىعى اۋداندا ەڭ جوعارعى ونىمدىلىككە قول جەتكىزدى. ا.سادىربەكوۆ جوقتان بار جاساپ, باردى ۇقساتىپ دامىتىپ اكەتەتىن, تالعامپاز, ىزدەنىمپاز, قاراماعىنداعىلارعا تالاپشىل باسشى رەتىندە ءوزىن كورسەتتى. سوندىقتان, جاڭادان اشىلعان امانتوعاي, كەيىنىرەك ارقالىق اۋداندارىنىڭ بۇرىنعى اۋىلشارۋاشىلىق باسقارماسى نەگىزىندە قۇرىلعان اگروونەركاسىپ بىرلەستىكتەرىنە باسشى بولىپ تاعايىندالدى. كوپ ۇزاماي وبلىستىڭ اۋىل شارۋاشىلىق باسقارماسىنىڭ باستىعى ك.اۋباكىروۆكە ءبىرىنشى ورىنباسار بولىپ تاعايىندالدى. ا.سادىربەكوۆ وبلىستىڭ مال شارۋاشىلىعىمەن اينالىساتىن وڭتۇستىك, ەگىنشىلىكپەن شۇعىلداناتىن سولتۇستىك – ەكى وڭىرىندە دە قىزمەت جاساپ, ولاردىڭ ەرەكشەلىگىن بىلگەندىكتەن, جاڭا قىزمەتكە كىدىرىسسىز كىرىسىپ كەتتى. وسى جاۋاپتى قىزمەتتى ابىرويمەن اتقارعانىن كوزىمەن كورگەن كۋاگەرىنىڭ ءبىرى مەن ەدىم. ويتكەنى, سول كەزدە تورعاي وبلىسىندا كەڭشاردىڭ باس مامانى بولاتىنمىن. كەيىنىرەك كەڭشار ديرەكتورى قىزمەتىنە تاعايىندالار كەزدە قابىلداۋىندا بولىپ, الدىنان ءوتتىم. سوندا ونىڭ اۋىل شارۋاشىلىعىن جەتىك بىلەتىن باسشى ەكەندىگىن اڭعارعان ەدىم. ادامگەرشىلىگى مەن پاراساتتىلىعى دا كوزىمە ءتۇسىپ ەدى.
ءبىراز ۋاقىتتان كەيىن ا.سادىربەكوۆ امانگەلدى اۋدانى پارتيا كوميتەتىنىڭ ءبىرىنشى حاتشىسى بولىپ سايلاندى. بۇل اۋدان دالاسى كەڭ, وزەندەرى تەرەڭ, تاريحقا تۇنعان كونە بەتپاقدالا وڭىرىندە ورنالاسقان. سوناۋ ءامىر تەمىردىڭ جورىعىنا, كەنەسارى حاننىڭ كوتەرىلىسىنە كۋاگەر. امانگەلدى يمانوۆ باسقارعان ۇلت-ازاتتىق شايقاستارى دا وسى دالادا وتكەن.
ءشول-شولەيتتى جەردە ورنالاسقان اۋدان بولعاندىقتان, شەشىمىن كۇتىپ تۇرعان ماسەلەلەرى مەن قيىندىقتارى جەتكىلىكتى ەدى. ءمىنە, وسىنداي كۇردەلى, بىراق حالقى جۇمىسكەر جەرگە قىزمەتكە كەلىپ, اۋقىمدى ىستەردى باستاپ كەتتى. بۇرىنعى باستالعان جۇمىستاردى جالعاستىرىپ, اۋداننىڭ ەكونوميكاسى مەن الەۋمەتتىك سالاسىنىڭ تامىرلارىنا قان جۇگىرتىپ, تۇرمىس-ءتىرشىلىگىنە وڭ جاڭالىقتار مەن وزگەرىستەر اكەلدى.
مالشى-شوپاندارعا ەرەكشە نازار اۋدارىلىپ, قولداۋ كورسەتىلدى. ەڭبەكتى ىنتالاندىرۋ ءبىرىنشى كەزەككە قويىلدى. ەڭبەك ادامدارىنىڭ الاتىن تابىسىن جەتكەن جەتىستىگىمەن بايلانىستىرىپ, اۋىلدا جاڭا رەفورمالاردى جۇزەگە اسىردى. مال ءوسىرۋ تاسىلدەرىندە وزىق وزگەرىستەر كەڭىنەن تاراتىلدى. اۋدان وبلىستاعى ەكونوميكاسى دامىعان وزاتتار قاتارىنا قوسىلدى. جەرگىلىكتى اۋىلدار ۇلكەن قۇرىلىس ورىندارىنا اينالدى. تۇرعىن ۇيلەر مەن الەۋمەتتىك نىساندار سالىندى, جول قۇرىلىسى قارقىندى دامىدى. وسىنداي وڭ وزگەرىستەردى ورتالىق پارتيا كوميتەتىنىڭ ۋاكىلى رەتىندە
اۋداندىق پارتيا ۇيىمىنىڭ ەسەپ بەرۋ-سايلاۋ كونفەرەنتسياسىنا كەلگەندە ءوز كوزىممەن كورىپ ەدىم. بۇرىنعى وزىمە تانىس اۋدان ايتارلىقتاي وزگەرگەن ەكەن. ءبىرنەشە شارۋاشىلىق ءوز مالىن جەممەن قامتاماسىز ەتۋ ءۇشىن بۇرىن اينالىسپاعان ەگىنشىلىككە كىرىسىپ, استىق جينايتىن بولىپتى. اۋىلدار اراسىنا جول, كوپىرلەر سالىنىپ, اۋدانمەن بەرىك قاتىناس ورناتىلىپتى. مادەني وشاقتار, ەڭسەلى سپورت كەشەنى بوي تۇزەپتى. اۋدان ورتالىعىنىڭ كەلبەتى وزگەشە جاڭعىرىپتى.
1990 جىلى تورعاي وبلىسى قايتا اشىلعان كەزدە ا.سادىربەكوۆ وبلىستىق اگروونەركاسىپ كەشەنىنىڭ باسشىسى جانە وبلىستىق اتقارۋ كوميتەتى توراعاسىنىڭ ءبىرىنشى ورىنباسارى قىزمەتىنە تاعايىندالدى. بۇل وتە كۇردەلى قيىندىقتار بەلەڭ العان ۋاقىت ەدى. كەڭەس وداعىنىڭ قۇلدىراۋى باستالعان كەزدە جاڭا قۇرىلعان وبلىستى كوتەرۋ وڭاي ەمەس بولاتىن. بىراق ا.سادىربەكوۆ سياقتى ازاماتتار وسىنداي سىننان ابىرويمەن ءوتتى.
ەلىمىز ەگەمەندىگىن جاريالاپ, جاڭا داۋىرگە بەت بۇرعان كەزدە مەملەكەتتىك م ۇلىكتى جەكەشەلەندىرۋ ءماسەلەسى الدىڭعى قاتاردا تۇردى. رەسپۋبليكالىق مەملەكەتتىك ءمۇلىك كوميتەتىنىڭ توراعاسى, پرەمەر-ءمينيستردىڭ ءبىرىنشى ورىنباسارى قىزمەتىن اتقارىپ جۇرگەنىمدە, ا.سادىربەكوۆتى ادالدىعى مەن تاجىريبەسىن ەسكەرىپ, تورعاي وبلىسى مەملەكەتتىك م ۇلىك كوميتەتى توراعاسى, وبلىس اكىمىنىڭ ءبىرىنشى ورىنباسارى قىزمەتىنە شاقىرعان ەدىم. تۋراسىن ايتايىن: مەملەكەتتىك م ۇلىكتى جەكەشەلەندىرۋ ەلىمىزدىڭ تاريحىندا بۇرىن بولماعاندىقتان, بۇل سالادا كوپ ىزدەنىپ, جاڭا ءادىس-ءتاسىلدەر پايدالانۋ كەرەك بولدى. ءتىپتى وسىنداي قىزمەت جاساۋعا دايىن ماماندار بىزدە مۇلدە جوق ەدى. ءبارىمىزدىڭ سانا-سەزىمىمىز بەن كوزقاراسىمىز جانە جۇمىس ءتاسىلىمىز كەڭەس وداعى كەزىندە قالىپتاسقان ەدى. سوندىقتان دا جۇمىس بارىسىندا ا.سادىربەكوۆ جوسپارلانعان وزگەرىستەرگە سىن كوزىمەن قاراپ, جان-جاقتى ساراپتاپ وتىردى. جاڭالىقتاردى قۇپتاپ, ءىس جۇزىنە اسىرۋعا بۇكىل رەفورماتورلىق كۇش-جىگەرىن سالدى. ونىڭ قارىم-قابىلەتى جاڭا جۇمىسقا سايكەس كەلدى. اۋىل شارۋاشىلىعىن جەكەشەلەندىرۋ كەزىندە ونىڭ كوڭىلىندە ءبىراز كۇدىك بولعانىن بىلەمىن. ءبىر جاعىنان, ءوزى ىستەگەن كەڭشار, ۇجىمشار جۇيەسىن قيمادى. ال ەكىنشى جاعىنان, وزگەرىستەر كەرەكتىگىنە كوزى جەتتى. جان-جاقتى ساراپتاپ, بايسالدى رەفورمالار جاساۋدى قۇپتادى. بىلىكتى باسشى شارۋا قوجالىقتارىن بىرىكتىرۋ كاجەتتىگىن ايتۋشى ەدى. بۇل ۇسىنىسى قازىرگى ۋاقىتتا دا كۇن تارتىبىندە تۇر.
تورعاي وبلىسى جابىلعاننان كەيىن ا.سادىربەكوۆتىڭ الدىندا قايدا بارام, نە ىستەيمىن دەگەن سۇراق تۇرمادى. پرەزيدەنت اكىمشىلىگىنە الىنىپ, مەملەكەتتىك ينسپەكتور قىزمەتىنە تاعايىندالدى. باتىس قازاقستان, كەيىن اقمولا وبلىستارىندا پرەزيدەنتتىڭ وكىلى بولىپ قىزمەت اتقاردى. بۇل ورىندا دا ول مول تاجىريبەسىنىڭ ارقاسىندا ءناتيجەلى جۇمىس ىستەدى.
بىرەر ۋاقىت شىعىس قازاقستان وبلىسى اكىمشىلىگىنىڭ استاناداعى وكىلى بولدى. سول كەزدە وبلىستىڭ پروبلەمالارىن شەشۋگە بەلسەنە قاتىستى. قازىرگى ۋاقىتتا ا.سادىربەكوۆ وتاندىق بەلدى كاسىپورىننىڭ ءبىرى – «كوندەنسات» اق-تىڭ سىرتقى بايلانىس ديرەكتورى قىزمەتىن اتقارادى.
اكەسىنىڭ قانىمەن, اناسىنىڭ سۇتىمەن كەلگەن قاسيەتىنە ساي, ول اتاق ءۇشىن ەمەس, حالقى ءۇشىن جۇمىس ىستەدى. سوندىقتان, قىزمەت بارىسىندا وبلىس باسشىلىعىندا بولعان ە.اۋەلبەكوۆ, و.قۋانىشەۆ, م.ساعديەۆ, ءو. جانىبەكوۆ, ك.ءاۋباكىروۆ, ك.ۋكين, ۆ.برىنكين, س.كۋلاگين سىندى قايراتكەرلەردەن ءتالىم-ءتاربيە الىپ, قولداۋ كوردى.
جەتپىسكە قادام باسىپ وتىرعان امانگەلدى سادىربەكوۆ جۇبايى كارلىعاشپەن ءبىر شاڭىراق استىندا جارتى عاسىر باقىتتى ءومىر كەشىپ, تاربيەلى ۇرپاق ءوسىرىپ كەلەدى. ۇلىن ۇياعا, قىزىن قياعا قوندىرىپ, اۋلەتىنىڭ تۋىن بيىك ۇستاپ وتىر.
جانىبەك كارىبجانوۆ,
مەملەكەت جانە قوعام قايراتكەرى
