«ءبىزدىڭ وسىلاي شەت ەلدە جاتتىعۋ جاساپ, جارىس وتكىزىپ جۇرگەنىمىزدىڭ بارلىعى ەلىمىزدەگى بەرەكە مەن بىرلىكتىڭ ارقاسى, تاۋەلسىزدىكتىڭ جەمەسى دەر ەدىم. جەلبىرەتەتىن تۋىڭ بولماسا, شىرقاتاتىن ءانۇرانىڭ بولماسا بىزگە بوكستاسۋدىڭ نە كەرەگى بار؟ سول ءۇشىن ەلدىڭ, جەردىڭ اماندىعى ول ءبىرىنشى ورىندا. ەلباسىمىزدىڭ قانشاما سپورت ارەنالارىن سالىپ, ەلىمىزدە دە ەركىن جاتتىعۋىمىزعا, جارىستار وتكىزۋىمىزگە مۇمكىندىك جاساپ بەردى. قازىر ءار قالادا ۇلكەن سپورت كەشەندەرى مەن بايراقتى باسەكەلەر وتكىزەتىن ارەنالار بار. سپورتشىعا بۇدان اسقان قانداي قولداۋ كەرەك؟
مىنە, 9 قىركۇيەكتە ەكسپو-2017 حالىقارالىق كورمەسى اياسىندا ەلىمىزدە تاعى ءبىر كاسىپقوي بوكس كەشى وتپەك. بۇل جولى دا ارەنا جانكۇيەرلەرگە تولى بولاتىنىنا سەنەمىن. استانادا وتەتىن جەكپە-جەكتىڭ مەن ءۇشىن جاۋاپكەرشىلىگى وتە جوعارى. جاقسىلاپ دايىندالىپ, قازاق ەلىنە تاعى ءبىر جەڭىس سىيلايمىن دەپ ويلايمىن. قىركۇيەككە دەيىن مامىر ايىنىڭ سوڭىندا اقش-تا تاعى ءبىر جەكپە-جەك جوسپارلانىپ تۇر. سول جۇدىرىقتاسۋدان سوڭ, استانادا وتەتىن بوكس كەشىندەگى قارسىلاسىم انىقتالىپ, ساراپقا سالىناتىن بەلبەۋدى ەستىپ قالارسىزدار. بىزگە ءتۇرلى ۇسىنىستار تۇسۋدە. قازىر مەنىڭ كوماندام قىزۋ جۇمىس ىستەپ جاتىر. كورمە كەزىندە استاناعا الەمنىڭ تۇكپىر-تۇكپىرىنەن جۇزمىڭداعان تۋريستەر كەلەدى. سول تۋريستەرگە قازاق ەلىنىڭ بوكسشىلارىنىڭ دەڭگەيىن كورسەتىپ, الەم الدىندا مارتەبەلى ەكەنىن تاعى ءبىر دالەلدەۋ بىزگە مىندەت!», — دەيدى قانات يسلام.
ايتا كەتەيىك, قانات يسلام كاسىپقوي بوكستاعى ءوزىنىڭ سوڭعى جەكپە-جەگىن 18 اقپان كۇنى اقش-تا برازيليالىق روبسون ءاسسيستى ءبىرىنشى راۋندتا نوكاۋتقا تۇسىرگەن بولاتىن.
