بۇعان دەيىن 32 كەزدەسۋ وتكىزىپ, ونىڭ 29-ىن نوكاۋتپەن جەڭگەن, تەك بىرەۋىندە عانا قارسىلاسىنا ەسە جىبەرگەن امەريكالىق بوكسشى تۋرالى نە بىلەمىز؟ «ومىرىمدە تالاي قورلىق كوردىم. ءوز-ءوزىمدى قورعاۋىم كەرەك بولدى. ءار قيىندىقتىڭ تۇبىندە ءبىر جاقسىلىقتىڭ بولاتىنى راس ەكەن, مىنە, وسىلايشا بوكسقا كەلدىم», – دەيدى امەريكالىق
اۋەسقوي جانە كاسىپقوي رينگتەگى جەتىستىكتەرى
دجەيكوبس اقش-تىڭ نيۋ-يورك قالاسىندا تۋىپ-وسكەن. كارەراسىن اۋەسقوي بوكستان باستاعان. مۇندا بارلىعى 137 جەكپە-جەكتە جەڭىسكە جەتىپ, تەك جەتەۋىندە عانا قارسىلاسىنا ەسە جىبەرىپتى. 2003 جىلى جاستار اراسىندا وليمپيادا چەمپيونى اتانسا, 2004 جىلى 19 جاسقا دەيىنگىلەر اراسىندا اقش چەمپيونى اتاعىنا قول جەتكىزگەن. «التىن قولعاپ» جارىسىنىڭ ءتورت دۇركىن جەڭىمپازى اتانعان.
اۋەسقوي بوكستا ءبىراز بەلەستەردى باعىندىرعان سوڭ كاسىپقويعا اۋىستى. العاش كەزدەسۋىندە 2007 جىلى 8 جەلتوقساندا فلويد مەيۋەزەر مەن ريككي حاتتوننىڭ اندەركارتىندا مەكسيكالىق حوسە حەسۋس حۋرتادومەن جۇدىرىقتاسىپ, 29 سەكۋندتا نوكاۋتپەن جەڭدى.
وسىدان كەيىن مەكسيكالىق گەستور لوپەسپەن شىعىپ, ءبىرىنشى راۋندتا-اق سۇلاتىپ ءتۇسىردى. ال 2008 جىلدىڭ 16 اقپانىندا الەكساندر ۆولكوۆتى 2-راۋندتا نوكاۋتپەن جەڭدى. كاسىپقوي بوكسقا جاڭادان كەلگەن جاس تارلان الەمدىك رينگتە وزىندىك ورنىن قالىپتاستىرۋ ءۇشىن نەبىر مىقتىلارمەن كۇش سىناستى. وسىدان كەيىن بىرنەشە ايدىڭ ىشىندە التى بىردەي جەكپە-جەك وتكىزىپ, ءبارىن دە ۋاقىتىنان بۇرىن جەڭىسكە جەتكەن.
2008 جىلدىڭ 27 قىركۇيەگىندە ەممانۋەل گونسالەسپەن سىنعا ءتۇسىپ, كاسىپقوي رينگتە ءبىرىنشى رەت كەزدەسۋدى تولىعىمەن وتكىزدى. قارسىلاسىن بىرنەشە مارتە ەسىنەن تاندىرىپ بارىپ, تورەشىلەردىڭ شەشىمىمەن كەزەكتى جەڭىسىنە جەتتى.
2009 جىلدىڭ 2 مامىرىندا مايك ۋولكەر مەن دجەيمس كيركلەند جۇدىرىقتاسۋى ءتيىس بولاتىن. بىراق كۇتپەگەن جەردەن كيركلەند قاماۋعا الىنىپ, جەكپە-جەككە ءبىر اپتاداي ۋاقىت قالعاندا دجەيكوبسقا ۋولكەرمەن كۇش سىناسۋ تۋرالى ۇسىنىس تۇسەدى. دايىندىعىنىڭ ازدىعىنا قاراماي ول بىردەن كەلىسىمىن بەرەدى. ادەتتەگىدەي نوكاۋتپەن جەڭبەسە دە قازىلار ءبىراۋىزدان جەڭىستى امەريكالىق بوكسشىعا بەردى.
2009 جىلدىڭ 22 تامىزىندا وتانداسى يشە سميتپەن كۇش سىناسىپ, WBO NABO (سولتۇستىك امەريكا بوكس قاۋىمداستىعى) نۇسقاسى بويىنشا الەم چەمپيونى اتاندى. اراعا جەتى اي سالىپ, حۋان استورگۋدى جەڭىپ, NABF (سولتۇستىك بوكس فەدەراتسياسى) تيتۋلىنا قول جەتكىزدى.
دجەيكوبستىڭ بوكستاعى ماڭىزى جوعارى, ايتۋلى جەكپە-جەكتەرىنىڭ ءبىرى 2010 جىلدىڭ 31 شىلدەسىندە ءوتتى. بۇل كۇنى ول WBO بەلبەۋى ءۇشىن رەسەيلىك دميتري پيروگپەن ايقاستى. بۇعان دەيىن قوس بوكسشى دا جەڭىلىس كورمەگەن ەدى. 5-راۋندتا رەسەيلىك دەنيەلدى نوكاۋتپەن جەڭدى. بۇل ونىڭ العاشقى نوكاۋتى بولاتىن.
ال كەلەسى ەكى كەزدەسۋىندە ۋاقىتىنان بۇرىن جەڭدى.
قاتەرلى ىسىكپەن كۇرەس
بۇل شامامەن 2010 جىل بولاتىن. وسى ەكى جەڭىستەن كەيىن دجەيكوبس ءبىراز ۋاقىت كورىنبەي كەتتى.
2011 جىلدىڭ سوڭىنا تامان «New York Daily News» باسىلىمى العاش بولىپ, ونىڭ قاتەرلى ىسىككە شالدىققانىن جازدى. وستەوساركوما, ياعني سۇيەك ىسىگى سالدارىنان كۇنى كەشە رينگتە اتوي سالعان جاس بوكسشى اياعىن باسا الماي قالدى. ج ۇلىنىنا توعىز ساعات وتا جاسالىپ, ودان كەيىن حيمياتەراپيانىڭ بىرنەشە كۋرسىن الدى. مۇنداي اۋىر دەرتكە شالدىققان ادام بوكسقا قايتا ورالادى دەپ كۇتكەن ادام كەم دە كەم ەدى. الايدا, ەرىك جىگەرىنىڭ كەرەمەت كۇشتىلىگى ارقاسىندا دجەيكوبس اراعا 19 اي سالىپ بوكسقا قايتا ورالادى.
«بەينە ءبىر باسقا الەمگە ۇزاق ساياحاتقا بارىپ كەلگەندەي بولدىم», – دەپ ەسكە الدى ءوزى ناۋقاسى تۋرالى.
اۋرۋ دجەيكوبستىڭ قايىرىمدىلىق قور اشۋىنا سەبەپ بولدى.
«اۋرۋحانادا جاتقان كۇندەرىمدە ومىرگە دەگەن كوزقاراسىم وزگەردى. اينالامداعى بەيكۇنا جانداردىڭ ومىرگە دەگەن قۇشتارلىعىن كوردىم. وسىدان ەمدەلىپ شىقسام, ناۋقاستارعا كومەكتەسەمىن دەپ وزىمە ءوزىم سەرت بەردىم. ال ەندى مۇنى موينىمداعى قارىزىم دەپ بىلەمىن», – دەدى ول.
شارشى الاڭعا قايتا ورالعان دجەيكوبس اۆستراليالىق دجاررود فلەتچەرمەن WBA نۇسقاسىنىڭ چەمپيوندىعى ءۇشىن سىنعا ءتۇسىپ, 5-راۋندتا نوكاۋتپەن جەڭدى.
نيۋ-يوركتە 2015 جىلى 1 تامىزدا سەرحيو مورامەن ارادا تارتىستى جەكپە-جەك ءوتتى. العاشقى راۋندتىڭ وزىندە-اق ەكەۋى دە نوكداۋن الىپ ۇلگەرەدى. دەگەنمەن, كەلەسى راۋندتا تەز ەس جيعان دجەيكوبس جىلدام سوققىلارمەن ءۇستى-ۇستىنە توپەلەپ, جەڭىسكە جەتتى. ال رەۆانش وتكەن جىلدىڭ 9 قىركۇيەگىندە ءوتتى. مۇندا ول تاعى دا باسىم بولدى.
«دجەيكوبس مەن كورگەن پانچەرلەردىڭ ىشىندەگى ەڭ مىقتىسى. ونىڭ كۇشىن سوزبەن ايتىپ جەتكىزە المايمىن. ورتا سالماقتاعى ۇزدىكتەردىڭ ءبىرى گەننادي گولوۆكينمەن كەزدەسسە, لايىقتى قارسىلاس بولا الادى دەپ ويلايمىن. مەنىڭشە, سوققىنى كىم كوتەرە السا, بۇل ايقاستا سول جەڭىسكە جەتەدى», – دەدى مورا.
كاسىپقوي بوكستاعى ەڭ ءىرى جەڭىسىنە دجەيكوبس 2015 جىلدىڭ 6 جەلتوقسانىندا جەتتى. بۇعان دەيىن جەڭىلمەگەن پيتەر كۋيللينمەن جەكپە-جەك وتكىزىپ, 85 سەكۋندتىڭ ىشىندە تەحنيكالىق نوكاۋتپەن ۇتتى. ماماندار بۇل ايقاستا كۋيللين نەبارى 16 رەت جۇدىرىق سەرمەسە, سونىڭ تەك ەكەۋى عانا ءدال تيگەنىن, ال دجەيكوبس جاساعان 53 سوققىنىڭ 27-ءسى نىساناعا دارىعانىن انىقتادى.
دجەيكوبستىڭ رينگتەگى جەڭىستەرىن ەسەپكە الماعاننىڭ وزىندە قاتەرلى دەرتتەن ايىعىپ, بوكسقا قايتا ورالۋىن ەشبىر ەرلىكتەن كەم ساناۋعا بولمايدى. گولوۆكيننىڭ بۇعان دەيىنگى قارسىلاستارىنا باقىلاي كوز سالساق, الدىن-الا قۇلدىراپ, پسيحولوگيالىق جەڭىلىس تاۋىپ جاتادى. ال دەنيەل شە؟ قاتەرلى اۋرۋدان ايىعىپ, شارشى الاڭعا قايتا ورالعان سپورتشىنىڭ رۋحاني وسال بولۋى مۇمكىن بە؟ وسىدان قاراپ GGG-گە بۇل جولى قانداي قارسىلاس تاپ كەلىپ تۇرعانىن شامالاۋعا بولادى.
ايان ءابدۋالي
