المانيانىڭ ديۋسسەلدورف دەگەن قالاسىندا دزيۋدودان الەمدىك گران-پري جارىسىنىڭ العاشقى كەزەڭى ءوتتى. وسى ءدۇبىرلى دودادا اسا اۋىر سالماق بويىنشا (+100 كگ) ونەر كورسەتكەن ەرجان شىنكەەۆ ريو-2016 وليمپياداسىنىڭ چەمپيونى لۋكاش كرپالەكتى قولا جۇلدە ءۇشىن بولعان بەلدەسۋدە ۆازاري ادىسىمەن جەڭىپ, جانكۇيەرلەرىنە ايتىپ جەتكىزگىسىز قۋانىش سىيلادى.
قازىرگى ۋاقىتتا اتالعان قالادا وقۋ-جاتتىعۋ جيىنىندا جۇرگەن ءاپايتوس بالۋانمەن تەلەفون ارقىلى حابارلاسىپ, ويدا جۇرگەن سۇراقتاردىڭ ءبىرازىنا جاۋاپ العان ەدىك.
– ەرجان بالۋان, جەڭىس قۇتتى بولسىن! وسى تۋرنيردە لۋكاش كرپالەككە جەتكەنگە دەيىن كىمدەرمەن بەلدەستىڭ؟
– العاشقى بەلدەسۋىم برازيليالىق بالۋان رۋان يسكۋەردومەن ءوتتى. ونى جەڭگەننەن كەيىن گرۋزين اتلەتى, الەم چەمپيوناتتارىنىڭ جۇلدەگەرى ادام وكرۋاشۆيليدى ۆازاري ادىسىمەن تىزە بۇكتىردىم. ال ءۇشىنشى رەت تاتاميگە شىققاندا جاپون حيسايوشي حاراساۆادان شيدو – ەسكەرتۋ بويىنشا جەڭىلىپ قالدىم. جۇبانىش بەلدەسۋىندە ۋكراينالىق ياكوۆ حاممودان باسىم ءتۇسىپ, قولا جۇلدە ءۇشىن كۇرەسۋگە مۇمكىندىك الدىم. ال بۇل سىندا لۋكاش كرپالەكتى ۆازاري ادىسىمەن جەڭدىم.
– الەم جانە وليمپيادا ويىندارىنىڭ چەمپيونىن جەڭگەنىڭ وزىڭە دەگەن سەنىمدىلىكتى ارتتىرعان شىعار؟ جالپى, بۇل بالۋانمەن بۇرىن بەلدەسىپ كورىپ پە ەدىڭ؟
– ارينە, كرپالەكتەي كۇشتى بالۋاندى تاتاميگە الىپ ۇرعاندا, ءبىز دە ەشكىمنەن كەم ەمەسپىز-اۋ دەگەن ويدىڭ كەلگەنى راس. كۇنى كەشە عانا وليمپيادا چەمپيونى بولعان سپورتشىنى جەڭۋ, ءسوز جوق, ادامعا قوسىمشا كۇش بەرەدى, وزىڭە دەگەن سەنىمدىلىكتى ەسەلەي تۇسەدى ەكەن.
جالپى, كرپالەكپەن ءبىرىنشى رەت كۇرەستىم. ىڭعايعا كەلەتىن بالۋان ەكەن...
– سپورتسۇيەر قاۋىم, سەنىڭ جانكۇيەرلەرىڭ «شىنكەەۆ بيىل «قازاقستان بارىسىنا» قاتىسا ما ەكەن؟», دەپ ءجۇر...
– «قازاقستان بارىسىن» ۇتۋ – مەنىڭ باستى ارمانىم. ءساۋىر ايىندا قاراعاندى وبلىسى بويىنشا وسى جارىسقا ىرىكتەۋ سىنى وتەدى. سوعان مىندەتتى تۇردە قاتىسام. الدىمنان توسقاۋىل قويىلماسا, مەن كۇرەستەن قاشقان ەمەسپىن.
– قازىرگى ۋاقىتتا سەنىڭ جەكە جاتتىقتىرۋشىڭ كىم؟ جالپى, قاي ماماننىڭ اقىل-كەڭەسىنە كوبىرەك قۇلاق تۇرەسىڭ؟
– مەن الەم چەمپيونى ماكسيم راكوۆتىڭ اكەسى سەرگەي راكوۆ جانە تالعات بايشولاقوۆ دەگەن بىلىكتى باپكەرلەردىڭ قاراماعىندا جاتتىعام. جاتتىعۋ زالىندا, تاتامي ۇستىندە كوبىنە سەرگەي كاپيتونوۆيچپەن جۇمىس ىستەيمىن. تاجىريبەلى مامان. ول كىسىدەن ۇيرەنەرىم كوپ. تالعات سايران ۇلى بولسا, پسيحولوگيالىق تۇرعىدان كوپ كومەك بەرەدى. مەن ءۇشىن ادامدى جىگەرلەندىرۋگە كەلگەندە بۇل باپكەرگە جەتەتىن مامان جوق.
– سوڭىڭنان شىققان ءدۇبىردى سەزەسىڭ بە؟ ەل ىشىندەگى جارىستاردا كىمدەردى باسەكەلەس سانايسىڭ؟
– ءبىزدىڭ ەلدە دزيۋدو كۇرەسى دامىپ كەلەدى. سوڭىمىزدان ىلەسىپ كەلە جاتقان تالاپتى دەگەن جاستار بارشىلىق. مىسالى, بىلتىر قازاقستان چەمپيوناتىنىڭ فينالىندا وزىممەن كۇرەسكەن ەلامان ەرعاليەۆ دەگەن بالۋاننىڭ بولاشاعى زور دەپ ويلايمىن. وزىمشە, مەنىڭ ءىزىمدى باسار, ءىسىمدى جالعاستىرار جاستىڭ ءبىرى سول بولار-اۋ دەپ توپشىلايمىن.
– اڭگىمەڭە راحمەت.
اڭگىمەلەسكەن
قايرات ءابىلدينوۆ,
«ەگەمەن قازاقستان»
