بۇگىنگى تاڭدا تاريحي ۋاقىتتىڭ ادام ايتقىسىز جىلدامدىقپەن جىلجىپ كەلە جاتقانى – داۋ تۋعىزبايتىن شىندىق. بۇل اسىرەسە, جاھاندىق اقپاراتتىق-كوممۋنيكاتسيا تەحنولوگيالارىنىڭ وتە تەز ءارى ۇزدىكسىز جاڭارۋىنان ايقىن سەزىلۋدە. وسى ءۇردىس, سونىمەن قاتار, العاشقى يندۋستريالىق رەۆوليۋتسيانىڭ قوزعاۋشى كۇشى بولعان كومىر مەن بۋدىڭ بىرتىندەپ ىعىسىپ, مۇناي مەن گازعا, ودان سوڭ اتوم قۋاتىنا, ەندى, مىنە, ءۇشىنشى يندۋستريالىق رەۆوليۋتسيانىڭ ەنەرگيا يىرىمىنە اينالىپ ۇلگەرگەن بالاما قۋات كوزدەرىنە ورىن بەرە باستاعانىنان دا انىق كورىنەدى. بۇل قۇبىلىس, سونىمەن قاتار, ءتورتىنشى يندۋستريالىق رەۆوليۋتسيانىڭ كۇرەتامىرى بولىپ وتىرعان روبوتتانۋ, بيوتەحنولوگيا, ينفورماتيكا جانە نانوتەحنولوگيا سينتەزدەرىنەن تۋىنداپ جاتقان سونى عىلىمي ناتيجەلەردەن دە انىق بايقالىپ وتىر. سودان سوڭ قايتا قالپىنا كەلەتىن, ءارى تەك قانا قورشاعان ورتادان الىناتىن تازا ەنەرگيا قورلارىنىڭ مۇلدە جاڭا تەحنولوگيالىق دەڭگەيدە ءوندىرىلىپ, جاڭاشا ساقتالىپ, الىس-جاقىن ايماقتارعا اسا ءتيىمدى ونلاين تاسىلمەن تاسىمالدانۋ مۇمكىندىگى دە بۇگىنگى ادامزات ساناسىنا قونا باستادى. ءوز كەزەگىندە اتالعان قۇبىلىستاردىڭ گەوساياساتقا دا, مەملەكەتارالىق قارىم-قاتىناستار مەن نارىقتارعا دا, سول سياقتى, ازاماتتىق قوعامداردىڭ جاڭاشا قالىپتاسىپ, جاڭاشا دامۋىنا دا تىكەلەي اسەر ەتە باستاعانى كۇمان تۋدىرمايدى. ويتكەنى, مەگاوزگەرىستەر تولقىنى قازىردىڭ وزىندە-اق ايقىن سىر بەرىپ, پلانەتا تىنىسىنىڭ بولاشاق بولمىسىن بولجايتىن فۋتۋريست-فيلوسوفتاردى دا, فيزيكتەردى دە, ەكولوگتار مەن بيولوگتاردى دا, ماكروەكونوميستەر مەن ميكروەكونوميستەردى دە, مەملەكەت تىزگىنىن ۇستاعان ساياساتكەرلەردى دە جاپپاي ويلاندىرا باستاعانى شىندىقتان الىس ەمەس. ماسەلەن, ەلباسى نۇرسۇلتان نازارباەۆتىڭ سوڭعى جولداۋى – جوعارىدا ايتىلعاننىڭ ايقىن دالەلى. بۇلاي دەۋگە تولىق نەگىز بار. ويتكەنى, وزگە ەلدەر سەكىلدى دامۋدىڭ تۇراقتى جولىن تاڭداعان ءبىزدىڭ مەملەكەتىمىز دە تەحنولوگيالىق مەگاوزگەرىستەر اعىنىنان تىس قالىپ وتىرعان جوق. كەزىندە قول جەتپەستەي بولىپ كورىنەتىن قيال-عاجايىپ دۇنيەلەر بۇگىنگى قازاقستاننىڭ كۇندەلىكتى بولمىسىنا قالاي تەز ەنىپ كەتكەنىن دە بايقاماي قالدىق. تاستان ساراي دا سالدىرىپ, ايشىلىق الىس جەرلەردەن جىلدام حابار دا العىزىپ, سايگ ۇلىك تۇلپارلاردى اۆتوكولىك پەن ۇشاقتار, حات پەن حاباردى SMS, تەلەفون ستانسالارى مەن پوشتا قىزمەتىن ۇيالى تەلەفوندار, سيا مەن قالامدى كومپيۋتەرلەر, كىتاپحانالاردى ينتەرنەت-پورتالدار, باسپاحانالاردى پرينتەرلەر, كينوتەاترلاردى تەلەۆيزور مەن ۆيدەوتەكالار الماستىرىپ وتىرعانىنا دا ەتىمىز الدەقاشان ۇيرەنىپ كەتتى. ونى بىلاي قويعاندا, بۇگىندە تۇتىنۋشىلاردىڭ قولىندا جۇرگەن الاقانداي عانا ايفوندار مەن پلانشەتتەر بۇكىل اقپاراتتىق-كوممۋنيكاتسيا تەحنولوگيالارىنىڭ كومەگىمەن ىسكە اسىرىلاتىن قىزمەت تۇرلەرىن تۇگەل قامتاماسىز ەتەتىن امبەباپ قۇرالعا اينالىپ كەتكەنى دە ۇيرەنشىكتى جاي بولىپ قالدى. مۇنىڭ سىرتىندا «Google», «Yahoo», «Yandex» سەكىلدى اقپارات ىزدەۋ جۇيەلەرىنىڭ كومەگىمەن بۇگىنگى تاڭدا كەز كەلگەن قازاقستاندىق بۇكىل ادامزات وركەنيەتىنىڭ رۋحاني قۇندىلىقتارىنىڭ عالامتور جەلىلەرىندە جيناقتالعان ۇلان-عايىر قويمالارىنا سۇڭگىپ كەتىپ, عىلىم مەن ءبىلىمنىڭ, ونەر مەن ءىلىمنىڭ ءار سالاسىنا قاتىستى ۇعىمدار مەن تەرميندەردىڭ كەز كەلگەنىن قاس-قاعىم ساتتە سۋىرىپ الىپ, كەرەگىنە جاراتىپ وتىر. دەمەك, بۇگىنگى تاڭدا قالىپتاسىپ وتىرعان الەمدىك گەوساياسات كارتاسىنان ءبىزدىڭ ەلىمىز شەت قالىپ وتىر دەۋگە ەشبىر نەگىز جوق, سەبەبى, بۇكىلالەمدىك اقپارات مۇحيتىنان سۋسىنداۋ ءوز ەلىمىزدىڭ دە شەكسىز يگىلىگىنە اينالىپ كەتكەنى كۇمانسىز. تاۋەلسىزدىك تىزگىنىنە يە بولعان شيرەك عاسىر ىشىندە قازاقستان اۋەل باستا قولبايلاۋ بولعان ەكونوميكالىق قيىندىقتاردى ارتقا تاستاپ, بۇگىندە دامۋدىڭ تۇراقتى جولىنا ءتۇسىپ قانا قويماي, بۇكىل پلانەتاعا تانىلىپ, الەمدەگى ەكونوميكاسى قارىشتى دامىپ كەلە جاتقان ساناۋلى مەملەكەتتەردىڭ ساناتىنا قوسىلدى. مۇنى قالايشا وڭ ءۇردىس دەپ قابىلدامايسىڭ؟!.
ءادىل احمەتوۆ,
قازاقستاننىڭ ەڭبەك سىڭىرگەن قايراتكەرى
