«قازاگرو» باسشىسى سەربياعا جۇمىس ساپارىمەن باردى

«قازاگرو» ۇلتتىق حولدينگىنىڭ باسقارما توراعاسى نۇرلىبەك مالەلوۆ بەلگرادقا جۇمىس ساپارىمەن باردى, دەپ حابارلايدى حولدينگتىڭ رەسمي سايتى. سەربياداعى قازاقستان ەلشىلىگى مەملەكەت باسشىسى نۇرسۇلتان نازارباەۆتىڭ 2016 جىلعى 23-26 تامىزداعى سەربياعا العاشقى رەسمي ساپارى جانە سەربيا رەسپۋبليكاسى پرەمەر-ءمينيسترى الەكساندر ءۆۋچيچتىڭ 2016 جىلعى 14-16 قاراشاداعى قازاقستانعا رەسمي ساپارىنىڭ شەڭبەرىندە قول جەتكىزىلگەن ۋاعدالاستىقتاردى ورىنداۋ ماقساتىندا بىرقاتار شارالار ۇيىمداستىردى. اتاپ ايتقاندا, «قازاگرو» ۇلتتىق حولدينگىنىڭ باسقارما توراعاسى ن.مالەلوۆتىڭ سەربيا اۋىل شارۋاشىلىعى جانە قورشاعان ورتانى قورعاۋ ءمينيسترى ب.نەديموۆيچپەن, سەربيا ساۋدا-ونەركاسىپتىك پالاتاسىنىڭ پرەزيدەنتىمەن كەزدەسۋلەرى, سونداي-اق سەربيانىڭ جەتەكشى اۋىل شارۋاشىلىعى تاۋارىن وندىرۋشىلەرىنىڭ قاتىسۋىمەن بيزنەس-فورۋم وتكىزىلدى. كەزدەسۋدىڭ باسىندا «قازاگرو»-نىڭ باسقارما توراعاسى سەربيا تاراپىنىڭ وكىلدەرىن ەلدەگى الەۋمەتتىك-ەكونوميكالىق احۋالمەن, پرەزيدەنتتىڭ قازاقستان حالقىنا جولداۋىنىڭ نەگىزگى ەرەجەلەرىمەن, سونداي-اق قازاقستان پارلامەنتى مەن ۇكىمەتىنىڭ وكىلەتتىكتەرىن كەڭەيتۋگە باعىتتالعان كونستيتۋتسيالىق وزگەرىستەرمەن تانىستىردى. «قازاگرو» ۇلتتىق حولدينگىنىڭ قىزمەتى, ونىڭ مىندەتتەرى مەن ىسكە اسىرىلاتىن جوبالارى تۋرالى باياندالدى. باسقارما توراعاسى حولدينگتىڭ قولداۋ قۇرالدارىن پايدالانۋ ارقىلى قازاقستان مەن سەربيانىڭ اۋىل شارۋاشىلىعى سالاسىنداعى ىنتىماقتاستىعىنىڭ جاڭا مۇمكىندىكتەرى تۋرالى ايتىپ بەردى. مىسال رەتىندە, قازاقستان مەن ۆەنگريانىڭ اراسىنداعى ينۆەستيتسيالىق قور جۇمىسىنىڭ تابىستى تاجىريبەسىن زەرتتەپ ءبىلۋ ۇسىنىلدى. سەربيانىڭ اۋىل شارۋاشىلىعى جانە قورشاعان ورتانى قورعاۋ ءمينيسترى ءوز تاراپىنان قازاقستانمەن اۋىل شارۋاشىلىعى سالاسىنداعى بىرلەسكەن جوبالاردى ىسكە اسىرۋ ءۇشىن بەلسەندى جۇمىس جۇرگىزۋدى جوسپارلايتىنىن جەتكىزدى. اتاپ ايتقاندا, ول بيىل اۋىل شارۋاشىلىعى سالاسىندا قىزمەت ەتەتىن بيزنەسمەندەر توبىمەن قازاقستانعا ساپارمەن بارۋعا نيەتتى ەكەنىن ءبىلدىردى.