رەسەيلىك تانىمال ءانشى ۆيتاستىڭ پروديۋسەرى قىتاي تەلەارناسىنا حات جازىپ, ديماش قۇدايبەرگەنوۆ ورىنداعان «وپەرا 2» ءانى ءۇشىن نارازىلىق ءبىلدىردى. بۇل تۋرالى قىتايدىڭ الەۋمەتتىك جەلىلەرى جازىپ جاتىر, دەپ حابارلايدى
قازاقپارات.
ۆيتاستىڭ پروديۋسەرى سەرگەي پۋدوۆكيننىڭ «ۆيبو» (قىتايلىق تۆيتتەر) الەۋمەتتىك جەلىسىندەگى پاراقشاسىندا «پۋدوۆكين» پروديۋسەرلىك ورتالىعىنىڭ حۋنان تەلەارناسىنا جازعان حاتىن جاريالادى. وندا اتالمىش تەلەارنانىڭ اۆتورلىق قۇقىق زاڭنامالارىن ساقتاماعاندىعى ايتىلعان.
«وپەرا 2» - رەسەيلىك تانىمال ءانشى ۆيتالي گوگۋنسكيدىڭ اۆتورلىق ءانى. اۋەنى دە, ءسوزى دە ۆيتاسقا تيەسىلى. ول 2000 جىلى بۇل ءاندى تۇڭعىش رەت ورىنداپ, تانىمال بولدى. ۆيتاستىڭ بارلىق اندەرىنىڭ قۇقىعى «پۋدوۆكين» پروديۋسەرلىك ورتالىعىنىڭ مەنشىگىندە. حۋنان تەلەارناسى ۇيىمداستىرعان «Singer2017» ءان بايقاۋىندا قازاقستاندىق ءانشى ديماش قۇدايبەرگەنوۆ 28 قاڭتار كۇنى «وپەرا 2» ءانىن ورىنداپ, بۇل تەلەارنا ارقىلى كەڭىنەن تارالدى. بۇدان بولەك (ديماشتىڭ ءانى) ءار ءتۇرلى سايتتاردا كەڭىنەن جۇكتەلىپ, پايدالانىلۋدا. سونىمەن بىرگە 30 قاڭتار كۇنى بۇل ءان «بۇكىل الەمدىك قىتايدىڭ كوكتەم مەرەكەسىندە» تاعى ورىندالىپ, تەلەارنا, ينتەرنەت ارقىلى تاعى تارالدى.
ۆيتاس اندەرى الەمنىڭ كوپ ەلدەرىندە تارالعانىمەن پايدالانۋدا جەرگىلىكتى ورگاندار ارقىلى زاڭدىق قۇقىق قورعالادى. بۇل جولى حۋنان تەلەارناسى «پۋدوۆكين» پروديۋسەرلىك ورتالىعىنىڭ زاڭدىق مۇددەسىنە زالال كەلتىردى», دەلىنگەن حاتتا. سونىمەن بىرگە ۆيتاستىڭ پروديۋسەرلىك ورتالىعى اتالمىش تەلەارناعا مىناداي تالاپتارىن جولداعان:
1. حاتتى العان سوڭ, 30 قاڭتار كۇنى «بۇكىل الەمدىك قىتايدىڭ كوكتەم مەرەكەسىندە» ايتىلعان «وپەرا 2» ءانىنىڭ تارالۋىن توقتاتۋ.
2. زاڭدى جولمەن رۇقسات الىنباعان جاعدايدا «وپەرا 2» ءانىن ايتۋعا, پايدالانۋعا بولمايدى.
3. وسى حاتتى العاننان سوڭ, 7 كۇن ىشىندە بىزبەن حابارلاسىپ, ورتاق شەشىمگە كەلۋ. حات سوڭىندا «پۋدوۆكين» پروديۋسەرلىك ورتالىعىنىڭ حۋنان تەلەارناسىمەن كەلىسىمشارت جاساۋعا دايىن ەكەندىگى ايتىلعان.
