وسكەمەندە 28-ءشى دۇنيەجۇزىلىك قىسقى ۋنيۆەرسيادانىڭ الاۋى تۇتاندى. ءوڭىردىڭ 60-قا جۋىق تاڭداۋلى سپورتشىلارىنان قۇرالعان الاۋگەرلەر ەكى ساعات ىشىندە 12 شاقىرىمدى ءجۇرىپ وتپەك.
وسكەمەندەگى س.امانجولوۆ اتىنداعى ۋنيۆەرسيتەتتىڭ الدىنان باستاۋ العان ۋۆيۆەرسيادا الاۋىن تۇتاتۋ راسىمىنە وليمپيادا چەمپيونى ولگا رىپاكوۆا باستاعان ءوڭىر سپورتشىلارى قاتىستى.
- بۇگىن كوپتەن كۇتكەن سپورت مەرەكەسى. بەدەلدى حالىقارالىق سپورت باسەكەسىنىڭ ءبىزدىڭ ەلدە وتكىزىلۋى – بارشا قازاقستان حالقى ءۇشىن زور ماقتانىش, شىن مانىندەگى تاريحي وقيعا. الەم ەلدەرىنىڭ بەيبىتسۇيگىش قازاقستان حالقىنا دەگەن زور سەنىمىنىڭ دالەلى. دۇنيە ءجۇزى حالقىن دوستىق پەن تاتۋلىققا شاقىرعان ەلباسىمىز نۇرسۇلتان نازارباەۆتىڭ الەمدىك ارەناداعى ابىرويى مەن بەدەلى. ءبىز الداعى سپورتتىق جارىستاردا ەل نامىسىن قورعايتىن سپورتشىلاردىڭ تورتتەن ءبىرىن ءبىزدىڭ وبلىس سپورتشىلارى قۇرايتىنىن ماقتان تۇتامىز, - دەدى ۋنيۆەرسيادا الاۋىن ءبىرىنشى بولىپ تۇتاتقان وبلىس اكىمى دانيال احمەتوۆ.
ايماق باسشىسى الاۋ ەستافەتاسىن وليمپيادا چەمپيونى, بەلگىلى جەڭىل اتلەت ولگا رىپاكوۆاعا تاپسىردى. ءدال قازىر وسكەمەن كوشەلەرىن ارالاپ جۇرگەن الاۋدى ەسكەك ەسۋشى ەكاتەرينا سميرنوۆا ەرتىس وزەنى ارقىلى الىپ وتەدى. الاۋ ەڭ سوڭىندا «التاي» ۆولەيبول كلۋبىنىڭ ۇزدىك ويىنشىسى, الماتىدا وتەتىن ۋنيۆەرسيادانىڭ اشىلۋ سالتاناتىندا شىعىس قازاقستان سپورتشىلارىن باستاپ شىعاتىن دامير اكىموۆكە تاپسىرىلاتىن بولادى.
ازامات قاسىم, «ەگەمەن قازاقستان»
وسكەمەن
