بالقان قالامگەرلەرىنىڭ جيناعى جارىق كوردى

ا.پۋشكين اتىنداعى شىعىس قازاقستان وبلىستىق كىتاپحاناسىندا بالقان پوەزياسى مەن پروزاسىنان سىر شەرتەتىن «جارىلقا مەنى, ءتۇن» اتتى جاڭا جيناقتىڭ تۇساۋى كەسىلدى.  اتالعان كىتاپتىڭ جارىققا شىعۋىنا ەسىمى بەلگىلى جازۋشى, اۋدارماشى, لوندونداعى «اباي ءۇيى» مەن حالىقارالىق اباي كلۋبىن قۇرۋشى, «اما­نات» حالىقارالىق ادەبي جۋر­نالىنىڭ نەگىزىن قالاۋشى رول­لان سەيسەنباەۆ ۇيىتقى بولدى. جاڭا جيناقپەن تانىستىرعان ««Kazzinc Holdings» جشس ديرەكتورلار كەڭەسىنىڭ توراعاسى نيكولا ءپوپوۆيچتىڭ ايتۋىنشا, اتالعان ەڭبەك نۇرسۇلتان نازارباەۆتىڭ جىلى لەبىزىنە يە بولعان «مەنىڭ 100 كىتابىم» سەرياسىمەن جارىق كوردى. قازاق, ورىس جانە اعىلشىن تىلدەرىندە جاريالاناتىن بۇل سەريانىڭ كىتاپتارى دەمەۋشىلەردىڭ كومە­گىنە سۇيەنەدى. «...اقىل-وي بايلىعى ەش­قاشان سارقىلمايدى. جاق­سى كىتاپ ءسىزدىڭ ومىرلىك سەرىگىڭىز بولماق», دەپ جازعان ەكەن ەلباسى اتالعان جيناقتىڭ العى­سوزىندە. ن.پوپوۆيچ سەر­بيا, چەرنوگوريا, بوسنيا, حور­ۆاتيا جازۋشىلارى مەن اقىندارى شىعارمالارىنىڭ جانىنا جاقىن ەكەنىن جەتكىزدى. ونىڭ اتا-اناسى بۇرىنعى يۋگوسلاۆيالىق ازاماتتار ەكەن. ول وسى ورايدا اتالعان ەل­دەر­دىڭ قۇندىلىقتارىن با­عالاي كەلە, جيناقتا بارلىق رەسپۋبليكالاردىڭ رۋحى اي­رىقشا اشىپ كورسەتىلگەنىن جانە جاريالانعان ماتىندەر وتكەن شاققا دەگەن ساعىنىش سەزىمىن وياتاتىنىن ايتتى. – بۇل جيناقتى ءحىح-حح عاسىردى قامتيتىن بۇرىنعى يۋگوسلاۆيا كەڭىستىگىندەگى جازبا ادەبيەتى قۇدىرەتىنىڭ ەسكەرتكىشى دەپ باعالاۋعا بولادى, – دەدى ن.پوپوۆيچ. تاعى ءبىر ايتارىمىز, جاقىندا جازۋشى روللان سەيسەنباەۆ كا­نادانىڭ ەرنەست حەمينگۋەي اتىنداعى ادەبي سىيلىعىنىڭ لاۋرەاتى اتاندى. بۇل سىيلىققا قازاق قالامگەرى «ەلدەر مەن كونتينەنتتەر» اتالىمى بويىنشا الەم حالىقتارىنىڭ بىرلىك پەن ىنتىماقتا جاراسىمدى ءومىر سۇرۋلەرى جولىنداعى ىزدەنىسكە ۇمتىلعان شىعارماشىلىعى ءۇشىن لايىق دەپ تانىلىپ وتىر. دۋمان اناش, «ەگەمەن قازاقستان» وسكەمەن