جۋكوۆ قازاقستان قۇراماسىنىڭ ساپىندا ويناعىسى كەلەدى

جۋىردا عانا الماتىنىڭ «قايرات» كومانداسىنا اۋىسقان گەورگي جۋكوۆ قازاقستان قۇراماسى ساپىندا دوپ تەپكىسى كەلەتىنىن مالىمدەدى. بۇل تۋرالى ول «قايرات» كلۋبىنىڭ ءباسپاسوز قىزمەتىنە بەرگەن سۇحباتىندا ايتتى. «وسى ۋاقىتقا دەيىن مەنىڭ تاراپىما كەرەعار پىكىرلەر كوپ ايتىلعان. باسىلىمدار دا, جانكۇيەرلەر دە مەنى تالاي سىنادى. مەن ول كەزدە «ستاندارت» كلۋبىنا تيەسىلى ەدىم. سول ءۇشىن بەلگيالىق كلۋب پرەزيدەنتىنىڭ ايتقانىمەن ءجۇرىپ كەلدىم. «استانادا» دا ءدال سولاي بولدى. بۇل فۋتبولداعى قالىپتى جاعداي. قازىر ەشكىمنىڭ الدىندا مىندەتىم جوق. بۇل شەشىمدى قابىلدار الدىن الدىمەن اكە-شەشەممەن اقىلداستىق. ارتىنشا قايرات بورانباەۆپەن كەڭەستىم. وسىدان بارىپ قازاقستان قۇراماسى ساپىندا ونەر كورسەتۋگە بەل بايلاپ وتىرمىن. ارينە, الداعى ۋاقىتتا ۇلتتىق قۇرامادان شاقىرۋ تۇسەتىن بولسا, اقتىق دەمىم قالعانشا وينار ەدىم», – دەيدى جۋكوۆ. 2014-2015 جىلدارى جۋكوۆ «استانا» ۇجىمىندا ويناپ جۇرگەندە قازاقستان قۇراماسىنىڭ سول كەزدەگى باس باپكەرلەرى ميروسلاۆ بەرانەك پەن يۋري كراسنوجان شاقىرتقان. الايدا, بۇل شاقىرۋدان باس تارتقان بولاتىن. ايتا كەتەيىك «قايرات» كلۋبىنىڭ پرەزيدەنتى قايرات بورانباەۆ گەورگي جۋكوۆتى كوماندا قاتارىنا «ۇلتتىق قۇراماعا وينايسىڭ» دەگەن تالاپپەن شاقىرعان.