پاۆلوداردا 900 مەكتەپ وقۋشىسى جۇرگىزۋشى كۋالىگىن الادى

پاۆلوداردا بيىل وقۋ جىلى اياقتالىسىمەن 32 مەكتەپتە 11-سىنىپتىڭ 899 وقۋشى اتتەستاتپەن بىرگە جۇرگىزۋشى كۋالىگىن الىپ شىعادى. ولاردىڭ 469-ى ۇل بالا بولسا, 420-ى – قىزدار. بۇل تۋرالى pavlodarnews.kz حابارلادى. «№1 وقۋ-وندىرىستىك كومبيناتىنىڭ ماتەريالدىق-تەحنيكالىق بازاسى تولىق ساقتالعان. جول قوزعالىسى ەرەجەسى بويىنشا سەگىز كابينەت, العاشقى مەديتسينالىق كومەك كورسەتەتىن ەكى كابينەت جۇمىس ىستەيدى. اۆتوموبيل پاركىندە جەتى جەڭىل كولىك پەن ءتورت جۇك كولىگى بار. وقىتۋ ءۇردىسى كەزىندە وقۋشىلارعا كولىك قۇرالدارىن جۇرگىزۋدى 12 ۇستاز ۇيرەتەدى. ولاردىڭ بارلىعى ارنايى كۋرستان وتكەن جانە كۋالىكتەرى مەن جوعارى تەحنيكالىق ءبىلىمى بار. وقۋ «ۆ» ساناتىنداعى كولىك قۇرالدارى جۇرگىزۋشىلەرىن دايىنداۋ بويىنشا تەحنولوگيا ءپانى ەسەبىنەن جۇرگىزىلەدى. كۋرستى ءساتتى اياقتاپ, ەمتيحان تاپسىرعاننان كەيىن جۇرگىزۋشى كۋالىگى بەرىلەدى. بۇدان ءارى تۇلەكتەر مەملەكەتتىك اۆتوينسپەكتسياسىندا ەمتيحان تاپسىرادى دا جۇرگىزۋشى قۇقىعىنا يە بولادى», – دەيدى قالالىق ءبىلىم بەرۋ ءبولىمى باسشىسىنىڭ ورىنباسارى گالينا شيندليارسكايا. ستاتيستيكاعا سۇيەنسەك, سوڭعى بەس جىلدىڭ ىشىندە 3000-نان استام وقۋشىعا جۇرگىزۋشى كۋالىگى تابىستالعان. ماسەلەن, 2013 جىلى 905, 2014 جىلى 800, 2015 جىلى 655, 2016 جىلى 689 تۇلەك كولىك جۇرگىزۋدى مەڭگەرگەن. بۇل ولارعا 18 جاسقا تولعاننان كەيىن كولىك قۇرالىن باسقارۋ قۇقىعىن بەرەدى. ايتا كەتەيىك, ءبىلىم جانە عىلىم ءمينيسترى ەرلان ساعاديەۆ 2017 جىلدان باستاپ ەلىمىزدە وقۋشىلار العاشقى اسكەري دايىندىق ساباعىندا كولىك جۇرگىزىپ ۇيرەنەتىنى تۋرالى ايتقان بولاتىن. مۇنداي جاڭاشىلدىق كوشەلەردە بالانىڭ جاراقاتتانۋ وقيعالارىن ازايتۋعا مۇمكىندىك بەرەدى. بۇل ۇسىنىستى قورعانىس مينيسترلىگى دە ماقۇلداعان.