ەلباسى: ۋنيۆەرسيادادا قۇرامامىز بارلىعىمىزدى قۋانتادى دەپ سەنەمىن

پرەزيدەنت نۇرسۇلتان نازارباەۆ بۇكىلالەمدىك 28-ءشى قىسقى ۋنيۆەرسيادا دوداسىندا ەل نامىسىن قورعايتىن سپورتشىلارىمىزعا ساتتىلىك تىلەدى. «قۇرمەتتى جاس دوستار, سپورتشىلار! بۇگىن جاستار ءۇشىن ۇلكەن مەرەكە. ەلىمىزدىڭ ەڭ باستى ۋنيۆەرسيتەتىندە بۇگىن ۋنيۆەرسيادا الاۋى جاعىلادى. وسى ءتورت-بەس كۇننىڭ ىشىندە وسى الاۋ بۇكىل قازاقستاندى شارلاپ شىعىپ, ەلدىڭ سپورتشىلارىمىزعا دەگەن تىلەگىن, ارمانىن قابىل الاسىڭدار. سوندىقتان ول جەڭىسكە جەتۋگە كومەگىن تيگىزەتىن بولادى», - دەدى ەلباسى. مەملەكەت باسشىسىنىڭ ايتۋىنشا, مۇنداي جوعارى دەڭگەيدەگى سپورتتىق دودانىڭ قازاقستاندا ءوتۋى ۇلكەن ابىروي. «بۇل شارا - تۇڭعىش رەت تاۋەلسىزدىك جىلدارى ىشىندە جەتكەن جەتىستىگىمىزدىڭ بىرەگەيى, مۇنداي دۇنيەجۇزىلىك دودانى ءبىز ەشقاشان وتكىزىپ كورگەنىمىز جوق. 57 ەلدىڭ سپورتشىلارى كەلەتىن بولادى. 170 مەملەكەتتىڭ ىشىنەن وتكىزۋ قۇقىعىنا يە بولدىق. بۇل, بىرىنشىدەن, ءبىزدىڭ ەلىمىز ءۇشىن ۇلكەن ابىروي. قازاقستاندى تاعى دا بارشا ەلدەرگە پاش ەتەمىز, مىڭداعان جۋرناليستەر بولادى. ەكىنشىدەن, جاستاردى سپورتقا باۋليدى. ۇشىنشىدەن, سالعان جاڭا سپورت كەشەندەردىڭ بارلىعى بولاشاقتاعى ەلىمىزدىڭ سپورتشىلارىنا قىزمەت ەتەدى. ءبىزدىڭ 168 مۇشەسى بار قۇرامامىز العا سۋىرىلىپ, بارلىعىمىزدى قۋانتادى دەپ سەنەمىن! سىزدەرگە زور تابىس تىلەيمىن, وركەندەرىڭىز وسە بەرسىن!», - دەدى ن. نازارباەۆ.