پاۆلوداردا قازاق ءتىلىن مەڭگەرگەن وزگە ۇلت وكىلى ەكسپو-عا تەگىن بيلەت الادى

پاۆلوداردا سەرپىندىكتەردىڭ باستاماسىمەن جاڭا جوبا قولعا الىندى, دەپ حابارلايدى قازاقپارات. وسى جونىندە «سەرپىن» ىسكەرلەر ۇيىمى پاۆلودار وبلىسى بويىنشا فيليالىنىڭ توراعاسى دارىن تاجىباەۆ ءمالىم ەتتى. «پاۆلودارلىق سەرپىندىكتەر «قازاقستاندىق ارمان» اتتى قوعامدىق بىرلەستىك قۇرعان بولاتىن. وسى ۇيىممەن جانە قازاقستان حالقى اسسامبلەياسى جاستار قاناتىنىڭ جەتەكشىسى ەلينا پاۋليمەن بىرلەسە وتىرىپ, «قازاقشا سويلەۋ وڭاي» جوباسىن باستادىق. ەرەجە بويىنشا قازاق ءتىلىن مەڭگەرۋدى ماقسات تۇتقان كەز كەلگەن وزگە ۇلت وكىلى مەن ءبىر سەرپىندىك قوسىلىپ, جەكە جۇپ بولادى. ولارعا ءبىر اي ۋاقىت بەرىلىپ, كونكۋرستىق جۇيەدە جەڭىمپاز انىقتالادى. شامامەن 1 ناۋرىز كۇنى قورىتىندىسى شىعىپ, ناتيجەلى جۇمىس جاساعان جۇپ ەكسپو-2017 كورمەسىنە تەگىن بيلەت ۇتىپ الادى», – دەدى وبلىستىق «سەرپىن» فيليالىنىڭ توراعاسى. دارىن تاجىباەۆتىڭ ايتۋىنشا, بۇگىندە 44 ادام  جازىلىپ,  22 جۇپ ىسكە كىرىسىپ كەتكەن. جوبانىڭ نەگىزگى ماقساتى – قازاق ءتىلىن دامىتۋ, سەرپىندىك ستۋدەنتتەردىڭ جەرگىلىكتى ادامدارمەن قارىم-قاتىناسىن نىعايتۋ.